Yosua 1:1-18
1 Omughombe wa Yehova ye Musa abere abihola, Yehova mwabugha na Yosua* omughala wa Nuni, omuwatikya wa Musa ati:
2 “Omughombe waghe Musa abirihola. Neryo lino uhangane, usoke olusi lwe Yordani, iwe haghuma n’abandu bosi aba, abana ba Israeli; ughende omo kihugho ekyo ngahabo.
3 Ahosi aho ebisando byenyu bikendilyata ngendibahaho ngoko nanabya inabirilagha Musa.
4 Ekiharo kyenyu kikendisyatsuka oko mbwarara erihika e Lebanoni n’erihika oko lusi lunene olwe Efrati—ekihugho kyosi ky’Abahiti—n’erihika oko Ngetse Nene* oko luhande lw’eyo eryuba rikalengera.
5 Omw’ibyaho ryaghu ryosi sihali omundu wosi-wosi oyukendisyakukinda ngoko nanabya haghuma na Musa, naghu ko ngendibya haghuma naghu nitya, sinendisyakusigha butsira erikuwatikya, kandi sinendisyakulekerania n’ahake.
6 Ubye mutubaha kandi ubye n’akaghala kusangwa niwe ukendiwatikya abandu aba erisighalya ekihugho ekyo nalapira abotata-kulu wabo ngoko ngendisyabahakyo.
7 “Ekighuma kisa, ubye mutubaha kandi usike, kandi ukwame ndeke-ndeke Emighambo yosi eyo omughombe waghe Musa akuhana. Isiwakita kuyo oko byala by’amali kutse eby’amalembe utoke erikola n’amenge ahosi aho ukaya.
8 Ekitabu ky’Emighambo eki isikyalua omo buno bwaghu. Litolere iwabya ukasomakyo n’erilengekania kukyo ko buli* omo musibo n’omo kiro utoke erikwama ndeke ebyosi ebihandikire mukyo. Wamabikola utya, emyatsi iyikendikughendera ndeke kandi ighukendikola n’amenge.
9 Sinditakuhana kwehi? Ubye mutubaha kandi usike, isiwatitimana kutse eryubaha. Kusangwa Yehova oMungu waghu ane haghuma naghu ehosi-hosi eyo ukaya.”
10 Neryo Yosua mwabwira abakulu b’abandu ati:
11 “Mulabe omo kambi yosi. Mubwire abandu muti, ‘Muteghekanaye endanda. Kusangwa hakisiya biro bisatu imwasoka e Yordani eriingira n’eriimya ekihugho ekyo Yehova oMungu wenyu akendibaha.’”
12 Kandi Yosua mwabwira Abarubeni, Abagadi, n’enusu y’ekihanda kya Manase ati:
13 “Mwibuke ebyo omughombe wa Yehova ye Musa abahana. Yehova oMungu wenyu akabaha eriluhuka kandi abiribaha ekihugho eki.
14 Abakali benyu, abana benyu, n’ebihangulo byenyu, bakendiikala omo kihugho ekyo Musa abiribaha oko lundi luhande* luno lwe Yordani. Aliwe inywe, abalwi bosi b’amaka mukendisoka imunayiteghekire oko malwa, embere sy’abaghala benyu. Litolere imwawatikyabo
15 erihika omughulu Yehova akendisyaha abaghala benyu eriluhuka ngoko abiribaharyo, nabo batoke eriimya ekihugho ekyo Yehova oMungu wenyu akendibaha. Enyuma sy’aho mukendisyasuba omo kiharo ekyo mwabirihabwa eriikala mukyo. Mukendisyasuba omo kiharo ekyo omughombe wa Yehova ye Musa abaha oko luhande lw’eyo eryuba rikasira lwe Yordani.
16 Mubasubirya Yosua bati: “Ebyosi ebyo wabirituhana tukendikolabyo, kandi ehosi eyo ukenditutuma tukendiyayo.
17 Ngoko twanabya tukowa ebyosi ebyo Musa abya akabugha, naghu ko tunemwendibya tukakwowa tutya. Ekighuma kisa, Yehova oMungu waghu abye naghu ngoko anabya haghuma na Musa.
18 Omundu wosi-wosi oyukendisyayisamambula oko ebyo ukabugha, n’oyukendisyaghana erikwama ebyo ukamuhana akendisyitwa. Ekighuma kisa, ubye mutubaha kandi usike.”
Amaelezo awehikwa
^ Kutse “Yehoshua.” Likamaanisaya Yehova ni Mulamo.
^ Ni bugha ambu, “engetse ye Mediterania.”
^ Kutse, “erisoma omo mulenge w’ahisi.”
^ Ni bugha ambu, oluhande lw’eyo eryuba rikasira.
