Engulu mbuya eyahandikawa na Yohana 21:1-25
21 Enyuma w’emyatsi eyi, kandi Yesu mwayikangania oko bigha biwe oko ngetse ye Tiberia. Kw’ayikangaya atya oko bigha biwe:
2 Simoni Petro, Toma (oyukahulawa mo Muhasa), Natanaeli owe Kana eye Galilaya, baghala ba Zebedayo, n’abandi bigha babiri, babya ibane haghuma.
3 Simoni Petro mwabwirabo ati: “Ingye namayasoha oko syosamaki.” Mubamubwira bati: “Netu tukaghenda naghu.” Neryo mubasambira omo bwato bamaghenda. Aliwe omo kiro kyosi ekyo, mubatahamba kindu.
4 Nikwa bwabere bukasonda erikya, Yesu mwimana oko musike w’engetse. Aliwe abigha biwe mubataminya ngoko niye.
5 Neryo Yesu mwabulyabo ati: “Bana, munawite eky’erirya kwe?” Nabo mubamusubirya bati: “Iyehe.”
6 Neryo mwabwirabo ati: “Mughuse obutimba oko luhande lw’amali lw’obwato, mukendihamba esyosamaki silebe.” Neryo mubaghusa b’oho. Aliwe mubatasyatoka erikurirabo omo bwato, kundi ibwabiribyamo esyosamaki nyingyi.
7 Neryo omwigha oyo Yesu abya anzire mwabwira Petro ati: “Yo Mukama!” Simoni Petro abere abyowa ngoko yo Mukama, mwambala olundi lukimba lwiwe kundi abya inyane ndumbu, amayighusa omo maghetse.
8 Nikwa abandi bigha mubasa omo bwato buke ibanemukura obutimba oboswiremo esyosamaki kusangwa babya isibali hali oko musike w’engetse. Babya oko metre* nga 90.
9 Babere babihika oko musike mubalangira omuliro w’amakala inyaneko esyosamaki n’omukati.
10 Yesu mwababwira ati: “Mulete oko syosamaki esyo mukalua okw’ihamba.”
11 Neryo Simoni Petro mwasuba omo bwato amakurira obutimba b’oko musike oboswiremo esyosamaki nene-nene 153. Obutimba mubutatsutsangika nomo bwanabyamo esyosamaki syosi esyo.
12 Yesu mwabwirabo ati: “Mwase mulye.” Sihali n’omughuma w’oko bigha abo oyo watoka erimubulya ati: “Uli ndi?” Kusangwa babya ibabiriminya ko yo Mukama.
13 Yesu mwasa amimya omukati amabahagho, n’esyosamaki kutya.
14 Eyo yabya ngendo y’akasatu Yesu akahulukira abigha biwe enyuma sy’erilubuka.
15 Babere babibugha erirya, Yesu mwabulya Simoni Petro ati: “Simoni mughala wa Yohana, unanyanzire kulenga esi kwehi?” Mwamusubirya ati: “Inga Mukama, unasi ngoko nikwanzire.” Yesu mwamubwira ati: “Ulisaye ebyana byaghe by’esyombuli.”
16 Kandi mwabugha naye engendo y’akabiri ati: “Simoni mughala wa Yohana, unanyanzire?” Mwasubirya ati: “Inga Mukama, unasi ngoko nikwanzire.” Yesu mwamubwira ati: “Ulisaye esyombuli syaghe.”
17 Mwamubulya engendo y’akasatu ati: “Simoni mughala wa Yohana, unanyanzire?” Petro mwakwa obulighe kundi Yesu amamubulya engendo y’akasatu ati: “Unanyanzire?” Neryo mwamubwira ati: “Mukama, unasi emyatsi yosi, unasi ngoko nikwanzire.” Yesu mwamubwira ati: “Ulisaye ebyana byaghe by’esyombuli.
18 Oko kwenene ngakubwira, omughulu wabya mulwana, ighukayambalaya n’eriya eyo wanzire; aliwe ukendisyabya wabya musyakulu, ukendisyakakya ebyala n’oghundi mundu inyakwambalya n’erikutwala eyo utanzire.”
19 Abugha atya erikangania omuhanda w’oluholo olo Petro akendisyapipamo oMungu. Yesu mwabya abibugha ebinywa ebi, mwabugha na Petro ati: “Ulole embere erinikwama.”
20 Neryo Petro mwabinduka, amalangira omwigha oyo Yesu abya anzire inyanabakwamire. Omwigha oyu, yo waseghemera oko kikuba kya Yesu omughulu w’erirya ly’erigholo-gholo, n’eribugha ati: “Mukama, oyukendikuhotera nindi?”
21 Neryo Petro abere abilangira omwigha oyo, mwabulya Yesu ati: “Mukama, bikendisyabya biti n’oko mulume oyu?”
22 Yesu mwamusubirya ati: “Ryamabya ini sonda ryaghe niti asyabyaho erihika aho nasyasira, ebyo bikulebirye biti? Iwe ulole embere erinikwama.”
23 Neryo ekinywa eki mukyatsungana omo kati-kati k’abaghala betu ambu omwigha oyu, syendisyahola. Nikwa Yesu mwatamubwira ati syendisyahola. Aliwe mwabugha ati: “Ryamabya ini sonda ryaghe niti asyabyaho erihika aho nasyasira, ebyo bikulebirye biti?”
24 Omwigha oyu yukatulagho* oko myatsi eyi, kandi yo wahandika emyatsi eyi, kandi tunasi ngoko eritulagho* riwe ni kwenene.
25 Oko kwenene, hane n’eyindi myatsi mingyi eyo Yesu akola. Obuli katsi ko kahandikawa, alinga omo kihugho, simwangasungikire omwanya w’erihiramo ebitabu ebihandikiremo emyatsi eyi.
Amaelezo awehikwa
^ Kinywa kwa kinywa, “amaboko nga 90.” Ulebaye endomeko B14.
^ Kinywa kwa kinywa, “yukateka obwimiri.”
^ Kinywa kwa kinywa, “obwimiri.”
