Yosua 13:1-33
13 Yosua abya iniamabikula kutsibu n’eribya musaykulu. Neryo Yehova mwamubwira ati: “Wamabibya musyakulu kandi wamabiyira emyaka mingyi; aliwe omo kihugho mukine ebiharo bingyi ebitebyahambwa.*
2 Ekitaka ekite kyimibwa kya kino: Ebiharo byosi by’Abafilistini n’ebiharo byosi by’Abageshuri
3 (eritsuka oko mutahula w’olusi lwe Nile,* ni bugha ambu oko luhande lw’eyo eryuba rikasira lwe Misri* erihika oko mupaka we Ekroni oko luhande lw’endata, ekyabya kikaghanzwa mo kihugho ky’Abakanana) erihirako n’eky’abakama batano b’Abafilistini, Abagaza, Abaashdodi, Abaashkeloni, Abagiti, n’Abaekroni; eky’Abaavi
4 oko luhande lw’eyikwa; ekihugho kyosi ky’Abakanana; Meara y’Abasidoni, erihika e Afeki, oko mupaka w’Abaamori;
5 ekihugho ky’Abagebali n’ekihuhgo kyosi kye Lebanoni erilolera oko luhande lw’eyo eryuba rikasira, eritsuka oko Baal-gadi oko ndina y’Ekitwa kye Hermoni erihika e Lebo-hamati;*
6 esyondulani syosi sy’omo kihugho ky’ebitwa eritsuka e Lebanoni erihika Misrefoti-maimu; n’Abasidoni bosi. Ngendisyahighabo* erilua embere sy’Abaisraeli. Iwe ekyo utolere iwakola, ry’erihakyo Abaisraeli mo mwandu, ngoko nabirikuhana.
7 Neryo ughabire ekihugho eki mo mwandu ebihanda 9 n’enusu y’ekihanda kya Manase.
8 Eyindi nusu y’ekihanda ky’Abamanase, Abarubeni, n’Abagadi mubimya omwandu wabo ogho Musa ahabo oko luhande lw’eyo eryuba rikasira lwe Yordani, ngoko Musa omughombe wa Yehova anaghabagho:
9 eritsuka e Aroeri, eyiri oko musike w’Omusya we Arnoni,* n’omuyi owali omo kati-kati k’Omusya, n’obwerere* bwosi bwe Medeba erihika e Diboni;
10 n’emiyi yosi ey’omwami w’Abaamori ye Sihoni oyo watabala e Heshboni erihika oko mupaka w’Abaamoni;
11 ne Gileadi n’ekiharo ky’Abageshuri n’Abamaakati n’Ekitwa kyosi kye Hermoni ne Bashani yosi erihika e Seleka;
12 obwami bwosi bwa Ogi e Bashani, oyo watabala e Ashtaroti ne Edrei. (Yo wabya w’omwiso oko Barefaimu.) Musa mwakindabo n’erihighabo.*
13 Nikwa Abaisraeli mubatahigha* Abageshuri n’Abamaakati, kusangwa Geshuri n’Amaakati banikere n’Abaisraeli erihika na munabwire.
14 Ekihanda ky’Abalawi kisa kyo ataha omwandu. Amahere awakahisibwa omo muliro awakahererawa Yehova oMungu wa Israeli wo mwandu wabo ngoko analaghabo.
15 Neryo Musa mwaha ekihanda ky’Abarubeni omwandu erikwamana n’ebitunga byabo.
16 Omupaka w’ekiharo kyabo abya atsukire e Aroeri eyiri oko musike w’Omusya we Arnoni,* n’omuyi owali omo kati-kati k’omusya, obwerere bwosi bwe Medeba;
17 e Hesboni n’emiyi yayo yosi eyiri omo bwerere, e Diboni, e Bamoti-baali, Bete-baali-meoni,
18 Yahazi, Kedemoti, Mefati,
19 Kiriataimu, Sibma, ne Zereti-sahari oko kitwa ky’omo musya.*
20 Bete-peori, amandaghala we Pisaga, Bete-yeshimoti,
21 emiyi yosi y’omo bwerere, n’obwami bwosi bw’Omwami Sihoni w’Abaamori oyo watabala e Heshboni. Musa mwamukinda, amakinda n’abakulu b’Abamidiani ye Evi, Rekemu, Zuri, Huri, na Reba, abasoki* ba Sihoni ababya bikere omo kihuhgo ekyo.
22 Abaisraeli mubita omulaghuli ye Balaamu mughala wa Beori, omo muyali haghuma n’abandi abitawa.
23 E Yordani w’abya mupaka w’Abarubeni; kandi ekiharo eki haghuma n’emiyi, n’ehiyi hyayo, kyo Abarubeni bahabawa mo mwandu erikwamana n’ebitunga byabo.
24 Enyuma sy’aho Musa mwaghabira ekihanda kya Gadi ky’omwandu, Abagadi erikwamana n’ebitunga byabo.
25 Ekiharo kyabo kyabyamo e Yazeri n’emiyi yosi ye Gileadi n’enusu y’ekihugho ky’Abaamoni erihika Aroeri eyitungererene ne Raba;
26 n’eritsuka e Heshboni erihika e Ramati-mispe ne Betonimu, n’eritsuka e Mahanaimu erihika oko mupaka we Debiri;
27 n’omo musya,* Bete-harani, Bete-nimra, Sukoti ne Zafoni, n’ekihande ekyasaka oko bwami bw’Omwami Sihoni we Heshboni, ne Yordani w’abya mupaka eritsuka oko nduli-nduli sy’omusike w’Engetse ye Kinereti* oko luhande lw’eyo eryuba rikasira lwe Yodani.
28 Oyu wo mwandu w’Abagadi erikwamana n’ebitunga byabo haghuma n’emiyi n’ehiyi hyayo.
29 Enyuma w’aho, Musa mwaha enusu y’ekihanda kya Manase omwandu, enusu y’ekihanda kya Manase erikwamana n’ebitunga byabo.
30 Ekiharo kyabo kyabya kitsukire e Mahanaimu, ikimya ne Bashani yosi, obwami bwosi bw’Omwami Ogi we Bashani n’ehilongo hyosi hy’amahema hye Yairi ehye Bashani, emiyi 60.
31 N’enusu ye Gileadi erihirako ne Ashtaroti ne Edrei, emiyi y’obwami ya Ogi e Bashani, mukyabya ky’abaghala ba Makiri mughala wa Manase. Mukyahabwa enusu y’abaghala ba Makiri erikwamana n’ebitunga byabo.
32 Eyi ye myandu eyo Musa aghabirabo omo bwerere bwe Moabu obuli oko ghundi musirya we Yordani oko luhande lw’eyo eryuba rikasira lwe Yeriko.
33 Nikwa Musa mwataha ekihanda ky’Abalawi ky’omwandu. Yehova oMungu wa Israeli yo mwandu wakyo, ngoko analaghabo.
Amaelezo awehikwa
^ Kutse “erikindwa.”
^ Kutse “eritsuka e Sihori.”
^ Kinywa kwa kinywa, “embere sye Misri.”
^ Kutse “obwingiriro bwe Hamati.”
^ Kutse “ngendisyalusyabo.”
^ Kutse “omusya we Arnoni owakumamo amaghetse oko mughulu w’omwisi; ekisanga.”
^ Kutse “obulambo.”
^ Kutse “mwimurabo.”
^ Kutse “mubatimura.”
^ Kutse “omusya we Arnoni owakumamo amagetse oko mughulu w’omwisi; ekisanga.”
^ Kutse “omw’ibanda.”
^ Ni bugha ambu, abami ababya bakaletera Sihoni y’engemo.
^ Kutse “eribanda.”
^ Ni bugha ambu, Engetse ye Genazareti, kutse Engetse ye Galilaya.
