Engulu mbuya eyahandikawa na Yohana 7:1-52
7 Enyuma sy’emyatsi eyi, Yesu mwalola embere eritimba omo Galilaya. Mwatanza eriya e Yudea kundi Abayahudi babya ibanemusondekania erimwita.
2 Nikwa Ekiro Kikulu ky’Abayahudi eky’Amahema kyabya hakuhi.
3 Neryo abaghala babo Yesu mubamubwira bati: “Ulue hano, uye e Yudea; abigha baghu nabo balangire emibiiri eyo ukakola.
4 Kusangwa omundu oyo wanzire eriminywa syalikola omwatsi omo bubiso-biso. Kundi unemukola emyatsi eyi, ukoleyo ekihugho kyosi kilangireyo.”
5 Abaghala babo sibabya bamwikirirye.
6 Neryo Yesu mwabwirabo ati. “Endambi yaghe siyiri yahika, nikwa inywe mukabya imunawite endambi mughulu wosi.”
7 Sihali ekyangaleka ekihugho ikyabapona; nikwa ingye kiniponire, kusangwa ngatulagho ngoko emibiiri yakyo ni mibi.
8 Inywe muhetukire oko kiro kikulu. Ingye sindinabya w’erihetukirayo, kusangwa endambi yaghe siyiri yahika ndeke.”
9 Neryo mwabya abibabwira emyatsi eyo, mwasighala e Galilaya.
10 Nikwa abaghala babo babere babihetukira oko kiro kikulu, naye mwahetukirayo; aliwe mwaghenda omo bubiso-biso, mwatayikangya.
11 Neryo Abayahudi mubatsuka erimusondya-sondya oko kiro kikulu ebyo ibanemubugha bati: “Omulume oyu ali hayi”?
12 N’omo kati-kati k’abandu, obuli mundu abya akamubughako ekiwe. Abaghuma babya bakabugha bati: “Ni mundu mubuya.” N’abandi bati: “Iyehe, akaheraya abandu.”
13 Nomo bine bitya, sihabya oyukamukanayako ahali abandu busana n’eryubaha Abayahudi.
14 Ekiro kikulu kyabere kyahika omo kati-kati, Yesu mwaya omo hekalu amatsuka erikangirirya.
15 Abayahudi mubasweka n’eribugha bati: “Omulume oyutaya omo kalasi* oyu, akatoka ati eriminya Amasako wo kutsibu atya?”
16 Yesu mwasubiryabo ati: “Ebyo ngakangiriraya si byaghe; nikwa ni by’oyo wanituma.
17 Omundu oyo wanzire erikola erisonda ry’oyo wanituma, akendiminya ebyo ngakangiriraya nga ni by’oMungu kutse nga ngayikangirira ebyo ngabugha.
18 Oyukayikangirira ebyo akabugha, akabya inyakasondaya olukengerwa lwiwe-lwiwe. Nikwa oyukasondaya olukengerwa lw’oyo wamutuma, ni w’ekwenene kandi syalimo ekitatunganene.
19 Musa mwatabaha Emighambo kwehi? Nikwa omw’inywe simuli n’oyukasikaya Emighambo. Neryo, busanaki mukasondekanaya erinyita?”
20 Abandu mubamusubirya bati: “Uliko embinga. Oyukasonda erikwita nindi?”
21 Yesu mwasubiryabo ati: “Mungakola omwatsi mughuma, inywe bosi mwamasweka.
22 Oko mwatsi oyu, Musa mwabaha omughambo w’eribania. Omughambo oyu syatsuka oko mughulu wa Musa; nikwa atsuka oko mughulu w’abotata-kulu. Mukabanaya omundu n’omo kiro ky’Esabato.
23 Omundu amabya inyakabanibawa omo kiro kye Sabato busana n’eriyikasa eritendiketa Emighambo ya Musa, ekikaleka imwanyihitanako kutsibu kundi mungalamaya omundu ekiro ky’Esabato niki?
24 Simubye mukatswera erikwamana n’ebyo mukalangira, nikwa mutswere omw’itswera eritunganene.”
25 Abaghuma b’oko bikalani be Yerusalema mubatsuka eribugha bati: “Oyu si yo mulume oyo banemusondekania eryita kwe?
26 Aliwe mulebaye! Anemukania embere sy’abandu, nikwa sibetamukolaki. Mbino abatabali babiriminya ndeke-ndeke ngoko oyu yo Kristo?
27 Omughulu Kristo akendisyasa, sihendisyabya oyukaminya ng’akasira hayi. Aliwe omulume oyu iye tunasi eyo akalua.”
28 Neryo Yesu inyanemukangirirya omo hekalu, mwabugha omo mulenge muli ati: “Munanyasi, kandi munasi eyo ngalua. Sinayituma eryasa, oyo wanituma aneho,* nenyu simumwasi.
29 Ninamwasi kusangwa niri mukwenda wiwe; naye yo wanituma.”
30 Neryo mubasonda erimuhamba; aliwe muhatabya oyukamuhirako ebyala, kusangwa endambi yiwe yabya isiyiriyahika.
31 Aliwe, abangyi b’oko bandu ababyaho mubamwikirirya. Mubabya bakabugha bati: “Omughulu Kristo akendisyasa, anemwendisyakola ebitiko-tiko ebilabire oko ebyo omulume oyu akakola kwehi?”
32 Abafarisayo mubowa abandu ibanemukania oko Yesu kw’emyatsi eyi. Neryo abahereri bakulu n’Abafarisayo, mubatuma abateya bati bayamuhambe.
33 Yesu mwabugha ati: “Ngenditasyabya nenyu katambi kake, embere nisube eyiri oyo wanituma.
34 Mukendisyanisondya-sondya, nikwa simwendisyanibana; n’aho ngendisyabya, simwangatoka erihikaho.”
35 Neryo Abayahudi mubabulania bati: “Omulume oyu akendisyaya hayi aho tute twangamubana? Si bughambu akendiya eyiri Abayahudi ababiriyitsatsanga omo biharo by’Abagiriki n’erikangirirya Abagiriki. Ko bite bitya?
36 Neryo akasonda eribugha atiki omughulu akabugha ati, ‘Mukendisyanisondya-sondya nikwa simwendisyanibana, n’aho ngendisyabya simwangatoka erihikaho’?”
37 Oko kiro ky’eribughirira, ekiro kinene ky’ekiro kikulu ekyo, Yesu mwahangana n’eribugha omo mulenge muli ati: “Oyukwire enyota ase okw’ingye, anywe.
38 Ngoko Amasako anabiribugha, oyukanikiriraya: ‘Esyonyusi sy’amaghetse w’engebe, sikendisyasenda erilua omw’iye.’”
39 Aliwe abugha atya, inyakahula ekirimu ekyo abakamwikiriraya babya ibakisigha ibahabwa. Oko mughulu oyo, babya isibalibahabwa ekirimu kusangwa Yesu abya isyalyahabwa olukengerwa lwiwe.
40 Abaghuma b’oko bandu ababyaho, abowa ebinywa ebi, mubabugha bati: “Kwenene oyu yo Muminyereri oyo wahulawa.”
41 Abandi mubabya bakabugha bati: “Oyu ni Kristo.” Nikwa abandi bati: “Kristo anganasira e Galilaya kwe?
42 Amasako akabugha ati Kristo akendisyasira omo lubuto lwa Daudi n’eributirwa e Betlehemu, omuyi wa Daudi. Ko bite bitya?”
43 Neryo muhabya erighabana omo kati-kati k’abandu busana naye.
44 Nikwa abandi ba kubo mubasonda erimuhamba; aliwe muhatabya n’omughuma oyo wamuhirako ebyala.
45 Neryo abateya mubasuba eyiri Abahereri bakulu n’Abafarisayo; nabo mubabulyabo bati: “Simwetamuleta busanaki?”
46 Abateya mubasubirya bati: “Sihehatabya omundu oyukabugha ng’omundu oyu.”
47 Abafarisayo mubasubirya bati: “Nenyu mwamabitebwa?
48 Oko batabali n’oko Bafarisayo, hane n’omughuma oyo wabirimwikirirya?
49 Nikwa abandu abatasi Emighambo aba, ni batakirwa!”
50 Omughuma w’oko Bafarisayo, ye Nikodemu oyo wabya inyabiriyasungana na Yesu, mwababwira ati:
51 “Emighambo yetu siyiriligha eritswera omundu ate ahulikirirwa n’eriminya ebyo akakola. Kobite bitya?”
52 Mubamusubirya bati: “Naghu uli we Galilaya kwehi? Uyakwese omo Masako, ukendilangira ngoko e Galilaya siyangalua omuminyereri.”
