Engulu mbuya eyahandikawa na Yohana 6:1-71
6 Enyuma syaho Yesu mwalua aho, amasokera oko ghundi musirya w’engetse ye Galilaya kutse e Tiberia.
2 Abandu bangyi kutsibu babya ibanamukwamire kusangwa babya bakalangira ebitiko-tiko ebyo abya akakola akalamya abakoni.
3 Neryo Yesu mwahetukira oko kitwa. Abere abihikayo, mwikala haghuma n’abigha biwe.
4 Ekiro kikulu ky’Abayahudi ekye Pasaka* kyabya ikikisigha ikyahika.
5 Yesu mwasumba ameso, amalangira abandu bangyi bakasa eyo ali. Neryo mwabulya Filipo ati: “Tukendilusya emikati y’erilisya abandu aba yo hayi?”
6 Aliwe Yesu abya akamulengako. Kusangwa abya inyanasi ekyo akasonda erikola.
7 Filipo mwamusubirya ati: “Nomo twangaghula emikati y’esyodinari* 200, siyangaghonera oko bandu bosi aba, nibya nomo twangabaha mo kake-kake.”
8 Omughuma w’oko bigha biwe, yo Andrea omughala wabo Simoni Petro, mwabugha naye ati:
9 “Akalwana kano kanawite oko mikati itano y’ekisusu n’ehisamaki hibiri. Nikwa ehi hyangatayira abandu bosi aba bo hiti?”
10 Yesu mwabugha ati: “Mubwire abandu muti bikale.” Aho habya ebiti bingyi, neryo abandu mubikalaho. Babya balume nga 5 000.
11 Yesu abere abisaba, mwimya emikati, amaghabirayo ababya bikere aho. Kwanabya akolire atya n’oko hisamaki. Abosi mubabana ngoko babya banzire.
12 Babere babyughuta, Yesu mwabwira abigha biwe ati: “Mukume-kume ebihande-bihande ebyamasaka, isihabya n’ekikahera busa.”
13 Neryo mubakuma-kumabyo; mubusulya ebitiri 12 by’ebihande-bihande ebyo abandu abalya emikati itano y’ekisusu basakaya.
14 Abandu babere balangira ekitiko-tiko ekyo Yesu akola, mubatsuka eribugha bati: “Kwenene, oyu yo muminyereri oyo Amasako abugha ati akendisyasa omo kihugho.”
15 Yesu abere abiminya ngoko bakasonda erimuhamba n’erimuyira mo mwami, mwaluaho amatasyasuba oko kitwa, amabyako iyuwene.
16 Bwabere bwabya igholo-gholo, abigha biwe mubandaghalira oko ngetse.
17 Mubingira omo bwato, bamatsuka erisoka engetse bakaya e Kapernaumu. Habya ihamabibya omwirimya, aliwe Yesu abya isyalyahika aho bali.
18 N’engetse muyatsuka erighunga kusangwa ekihunga ekikalire kyabya kikabuhirira.
19 Abigha babere babighoya obwato hakuhi bilometre* nga bitano kutse ndatu (6) mubalangira Yesu inyanemutandayira oko maghetse akalolera hakuhi n’obwato. Neryo mububaha.
20 Aliwe mwabwirabo ati: “Ningye; simukwe obuba.”
21 Neryo mubasonda erimwingirya omo bwato. Nikwa obwato mubwalw’ibwahika oko musike eyo babya bakalolya.
22 Neryo engyakya, abandu abasighala oko ghundi musirya w’engetse, mubalangira ngoko sihali obundi bwato, habya obwato buke bughuma busa. Mubaminya ngoko Yesu mwatitasambira omo bwato haghuma n’abigha biwe. Abigha biwe mubaghenda ibibene.
23 Nikwa amato make-make awakasira e Tiberia mwahika aho balira emikati Omukama abisabirayo.
24 Abandu babere balangira ngoko Yesu n’abigha biwe sibaliho, mubingira omo mato ayo, bamaya e Kapernaumu bakasonda Yesu.
25 Babere beya Yesu oko ghundi musirya w’engetse, mubamubulya bati: “Rabi,* ulyahika eno yo saa yahi?”
26 Yesu mwasubiryabo ati: “Kwenene-kwenene ngababwira, simulinisondaya kundi mumukalangira ebitiko-tiko, aliwe kusangwa mumukalya emikati, mwamughuta.
27 Simukole busana n’akalyo akakahonda, nikwa busana n’akalyo aketehonda, akakabyaho erikolya oko ngebe y’erikota ako Omughala w’omundu akendibaha; kusangwa iye yo oMungu Tata iyuwene-wene abirihirako ekikumo erikangania ngoko amulighire.”
28 Neryo mubamubulya bati: “Twamanza erikola emibiiri y’oMungu, litolere itwakolaki?”
29 Yesu mwasubiryabo ati: “Omubiri w’oMungu w’ono, mwikiriraye oyo atuma.”
30 Neryo mubamubulya bati: “Ukendikola ekitiko-tiko kyahi, tutoke erilangirakyo, neryo itwakwikirirya? Ukendikola mubiiri wahi?
31 Omo mbwarara, abotata-kulu wetu mubalya amana, ngoko kihandikirwe kiti: ‘Mwabaha omukati erilua elubula mo kalyo.’”
32 Neryo Yesu mwababwira ati: “Kwenene-kwenene ngababwira, Musa mwatabaha omukati owakalua elubula, aliwe Tata waghe, akabaha omukati w’ekwenene owakalua elubula.
33 Kusangwa omukati ogho oMungu akaha, yo yukalua elubula n’eriha ekihugho ky’engebe.”
34 Mubamusubirya bati: “Mukama, ubye ukatuha oko mukati oyo ebiro byosi.”
35 Yesu mwababwira ati: “Ingye, indi mukati w’engebe. Oyukasa okw’ingye, syendisyakwa enzala n’ahake; n’owosi-wosi oyukanyikiriraya, syendisyakwa enyota n’ahake.
36 Ngoko nanabiribabwira, mwabirinilangira, nikwa simwetikirirya.
37 Abosi abo Tata akamba, bakendisyasa eyo nyiri; n’oyukasa eyo nyiri, sinendisyamutibitako n’ahake,
38 kusangwa nandaghala erilua elubula erikola erisonda ly’oyo wanyituma, butsira erikola erisonda lyaghe.
39 Erisonda ly’oyo wanituma ly’eri, asondire ati isinaheraya n’omughuma w’oko abo abirimba; nikwa anzire inasyalubukyabo oko kiro ky’enduli.
40 Erisonda lya Tata waghe ly’eri, ati obuli mundu oyukaligha Omughala n’erimwikirirya, asyabana engebe y’erikota, kandi ngendisyamulubukya oko kiro ky’enduli.”
41 Neryo Abayahudi mubatsuka eriyilungumula busana naye kundi mwabugha ati: “Ingye, niri mukati owalua elubula.”
42 Mubatsuka eribugha bati: “Oyu si Yesu omughala wa Yozefu kwe? Situnasi baba wiwe na mama wiwe! Neryo akatoka ati eribugha ati, ‘Nandaghala erilua elubula’?”
43 Yesu mwasubiryabo ati: “Muleke eriyilungumula.
44 Sihali oyo wangasa okw’ingye, Tata oyo wanituma, atalyamuleta; kandi ngendisyamulubukya oko kiro ky’enduli.
45 Abaminyereri mubahandika bati: ‘Abosi bakendisyakangiriribwa na Yehova.’* Obuli mundu oyo wabirihulikirira Tata n’erikangiriribwa, akasa eyo niri.
46 Si bugha ambu obuli mundu abirilola oko Tata. Oyo wabirimulolako, yo n’oyo walua ew’oMungu; oyo, yo wabirilola oko Tata.
47 Oko kwenene ngababwira, oyukikiriraya awite engebe y’erikota.
48 “Ingye, indi mukati w’engebe.
49 Omo mbwarara, abotata-kulu wenyu mubalya amana, nikwa mubahola.
50 Omukati owakalua elubula, w’ono, omundu wosi-wosi inyabya inyanganalya kugho, neryo inyatahola.
51 Ingye indi mukati w’engebe owalua elubula. Omundu amabirya kugho, inyakendisyabyaho kera na kera; n’omukati ogho ngendiha oyo, wo mubiri waghe, abandu* batoke eribana engebe.”
52 Neyo Abayahudi mubatsuka erikubisania obuhaka bati: “Omulume oyu angatoka ati erituha omubiri wiwe ati tulyegho?”
53 Neryo Yesu mwasubiryabo ati: “Oko kwenene ngababwira, mwamatendirya omubiri w’Omughala w’omundu n’erinywa omusasi wiwe, isimuwite engebe emwisi syenyu.
54 Oyukalya oko mubiri waghe n’erinywa oko musasi waghe, awite engebe y’erikota, kandi ngendisyamulubukya oko kiro ky’enduli;
55 kusangwa omubiri waghe ni kalyo k’ekwenene, n’omusasi waghe ni ky’erinywa ky’ekwenene.
56 Oyukalya oko mubiri waghe, n’erinywa omusasi waghe, akabya omo bughuma naghe; naghe ngabya omo bughuma naye.
57 Ngoko Tata oyuliho anituma, naghe niriho busana na Tata, kutya oyukalya oko mubiri waghe akendisyabyaho busana naghe.
58 Ono wo mukati owalua elubula. Syali ng’omukati ogho abotata-kulu wenyu balya, n’enyuma syaho bamahola. Oyukalya oko mukati oyu, akendisyabyaho kera na kera.”
59 Yesu abugha emyatsi eyi omughulu abya akakangirirya e Kapernaumu omo sinagogi.*
60 Abangyi b’oko bigha biwe mubabya babyowa eki, mubabugha bati: “Ekinywa eki kikalire; oyo wangahulikirirakyo nindi kwe?”
61 Yesu mwaminya ngoko abigha biwe banemuyilungumula busana n’ekinywa ekyo alyabugha. Neryo mwabwirabo ati: “Ekyo kyamabatwikalya?
62 Ibwa byangabya biti mwamabilangira Omughala w’omundu akahetukira eyo abya embere?
63 Ekirimu kyo kikaha engebe; omubiri siki. Ebinywa ebyo namababwira, ni kirimu kandi ni ngebe.
64 Nikwa omw’inywe mune abatikirirye.” Kusangwa erilua oko nzuko, Yesu abya inyanasi abatikirirye n’oyukendisyamuhotera.
65 Kandi mwasyabugha ati: “Ekyo kyo kiryaleka inababwira niti sihali oyo wangasa okw’ingye, Tata atalyamulighira.”
66 Busana n’ekyo, abangyi b’oko bigha biwe mubasubira emyatsi eyo basigha enyuma. Mubumbya eribya bakalendera naye.
67 Neryo Yesu mwabulya abakwenda erikumi n’ababiri ati: “Nenyu munanzire imwaghenda?”
68 Simoni Petro mwamusubirya ati: “Mukama, tukendighenda okundi? Iwe, uwite ebinywa by’engebe y’erikota.
69 Twabikirirya n’eriminya ngoko uli Mubuyirire w’oMungu.”
70 Yesu mwasubiryabo ati: “Munabasombola inywe erikumi n’ababiri, ko bite bitya? Nikwa omughuma w’okw’inywe ali nga Diabolo.”*
71 Abya akahula Yuda, mughala wa Simoni Iskariote; kusangwa oyu abya iyukendisyamuhotera, nomo anabya mughuma w’oko bakwenda erikumi n’ababiri.
Amaelezo awehikwa
^ Kutse “Erikiruka.”
^ Ulebaye endomeko B14.
^ Kinywa kwa kinywa, “esyostadia nga 25 kutse 30.” Ulebaye endomeko B14.
^ Kutse “Mukangirirya.”
^ Ulebaye endomeko A5.
^ Kinywa kwa kinywa, “ekihugho.”
^ Kinywa kwa kinywa, “endeko y’abandu.”
^ Ni bugha ambu, “oyukalegha abandi.”
