Engulu mbuya eyahandikawa na Yohana 3:1-36
3 Habya Omufarisayo mughuma erina riwe iyo Nikodemu. Abya mutabali w’Abayahudi.
2 Mwasa eyiri Yesu omo kiro n’eribugha ati: “Rabi,* tunasi ngoko uli mukangirirya oyukalua ew’oMungu, kusangwa sihali omundu oyo wangakola ebitiko-tiko ebyo ukakola oMungu ate haghuma naye.”
3 Yesu mwamusubirya ati: “Kwenene-kwenene ngakubwira, omundu amatendibutwa eyindi ngendo,* syangalola oko Bwami bw’oMungu.”
4 Nikodemu mwamubulya ati: “Omundu angatasyabutwa ati inyabirikula kwehi? Syangasuba omo nda ya mama wiwe atoke eributwa engendo y’akabiri.”
5 Yesu mwasubirya ati: “Oko kwenene ngakubwira, omundu atitabutwa oko maghetse n’oko kirimu, syangingira omo Bwami bw’oMungu n’ahake.
6 Omubiri akabuta omubiri, n’ekirimu ikyabuta ekirimu.
7 Isiwasweka kundi mungakubwira niti: Litolete imwabutwa eyindi ngendo.
8 Erihunga likabuhirira eyo lyanzire, kandi ukowa eribuhirira lyalyo nikwa sighuliminya eyo rikalua kutse eyo likaya. Ko biri bitya oko mundu oyukabutawa omo kirimu.”
9 Nikodemu mwamusubirya ati: “Emyatsi eyi yangatokekana yiti?”
10 Yesu mwasubirya Nikodemu ati: “Iwe mukangirirya we Israeli, siwasi emyatsi eyi?
11 Kwenene-kwenene ngakubwira, ebyo twasi tukabughabyo, kandi tukatula omwatsi w’ebyo twabirilangira. Nikwa inywe simuliligha omwatsi ogho tukatula.
12 Mwamabya isimwangatoka erikirirya emyatsi y’ekihugho eyo ngababwira, mwangatoka muti erikirirya namababwira emyatsi y’elubula?
13 Sihali omundu oyo wabirihetukira elubula, yo n’Omughala w’omundu oyo wandaghala akaluayo.
14 Kandi ngoko Musa anasumbira enzoka y’endata omo mbwarara, litolere Omughala w’omundu naye inyasumbirwa endata,
15 obuli mundu oyukamwikiriraya atoke eribana engebe y’erikota.
16 “Kusangwa oMungu mwanza ekihugho kyo kutsibu, kyo kyaleka inyatuma Mughala wiwe, ekyusa; oyukamwikiriraya syahere nikwa abane engebe y’erikota.
17 Kusangwa oMungu mwatatuma Omughala wiwe y’oko kihugho busana n’erisyatswerakyo, nikwa mwamutuma kilamibawe erilabira iye.
18 Oyukikiriraya Omughala syangatswerwa. Nikwa oyutemwikiriraya abiritswerwa, kusangwa syalitikirirya omo rina ly’Omughala ekyusa ky’oMungu.
19 Abandu bakendisyatswerwa busana na kino: ekyakakala mukyasa omo kihugho, aliwe abandu babiryanza omwirimya omo mwanya w’ekyakakala, kusangwa emikolere yabo ni mibi.
20 Kusangwa oyukakola emyatsi mibi akapona ekyakakala, kandi syalyasa eyiri ekyakakala, emibiiri yiwe ikasyakanganibwa* ko ni mibi.
21 Nikwa oyukakola emyatsi eyitunganene akasa eyiri ekyakakala, emibiiri yiwe iminyikalibawe ngoko yikakolawa erikwamana n’erisonda ly’oMungu.”
22 Enyuma waho, Yesu mwaghenda n’abigha biwe omo kihugho kye Yudea. Mwabughayo ebiro bilebe haghuma nabo, kandi abya akabatisya abandu.
23 Aliwe Yohana naye abya inyanemubatisirya e Ainoni eyiri hakuhi ne Salimu, kusangwa eyo yabya amaghetse mangyi, n’abandu mubabya bakasa erisyabatisibwa.
24 Omughulu oyo, Yohana abya isyalyahirwa omo muliki.
25 Abigha ba Yohana mubakuba obuhaka n’Omuyahudi mughuma oko mwatsi w’ery’eribwa.
26 Neryo mubasa eyiri Yohana n’eribugha bati: “Rabi!* Omulume oyo ulue ukatula engulu yiwe, oyo wabya naye oko musirya we Yordani anemubatisya, n’abandu bosi banemuya eyo ali.”
27 Yohana mwasubirya ati: “Sihali ekyosi-kyosi ekyo omundu angabana, oMungu atalyamuhakyo.
28 Inywibene-bene mukanyimira ngoko munabugha niti, ‘Si ngye Kristo, aliwe natumawa embere siwe.’
29 Oyuli n’omulunga,* yo iba w’omulunga.* Nikwa, omwira w’iba w’omulunga akatsema kutsibu omughulu akimana hakuhi naye akakania naye. Neryo obutseme bwaghe bwabirihikana.
30 Litolere iye inyalola embere erikanya, naghe inakeha.”
31 Oyukalua endata, alengire abandi bosi. Ow’oko kihugho ni w’oko kihugho, kandi akabugha eby’ekihugho. Oyukalua elubula, alengire abandi bosi.
32 Akatula omwatsi* w’ebyo abirilangira n’eryowa, nikwa sihali oyukaligha omwatsi ogho akatula.
33 Owosi-wosi oyo wabiriligha omwatsi ogho akatula abirihira kugho kw’ekikumo ngoko oMungu ni w’ekwenene.
34 Kusangwa oyo oMungu abirituma, akabugha ebinywa by’oMungu, kundi oMungu akahitaya ekirimu kiwe butsira buhemu.
35 Tata anzire Omughala kandi abirihira emyatsi yosi y’omo byala biwe.
36 Oyukikiriraya Omughala, awite engebe y’erikota; nikwa oyutekenga Omughala syendisyalola oko ngebe, aliwe erihitana ry’oMungu rikamubyako.
Amaelezo awehikwa
^ Kutse “Mukangirirya.”
^ Kutse alinga “eributwa erilua elubula.”
^ Kutse “ikasyabisulwa.”
^ Kutse “Mukangirirya.”
^ Kutse “omuheruki.”
^ Kutse “iba w’omuheruki.”
^ Kinywa kwa kinywa, “akateka obwimiri.”
