Engulu mbuya eyahandikawa na Yohana 4:1-54
4 Omukama abere abiminya ngoko Abafarisayo babiryowa ngoko anemuyira abigha bangyi kulenga Yohana n’eribatisyabo—
2 Yesu s’iyo wabya akabatisya, aliwe abigha biwe bo babya bakabatisya—
3 mwalua e Yudea, amatasyaya e Galilaya.
4 Aliwe kyabya kitolere inyalaba omo Samaria.
5 Neryo mwahika omo muyi we Samaria owakahulawa mo Sikari, hakuhi n’eririma eryo Yakobo aha mughala wiwe ye Yozefu.
6 Eribulu* lya Yakobo lyabya aho. Yesu mwikala hakuhi nalyo, kundi abya inyabiriluha busana n’olughendo. Yabya nga saa sita* y’eritungyi.
7 Omukali Musamaria, mwasa akasyateha. Yesu mwamubwira ati: “Umba amaghetse w’erinywa.”
8 (Kusangwa abigha biwe babya ibabiriya omo muyi bakayaghula akalyo.)
9 Neryo omukali Musamaria oyo mwabwira Yesu ati: “Iwe uli Muyahudi naghe niri Musamaria; ukanisaba amaghetse w’erinywa wuti?” (Kusangwa Abayahudi sibalihulikirirana n’Abasamaria.)
10 Yesu mwamusubirya ati: “Ko ulue wasi ekihembo ekyo oMungu akahitaya busa, kandi ko ulue wasi oyukakubwira ati, ‘Umba amaghetse w’erinywa,’ n’iwe wangamusabire amaghetse naye ngambe abirikuha amaghetse w’engebe.”
11 Omukali mwamusubirya ati: “Mukama, sighuwite n’embegeti y’eriteha mw’amaghetse, kandi elibulu* ni liri. Neryo amaghetse w’engebe aya ulyalusayagho hayi?
12 Ye Yakobo, tata-kulu wetu, mwatuha elibulu* eri. Naye inyakanywa kulyo n’abaghala biwe, n’ebihangulo biwe; uli mukulu kw’iye kwehi?”
13 Yesu mwamusubirya ati: “Obuli mundu oyukanywa oko maghetse aya, akatasyakwa enyota.
14 Owosi-wosi oyukanywa oko maghetse agho ngendimuha, syendisyasyakwa enyota; aliwe amaghetse agho ngendimuha, akendibya ngununuko y’amaghetse omw’iye awakaha engebe y’erikota.”
15 Omukali mwamusubirya ati: “Mukama, umbe oko maghetse aya; neryo isinendisyasyakwa enyota kutse eribya ngasa hano ngasyateha.”
16 Yesu mwamusubirya ati: “Ghenda uyabirikire mwira waghu, mwase hano.”
17 Omukali mwasubirya ati: “Siniwite omulume.” Yesu mwamubwira ati: “Usingene ukabugha uti, ‘Siniwite omulume.’
18 Kusangwa wabiribya n’abalume batano, n’omulume oyo uli naye lino, s’iba waghu. Ekyo wamabugha ni kwenene.”
19 Omukali oyo mwamusubirya ati: “Mukama, namalangira ngoko uli muminyereri.
20 Abotata-kulu betu ibakaramiraya oko kitwa eki; nikwa inywe mukabugha muti e Yerusalema yo abandu batolere eriramirya.”
21 Yesu mwamusubirya ati: “Mukali, ngakubwira ekwenene: Endambi inemwasa omughulu simwendisyabya mukaya oko kitwa eki kutse e Yerusalema eriyaramya Tata.
22 Mukaramaya ekyo mutasi; itwe tukaramaya ekyo twasi, kusangwa omulamo akatsuka* oko Bayahudi.
23 Nikwa endambi inemwasa, na lino yabirihika, omughulu abaramya b’ekwenene bakendisyaramya Tata omo kirimu n’omo kwenene; kusangwa oko kwenene, Tata anemusonda abandu abali ng’abo erimuramya.
24 OMungu ni kirimu, n’abakamuramaya litolere ibamuramya omo kirimu n’omo kwenene.”
25 Omukali mwamusubirya ati: “Nyinasi Masiya kw’anemwasa, oyukahulawa mo Kristo. Omughulu akendisyasa, akendisyatwowisya emyatsi yosi yo burora-rora.”
26 Yesu mwamusubirya ati: “Oyukabugha naghu ono, n’iye.”
27 Neryo abigha biwe mubahika; kandi mubasweka kusangwa abya akakania n’omukali. Aliwe, muhatabya oyukabulaya ati: “Ukasondaki?” kutse ati “Busanaki ukakanaya n’omukali?”
28 Neryo omukali mwasigha eriregha liwe ly’amaghetse, amaghenda omo muyi n’eriyabwira abandu ati:
29 “Mwase mulebaye omulume oyo wamanyibwira ebyosi ebyo nabirikola. Oyu syangabya ini Kristo kwehi?”
30 Mubalua omo muyi, bamaya eyiri Yesu.
31 Oko ndambi eyo, abigha babya ibanemumuhatikana bati: “Rabi,* ulya.”
32 Aliwe mwasubiryabo ati: “Nyinawite oko kalyo ako mutasi.”
33 Neryo abigha mubabwirana bati: “Ikwa ka sihali oyo wamuletere akalyo!
34 Yesu mwasubiryabo ati: “Akalyo kaghe, ly’erikola erisonda ly’oyo wanyituma n’eribugha omubiiri wiwe.
35 Simulibugha muti hakisigha misi ini erighesa iryatsuka? Ngababwira: Musumbe ameso wenyu, musamalire amalima; abiryera,* ni w’erighesa.
36 Oyukaghesa anemuhabwa obuhingyi bwiwe, kandi anemuhindania esyombuto busana n’engebe y’erikota; neryo omubibi n’oyukaghesa batoke eritsema haghuma.
37 Busana n’ekyo, akasimo kano katolere: Omundu mughuma akabiba n’oghundi iniaghesa.
38 Munabatuma eriyaghesa ebyo mutaluhira. Abandi babirikola omubiiri, nenyu munemubana endundi omo ebyo bakola.”
39 Abasamaria bangyi b’omo muyi oyo mubamwikirirya busana n’ekinywa ekyo omukali abugha ati: “Mwakanyibwira ebyosi ebyo nabirikola.”
40 Neryo Abasamaria babere babihika aho ali, mubamusaba bati asighale haghuma nabo. Neryo mwabyayo biro bibiri.
41 Busana n’ekyo abandi bangyi mubamwikirirya busana n’ebyo abugha.
42 Neryo mubabwira omukali oyo bati: “Erimbere, mutukikiriraya busana n’ebyo ulyabugha; aliwe sibikiri bitya, kusangwa twabiriyowira n’eriminya kwenene ngoko omulume oyu ni mulamya w’ekihugho.”
43 Enyuma w’ebiro bibiri ebyo, Yesu mwaluayo amaya e Galilaya.
44 Aliwe Yesu iyuwene-wene mwatulagho ngoko omuminyereri syalisikibawa omo kihugo ky’ewabo.
45 Neryo omughulu ahika e Galilaya, Abanya Galilaya mubamukokya kusangwa mubalangira emyatsi yosi eyo akola e Yerusalema oko kiro kikulu, kundi nabo babya oko kiro kikulu ekyo.
46 Neryo kandi, mwahika e Kana ye Galilaya eyo abindula amaghetse mo divai. Habya omukulu oyukakolera ew’omwami. Mughala wiwe abya alwere. Abya e Kapernaumu.
47 Omulume oyu abere owa ngoko Yesu abirihika e Galilaya akalua e Yudea, mwaghenda eyo ali, n’erimusaba ati andaghalire ewiwe ayalamaye mughala wiwe; kusangwa mughala wiwe abya okw’ihola.
48 Nikwa Yesu mwamubwira ati: “Inywe simwangikirirya mute mwalangira ebitiko-tiko n’emyatsi y’eriswekera.”
49 Omukulu oyo mwamusubirya ati: “Mukama, ndaghalira ewaghe omwana waghe ate ahola.”
50 Yesu mwamubwira ati: “Ghenda, mughala waghu abirilama.” Omulume oyo mwikirirya ekinywa kya Yesu ekyo. Neryo mwaghenda.
51 Abere anemwandaghalira ewiwe, mwahindana n’abaghombe biwe bamamubwira bati mughala wiwe abirilama.
52 Neryo mwabulya abaghombe abo, omughala wiwe ng’alyalama saa yahi. Mubamusubirya bati: “Erihuhana ly’omubiri, ryamuluako muligholo oko saa saba* y’eritungyi.
53 Neryo baba w’omwana, mwaminya ngoko eyo ye saha eyo Yesu amubwirirako ati: “Mughala waghu abirilama.” Neryo iye, n’enyumba yiwe yosi mubikirirya.
54 Eki kye kitiko-tiko ky’akabiri ekyo Yesu akola omughulu ahika e Galilaya akalua e Yudea.
Amaelezo awehikwa
^ Kutse “ekitehero.”
^ Kutse 12:00.
^ Kutse “ekitehero.”
^ Kutse “ekitehero.”
^ Kutse “akasira.”
^ Kutse “Mukangirirya.”
^ Kutse “abiribya w’enzeru, kutse omusohe.”
^ Kutse 13:00.
