Engulu mbuya eyahandikawa na Yohana 20:1-31
20 Oko kiro ky’erimbere ky’eyenga, Maria Magdalene mwatsinduka okw’isinda iyikine omwirimya. Mwalangira eribwe iryabirilusibwa oko yisinda.
2 Neryo mwaghenda akatibita eyiri Simoni Petro n’oghundi mwigha oyo Yesu abya anzire. Mwabwirabo ati: “Babirilusya Omukama y’omw’isinda kandi sitwasi nga bamutwere hayi.”
3 Neryo Petro n’oghundi mwigha oyo, mubaya eyiri eyisinda.
4 Ababiri bosi mubatibita haghuma, nikwa oghundi mwigha oyo mwalengya Petro y’amaghulu. Mwahika okw’isinda ko w’erimbere.
5 Munama, amakengemererya omw’isinda, amalangira esyongyimba sy’ekitani isinemo. Aliwe mwatingiramo.
6 Na Simoni Petro, naye mwasa inyanamukwamire n’eringira omo yisinda. Mwalangira esyongyimba sy’ekitani isineho.
7 Olukimba olwabya oko mutwe wiwe lwabya isiluli haghuma n’esindi ngyimba, aliwe ilunalingire aho walo.
8 Neryo n’omwigha oyo watsuka erihika okw’isinda, naye mwingiramo. Abere abilangira, mwikirirya.
9 Kusangwa babya isibali bowa ndeke amasako awakabugha ati litolere inyalubuka.
10 Neryo abigha abo mubasuba eka wabo.
11 Nikwa Maria abya inianimene hakuhi n’eyisinda inianemulira. Munama, amakengemererya omw’isinda inianemulira.
12 Mwalangira abamalaika babiri ababya bambite esyongyimba nyeru-nyeru ibanikere ahahirawa omubiri wa Yesu; omughuma oko museghemo n’oghundi oko bulambiryo.
13 Mubamubulya bati: “Ukalira busanaki?” Mwasubiryabo ati: “Babiriheka Omukama waghe, kandi sinasi nga bamuhirire hayi.”
14 Abere abibugha atya, mwabinduka, amalangira Yesu inianimeneho, aliwe mwataminya ngoko ni Yesu.
15 Yesu mwamubulya ati: “Mukali, ukalira busanaki? Ukasondaya ndi?” Maria mwalengekania ati yo mulimi w’eririma. Neryo mwamubwira ati: “Mukulu, wamabya in’iwe wamutwere handi, umbwire aho wamuhirire; naghe ngendiyamuhekaho.”
16 Yesu mwabugha naye ati: “Maria!” Maria abere abibinduka, mwabugha naye omo Kiebrania ati: “Raboni!” (ni bugha ambu “Mukangirirya!”)
17 Yesu mwabugha na Maria ati: “Sighunyimakirire, kusangwa sindinahetukira eyiri Tata. Nikwa ughende uyabwire baghala betu uti, ‘Ngahetukira eyiri Tata waghe na Tata wenyu kandi oMungu waghe n’oMungu wenyu.’”
18 Maria Magdalene mwaghenda amayabwira abigha ati: “Namabilola oko Mukama.” Kandi mwakaniryabo ebyo Yesu amubwira.
19 Ekiro ky’erimbere ky’eyenga ekyo, omwigholo-gholo, abigha babya ibanayikingire omo nyumba kusangwa babya bakasagha Abayahudi. Emilango yabya iyinakingire, aliwe Yesu mwabatsubukako. Mwabwirabo ati: “Obuholo bubye nenyu.”
20 Abere abibugha ebinywa ebi, mwabakangania ebyala biwe n’olukanga lwiwe. Neryo abigha mubatsema babilola oko Mukama.
21 Yesu mwabwirabo engendo y’akabiri ati: “Obuholo bubye nenyu. Ngoko Tata ananituma, naghe ngabatuma.”
22 Abere abibugha ebinywa ebi, mwabuhira kubo k’omuka n’eribugha ati: “Mwangirire ekirimu kibuyirire.
23 Mwamabighanyira ebibi by’omundu, ibyamabighanyirwa; nikwa mwamatendighanyira ebibi by’omundu, isibyangaghanyirwa.”
24 Omughuma w’oko bakwenda 12 ye Toma oyukahulawa mo Muhasa, syabya haghuma nabo omughulu Yesu ahika.
25 Neryo abandi bigha babya bakamubwira bati: “Twabirilola oko Mukama.” Nikwa mwabwirabo ati: “Nite nalangira esyongolu sy’emisumali omo byala biwe n’erihira omunwe waghe w’omo syongolu esyo n’erihira ebyala byaghe omo lukanga lwiwe, sinangikirirya n’ahake.”
26 Enyuma w’ebiro munane, kandi abigha biwe babya ibanayikingire omo nyumba. Na Toma abya iniane haghuma nabo. Nomo emilango yanabya iyinakingire, Yesu mwahuluka omo kati-kati kabo. Mwabugha ati: “Obuholo bubye okw’inywe.”
27 Neryo mwabugha na Toma ati: “Hira omunwe waghu wo hano. Langira n’ebyala byaghe. Leta n’ebyala byaghu, uhirebyo omo lukanga lwaghe. Neryo uleke eritika-tika; nikwa wikiriraye.”
28 Toma mwamusubirya ati: “Mukama waghe, kandi Mungu waghe.”
29 Yesu mwamubwira ati: “Wamikirirya kundi wamabinyilolako? Obutseme buli n’abakakiriraya nibya isibetalangira.”
30 Eribugha ekwenene, Yesu mwakola n’ebindi bitiko-tiko bingyi embere sy’abigha, ebitahandikirwe omo kitabu ky’erilinga kino.
31 Nikwa emyatsi eyi yabirihandikwa mutoke erikirirya ngoko Yesu ni Kristo, Mughala w’oMungu; kandi busana n’erikirirya mutoke erisyabana engebe omo rina liwe.
