Yosua 14:1-15
14 Ebi bye biharo ebyo Abaisraeli bimaya mo mwandu omo kihugho kye Kanana, ebyo Eleazari omuhereri na Yosua mughala wa Nuni n’abakulu b’ebitunga by’abotata w’ebihanda by’Abaisraeli baghabirabo.
2 Mubakola obukanga erighabira ebihanda 9 n’enusu omwandu erikwamana n’ebyo Yehova abugha erilabira Musa.
3 Musa abya iniabirighabira ebihanda bibiri n’enusu by’omwandu oko ghundi musirya* we Yordani. Nikwa Abalawi mwatahabo omwandu omo kati-kati kabo.
4 Abana ba Yozefu ibakaghanzawa mo bihanda bibiri; Manase na Efraimu. Nikwa Abalawi mubatahabwa omwandu omo kihugho. Ebyo bahabawa bisa y’emiyi y’eriikalamo n’obulisiryo bwayo busana n’ebihangulo byabo n’ebindu byabo.
5 Neryo Abaisareli mubaghaba ekihugho ngoko Yehova analayira Musa.
6 Neryo abalume b’omo kihanda kya Yuda mubasa eyiri Yosua e Gilgali, na Kalebu mughala wa Yefune, Omukenizi mwamubwira ati: “Unasi ndeke-ndeke ebyo Yehova abwira Musa omundu w’oMungu w’ekwenene busana naghe naghu, e Kadeshi-barnea.
7 Nabya n’emyaka 40 omughulu Musa omughombe wa Yehova anituma erilua e Kadeshi-barnea eriyapelelezya ekihugho.* Nabere nasubula, munamubwira kwenene-kwenene* ebyo nalangira.
8 Nomo abaghala betu abaghenda haghuma naghe banapapukaya* emitima y’abandu, ingye munakwama Yehova oMungu waghe n’omutima wosi.*
9 Ekiro ekyo Musa mwalahirya ati: ‘Ekihugho ekyo ekisando kyaghu kiryalabamo kikendisyabya mwandu waghu n’abana baghu mughulu wosi, kusangwa wabirikwama Yehova oMungu waghe n’omutima wosi.’
10 Ngoko analagha, Yehova abiriniteya omo myaka 45 eyi eritsuka omughulu Yehova alagha Musa omwatsi oyo, Abaisraeli ibane omo mbwarara. Y’ono nikineho, lino niwite emyaka 85.
11 Na lino nikinawite amaka ng’omughulu Musa anituma. Akaghala kaghe kakine ngoko kanabya oko mughulu oyo; nanganalwa n’erikola eyindi mibiiri.
12 Neryo umbe ekihugho ky’ebitwa eki, ngoko Yehova analagha ekiro ekyo. Nomo nanowa ekiro ekyo ngoko yikere Abaanakimu kandi abikere omo miyi eyikongotere, ahate eritika-tika* Yehova akendibya haghuma naghe, ngendihighabo* ngoko Yehova analagha.”
13 Neryo Yosua mwatsumula Kalebu omughala wa Yefune n’erimuha e Hebroni mo mwandu.
14 Busana n’ekyo e Hebroni ni mwandu wa Kalebu omughala wa Yefune Omukenezi erihika na munabwire, kusangwa mwakwama Yehova oMungu wa Israeli n’omutima wosi.
15 Kera e Hebroni yabya ikahulwa mo Kiriati-arba (Arba abya mulume mukulu omo Baanakimu.) N’ekihugho mukyaluhuka oko malwa
Amaelezo awehikwa
^ Ni bugha ambu, oluhande lw’eyo eryuba rikasira.
^ Kutse “eriyalinga.”
^ Kinywa kwa kinywa, “munabugha ekinywa ngoko kyanabya omo mutima.”
^ Kiywa kwa kinywa, “mubayeyukya emitima y’abandu.”
^ Kinywa kwa kinywa, “kutsibu; ndeke-ndeke”
^ Kutse “mbino.”
^ Kutse “ngendyimurabo.”
