Engulu mbuya eyahandikawa na Yohana 9:1-41
9 Yesu inyanemulaba, mwalangira omulume oyo wabutawa ini ndimetime.
2 Neryo abigha biwe mubamubulya bati: “Rabi!* Omulume oyu eributwa mo ndimetime, oyo wakola erilolo nindi, niye kutse ba babuti biwe?”
3 Yesu mwasubirya ati: “Oko mulume oyu n’oko babuti biwe sihali oyo wakola erilolo, aliwe abutawa mo ndimetime emibiiri y’oMungu itoke erilangirika erilabira omwatsi wiwe.
4 Litolere itwakola emibiiri y’oyo wanituma ibukinakere; obutuku bukendyira neryo ihabya isihakiri omundu oyo wangakola emibiiri.
5 Niri kyakakala ky’ekihugho omughulu nikine omo kihugho.”
6 Mwabya abibugha emyatsi eyi, mwatwira amatandi w’ahisi, amatsumba olondo omo matandi ayo n’erihakalo oko meso w’omulume oyo.
7 Mwamubwira ati: “Ughende uyanabe oko kiriba* kye Siloamu” (kyabibindulwa, ni bugha ambu “Eritumwa”). Neryo mwaghenda amanaba, amasubula inyabirilangira ndeke.
8 Neryo abahimbani biwe n’abandu ababya bakamulangira embere akasaba-saba, mubabya bakabugha bati: “Oyu si y’omulume oyo wabya akikala akasabirirya kwehi?”
9 Abandi mubabya bakabugha bati: “Niye.” N’abandi bati: “Iyehe, aliwe amusosire.” N’omulume oyo mwabya akabugha ati: “Ningye.”
10 Neryo mubamubulya bati: “Neryo ameso waghu mwakalibukala ati?”
11 Mwasubirya ati: “Omulume oyukahulawa mo Yesu mwakatsumba olondo amahakalo oko meso waghe n’erinibwira ati, ‘Ughende e Siloamu uyanabe.’ Mungaghenda, namanaba neryo namatsuka erilangira.”
12 Neryo mubamubulya bati: “Omulume oyo ali hayi?” Mwasubirya ati: “Sinyasi.”
13 Neryo mubatwala omulume oyulue ndimetime oyo eyiri Abafarisayo.
14 Ekiro Yesu atsumba olondo n’erilibula ameso w’omulume oyo, kwesi kyabya ini kiro ky’Esabato.
15 Neryo Abafarisayo nabo mubatsuka eribulirirya omulume oyo ng’alyatoka ati erilangira. Naye mwabwirabo ati: “Mwakahira olondo l’oko meso waghe namayanaba, neryo ko nandimulangira nitya.”
16 Abafarisayo balebe mubabugha bati: “Oyo si mundu w’oMungu kusangwa syalisikaya Esabato.” N’abandi bati: “Omundu oyute w’oMungu angatoka ati erikola ebitiko-tiko ebiri ng’ebi?” Neryo muhabya erighabana omo kati-kati kabo.
17 Kandi mubabulya omulume oyulue ndimetime oyo bati: “Naghu ukamubughako utiki ino, kundi ameso waghu w’alyalibula?” Omulume oyo mwabugha ati: “Ni muminyereri.”
18 Aliwe Abayahudi mubatikirirya ngoko omulume oyo alue ndimetime neryo abiritsuka erilangira erihika omughulu babirikira ababuti biwe.
19 Neryo mubabulyabo bati: “Oyu yo n’omwana wenyu oyo mukabugha muti abutawa mo ndimetime? Ikwa lino, akatoka ati erilangira?”
20 Ababuti biwe mubasubirya bati: “Tunasi ngoko oyu ni mwana wetu kandi ngoko abutawa mo ndimetime.
21 Aliwe sitwasi ng’akatoka ati erilangira lino; kandi sitwasi oyulyalibula ameso wiwe nga nindi. Mumubulaye. Ni mundu mukulu. Litolere inyayibughira iyuwene-wene.”
22 Ababuti biwe mubabugha batya busana n’eryubaha Abayahudi. Kusangwa Abayahudi babya ibabirilighirana bati omundu amabiligha ati Yesu ni Kristo, inyahiwa omo sinagogi.*
23 Ekyo kyo kyaleka ababuti biwe ibabugha bati: “Ni mundu mukulu. Mumubulaye.”
24 Neryo engendo y’akabiri mubabirikira omulume oyulue ndimetime, bamamubwira bati: “Upipe oMungu; itwe tunasi ngoko omulume oyo ni mukola-nabi.”
25 Mwasubirya ati: “Abye ini mukola-nabi, ingye sinyasi ebyo. Ekyo nyasi, nilue ndimetime, aliwe lino nirimulangira.”
26 Neryo mubamubulya bati: “Mubikaghenda biti? Mwakalibula ameso waghu w’ati?”
27 Mwasubiryabo ati: “Nabiribabwira, nikwa simwetahulikirira. Mukatasyanibulaya busanaki? Nenyu, munanzire eribya bigha biwe?”
28 Neryo mubamutsamba bati: “Niwe mwigha w’omulume oyo, itwe tuli bigha ba Musa.
29 Tunasi ngoko oMungu mwabugha na Musa, aliwe omulume oyu iye, sitwasi ngalua hayi.”
30 Omulume oyo mwasubiryabo ati: “Oyu ni mwatsi w’eriswekya! Omulume oyunalyalibula ameso waghe, muti simwasi ngalua hayi!
31 Tunasi ngoko oMungu syalihulikirira abakola-nabi, nikwa akahulikirira oyukamukenga n’erikola erisonda liwe.
32 Erilua kera, sihehatowibwa omundu oyo walibula ameso w’omundu oyo wabutawa mo ndimetime.
33 Omulume oyu kw’atalue mundu w’oMungu, syangatokire erikola ekyosi-kyosi.”
34 Mubamusubirya bati: “Iwe wosi wabutawa omo bibi, nikwa lino uti ukatukangiriraya?” Neryo mubamughusa ehihya!
35 Yesu mwowa ngoko mubakamughusa ehihya. Neryo abere amusunga, mwamubulya ati: “Wanabirikirirya Omughala w’omundu?”
36 Omulume oyo mwasubirya ati: “Mukama, naye yo wahi, nyitoke erimwikirirya?”
37 Yesu mwamusubirya ati: “Wabirimulolako, n’oko kwenene, yo yukabugha naghu ono.”
38 Mwabugha ati: “Namamwikirirya Mukama.” Neryo mwamunamira.
39 Neryo Yesu mwabugha ati: “Eritswera eri ryo lyaleka inasa omo kihugho kino: abatelangira batoke erilangira, n’abakalangira babye ndimetime.”
40 Abaghuma b’oko Bafarisayo ababya naye mubowa ebinywa ebi. Neryo mubamubulya bati: “Netu, tuli ndimetime kwehi?”
41 Yesu mwasubiryabo ati: “Ko mulue ndimetime, nga simuliko rilolo. Nikwa lino mukabugha muti, ‘Tukalangira.’ Mukendisighalako amalolo wenyu.”
