Engulu mbuya eyahandikawa na Yohana 8:12-59
8 12 Neryo kandi Yesu mwabugha nabo ati: “Ingye, indi kyakakala ky’ekihugho. Oyukanikwama, syendisyalendera omo mwirimya n’ahake, nikwa akendisyabya n’ekyakakala ky’engebe.”
13 Neryo Abafarisayo mubamusubirya bati: “Ukayitulako omwatsi,* omwatsi waghu si w’ekwenene.”
14 Yesu mwasubiryabo ati: “Nomo nangabya ingayitulako omwatsi, omwatsi waghe ni w’ekwenene, kusangwa ninasi eyo nalua n’eyo ngaya. Aliwe inywe, simwasi eyo nalua n’eyo ngaya.
15 Inywe mukatswera erikwamana n’omubiri;* nikwa ingye sinditswera omundu wosi-wosi.
16 Kandi nibya nomo nangatswera, eritswera lyaghe ni ly’ekwenene; kusangwa sindi ingyuwene, Tata oyo wanituma ane haghuma naghe.
17 N’omo Mighambo yenyu kinahandikirwe kiti: ‘Eritulagho* ly’abandu babiri, ni kwenene.’
18 Ingye ngayitulako omwatsi; na Tata oyo wanituma, akateka obwimiri okw’ingye.”
19 Neryo mubamubulya bati: “Tata waghu ali hayi?” Yesu mwasubirya ati: “Simunyasi kandi simwasi na Tata waghe. Ko mulue munyasi, nga munasi na Tata waghe.”
20 Yesu mwabugha ebinywa ebi akakangirirya omo hekalu inyane ahakabikawa ebibo by’esyofranga. Nikwa muhatabya oyukamuhamba kusangwa endambi yiwe yabya isiyiriyahika.
21 Kandi Yesu mwabugha nabo ati: “Ngaghenda, nenyu mukendisyanisondya-sondya; aliwe nomo bine, mukendisyaholera omo rilolo ryenyu. Eyo ngaya, simwangatoka erihikayo.”
22 Abayahudi mubatsuka eribugha bati: “Akendiyita kwe? Kusangwa amabugha ati, ‘Eyo ngaya simwangatoka erihikayo.’”
23 Neryo mwasyabwirabo ati: “Inywe muli b’eyikwa; ingye indi w’endata. Muli b’ekihugho kino; nikwa ingye sindi w’ekihugho kino.
24 Kyo kiryaleka inababwira nyiti: Mukendisyaholera omo bibi byenyu. Kusangwa mwamatendikirirya ngoko ningye ye, imukendisyaholera omo bibi byenyu.”
25 Neryo mubamubulya bati: “Uli ndi kwe?” Yesu mwasubiryabo ati: “Kwe ngataheraya n’endambi yaghe yo busanaki ngakania nenyu!
26 Niwite emyatsi mingyi y’eribugha eyibalebirye n’emyatsi mingyi y’eritswera. Aliwe ahate eritika-tika, oyo wanituma ni w’ekwenene, n’emyatsi eyo ambwira yo ngatula omo kihugho.”
27 Mubataminya ngoko abya akahula Tata.
28 Neryo Yesu mwabugha ati: “Mukendisyabya mwasumbira Omughala w’omundu y’endata, mo mukendisyaminya ngoko ningye ye kandi ngoko sihali omwatsi ogho ngakola omw’iyikangirira lyaghe; nikwa ngabugha emyatsi eyi ngoko Tata ananikangirirayayo.
29 N’oyo wanituma ane haghuma naghe; mwatanyisigha ingyuwene, kusangwa ebiro byosi ngakola emyatsi eyikamutsemesaya.”
30 Omughulu abya akabugha emyatsi eyi, abandu bangyi mubamwikirirya.
31 Neryo kandi Yesu mwabwira Abayahudi abamwikiriraya ati: “Mwamabilola embere erikwama ebinywa byaghe, imuli bigha baghe kwenene,
32 kandi mukendisyaminya ekwenene, n’ekwenene ikendisyabaha obwiranda.”
33 Mubamusubirya bati: “Itwe tuli bana ba Abrahamu, situlitwatabya bakobe b’omundu wosi-wosi. Neryo ekikaleka iwabugha uti, ‘Mukendisyabya bwiranda niki’?”
34 Yesu mwasubiryabo ati: “Oko kwenene ngababwira, obuli mundu oyukakola erilolo, ni mukobe w’erilolo.
35 N’ekindi, omukobe syalisighala omo nyumba mo kera na kera; omughala yukasighalamo kera na kera.
36 Neryo Omughala amabibaha obwiranda, imukendibya bwiranda kwenene.
37 Ninasi ngoko muli bana ba Abrahamu. Nikwa mukasonda-sonda erinyita, kusangwa ekinywa kyaghe sikiwite omwanya omo mitima yenyu.
38 Ngabugha emyatsi eyo nalangira omughulu nabya na Tata waghe, nikwa inywe mukakola emyatsi eyo tata wenyu abiribabwira.”
39 Mubamusubirya bati: “Tata wetu ni Abrahamu.” Yesu mwabwirabo ati: “Ko mulue bana ba Abrahamu, nga munemukola emibiiri ya Abrahamu.
40 Nikwa mukasondekanaya erinyita ingye mundu ngababwira ekwenene eyo oMungu anyibwira. Abrahamu mwatakola ekiri ng’ekyo.
41 Mukakola emibiiri ya tata wenyu.” Mubamubwira bati: “Itwe situli bana b’obusingiri;* tuwite Tata mughuma, oMungu.”
42 Yesu mwabwirabo ati: “Ko mulue bana b’oMungu, nga munyanzire, kusangwa nahika hano ngalua ew’oMungu. Mundasa omo hamuli yaghe, nikwa iye yo wanituma.
43 Ekikaleka imutowa enzumwa y’ebyo ngabugha niki? Kusangwa simwangahulikirira ekinywa kyaghe.
44 Muli bana ba tata wenyu Diabolo, kandi esyongumbu sya tata wenyu syo mwanzire erikola. Mwabya mwiti omughulu atsuka, kandi mwatasighala omo kwenene, kusangwa syalimo ekwenene. Omughulu akabugha amabehi akabugha ebiwe-biwe, kusangwa ni mubehi kandi ni baba w’amabehi.
45 Aliwe ingye, kusangwa ngababwira ekwenene, simulinikiriraya.
46 Nindi okw’inywe yo wangabugha ati niri mukola-nabi? Namabibugha ekwenene, ekyangaleka imutanikirirya niki?
47 Omundu w’oMungu akahulikirira ebinywa by’oMungu. Simuli bandu b’oMungu, ekyo kyo kikaleka imutahulikirira.”
48 Abayahudi mubamubwira bati: “Situsingene kwehi eribugha tuti, ‘Uli Musamaria kandi uliko embinga’?”
49 Yesu mwasubirya ati: “Sindiko embinga, nikwa ngasikaya Baba waghe, nenyu mukanihemulikanaya.
50 Aliwe ingye sindiyisonderaya olukengerwa; hali oyukanyisonderayalo naye yo mutsweri.
51 Kwenene-kwenene ngababwira, omundu amabikwama ebinywa byaghe, isyendisyalola oko luholo n’ahake.”
52 Abayahudi mubamubwira bati: “Ibwa twamabiminya ngoko uliko embinga. Abrahamu mwahola, n’abaminyereri kutya, nikwa iwe ukabugha uti, ‘Omundu amabikwama ebinywa byaghe isyendisyalola oko luholo n’ahake.’
53 Tata wetu Abrahamu mwahola, uli mukulu okw’iye kwehi? N’abaminyereri mubahola. Iwe ulindi?”
54 Yesu mwasubirya ati: “Namabiyipipa, eriyipipa ryaghe ini buyira. Tata waghe yukanipipa, oyo mukabugha muti ni Mungu wenyu.
55 Kandi inywe simulimwamuminya, nikwa ingye ninamwasi. Kandi namabibugha niti sinimwasi, inamabya mubehi nga nywe. Aliwe ninamwasi kandi nandimusikya ekinywa kiwe.
56 Tata wenyu Abrahamu abya akalindirira n’obutseme erisyalola oko kiro kyaghe; mwalola kukyo, mwatsema.”
57 Neryo Abayahudi mubamubwira bati: “Iwe utewayira n’emyaka 50 uti muwalola oko Abrahamu?”
58 Yesu mwababwira ati: “Kwenene ngababwira, embere Abrahamu abutawe, ingye nabya inine.”
59 Neryo mubatola amabwe bati bakamughusa w’oko; nikwa Yesu mwayibisa n’erilua omo hekalu.
Amaelezo awehikwa
^ Kinywa kwa kinywa, “ukayitekako obwimiri.”
^ Kutse “erikwamana n’erilangirika ly’ehihya, erikwamana n’amalengekania w’abandu.”
^ Kinywa kwa kinywa, “obwimiri.”
^ Omo Kigiriki ni por·nei′a. Ulebaye amaana w’ebinywa.
