Yosua 11:1-23
11 Yabini omwami we Hazori mwabya abinowa omwatsi oyo, mwalw’inialayira oko Yobabu omwami we Madoni, n’oko mwami we Shimroni, omwami we Akshafa,
2 abami b’omo kihugho ky’ebitwa ky’oluhande lw’endata, abali omw’ibanda* oko luhande lw’eyikwa lwe Kinereti, ab’omo Shefela n’oko hitwa hye Dori oko luhande olukalengerako eryuba,
3 Abakanana oko luhande lw’eyo eryuba rikasira n’eyo likalengera, Abaamori, Abahiti, Abaperizi, Abayebusi ab’omo kihugho ky’ebitwa, n’Abahivi eyikwa oko Hermoni omo kihugho kye Mizpa.
4 Neryo mubasa n’abasuda babo bosi. Babya bangyi kutsibu ng’emiseghe y’oko musike w’engetse. Kandi babya n’esyosabayiri nyingyi n’esyongurubani* nyingyi sy’amalwa.
5 Abami bosi aba mubahindana haghuma, bamasa n’erihira ekambi yo haghuma ahali amaghetse we Meromu bakasyalwa ne Israeli.
6 Neryo Yehova mwabugha na Yosua ati: “Sighubahebo, kusangwa omungya oko ndambi eno ngendisyahira abosi omo byala by’Abaisraeli, ibitabo. Mukendisyatwa emisisa y’amaghulu w’esyosabayiri syabo n’eritimya omo muliro esyoangurubani* syabo sy’amalwa.”
7 Neryo Yosua n’abalume biwe bosi b’amalwa mubalimbyabo, bamalwa nabo kitsumbukirania ahali amaghetse we Meromu.
8 Yehova mwahirabo omo byala by’Abaisraeli. Mubakindabo n’erikwamirirabo eribahikya e Sidoni Nene ne Misrefo-timaimu n’oko Musya we Mizpe oko luhande lw’eyo eryuba rikasira. Mubitabo, muhatasaka n’omughuma.
9 Neryo Yosua mwakolabo ngoko Yehova anabya iniabirimubwira. Mwatwa emisisa y’amaghulu w’esyosabayiri syabo n’eritimya omo muliro esyongurubani* syabo sy’amalwa.
10 N’enyuma sy’aho Yosua mwasubula amahamba e Hazori n’eriita omwami wayo omo muyali, kusangwa embere e Hazori w’abya muyi mukulu w’amami wosi aya.
11 Mubita omo muyali obuli mundu oyo wabyayo, bamaheryabo. Muhatasighala n’ekindu n’ekighuma ekikahumula. Neryo mwatimya omo muliro e Hazori.
12 Yosua mwahamba emiyi yosi y’abami aba n’erikinda abami babo omo muyali. Mwaheryabo ngoko Musa omughombe wa Yehova anabya iniabirilayira.
13 Aliwe Abasiareli mubatatimya n’omuyi n’omughuma owabya oko hitwa erilusyako owe Hazori; omuyi oyo musa wo Yosua atimaya omo muliro.
14 Ebindu byosi n’ebihangulo ebyo banyegha omo miyi eyo, Abaisraeli mubayighabirabyo, aliwe mubita obuli mundu omo muyali; butsira eribalya omundu n’omughuma. Mubatasigha n’omundu n’omughuma oyukahumula.
15 Ngoko Yehova analayira Musa omughombe wiwe, Musa naye mwalayira Yosua, na Yosua naye mwakola atya. Ebyosi ebyo Yehova abya iniabirilayira Musa, Yosua mwatasighako n’ekighuma.
16 Yosua mwakinda ekihugho kyosi eki, ekihugho ky’ebitwa, e Negebu yosi, ekihugho kyosi kye Gosheni, Eshefela, e Araba, n’ekihugho ky’ebitwa kye Israeli n’Eshefela* yayo,
17 erilua oko Kitwa kye Halaki ekihetukire erihika e Seiri, n’erihika e Baal-gadi omo Musya we Lebanoni, oko ndina y’Ekitwa kye Hermoni, kandi mwahamba abami bayo bosi, amakindabo n’eriitabo.
18 Yosua mwalwa n’abami bosi aba oko mughulu muli.
19 Muhatabya omuyi n’omughuma owakola obuholo n’Abaisraeli erilusyako Abahivi ababya bikere e Gibeoni. Eyindi miyi yosi mubakindayo omo malwa.
20 Yehova yo wanakalaya emitima y’ebihanda ebyo, neryo byamalwa n’Abaisareli atoke eriheryabo butsira bughanyiri. Babya b’eritoghotibwa ngoko Yehova anabya iniabirilayira Musa.
21 Oko mughulu oyo, Yosua mwabirya Abaanakimu erilua omo kihuhgo ky’ebitwa eritsuka Hebroni, Debiri, Anabu, n’ekihugho kyosi ky’ebitwa kye Yuda n’ekihugho kyosi ky’ebitwa kye Israeli. Yosua mwaheryabo n’emiyi yabo.
22 Omo Israeli mumutasighala Omuanakimu n’omughuma; mubasighala e Gaza hasa, e Gati, ne Heshdodi.
23 Neryo Yosua mwimya ekihugho kyosi ngoko Yehova anabya iniabirilagha Musa. Yosua mwahakyo Abaisraeli mo mwandu erighabanakyo ngoko babya baghabene omo bihanda byabo. N’ekihugho mukyaluhuka oko malwa.
Amaelezo awehikwa
^ Kutse “Araba.”
^ Kutse “emitoka eyikakurawa; esyosyaryo.”
^ Kutse “emitoka eyikakurawa; esyosyaryo.”
^ Kutse “emitoka eyikakurawa; esyosyaryo.”
^ Kutse “ehitwa hyayo hikuhi-hikuhi.”
