Yosua 15:1-63
15 Ekihugho ekyahabawa* ekihanda kya Yuda erikwamana n’ebitunga byabo kyabya kitsukire oko mupaka we Edomu, embwarara ye Zini, n’erilolera e Negebu oko mukeketyo wayo oko luhande lw’eyikwa.
2 Omupaka wakyo oko luhande lw’eyikwa abya atsukire oko nduli-nduli y’Engetse y’Omunyu* erilua oko kalimi-limi k’engetse akalolere oko luhande lw’eyikwa.
3 Kandi omupaka oyo abya alolere oko luhande lw’eyikwa erilolera oko bweruka bwe Akrabimu, n’erilaba erihika e Zini, n’erihetuka erilua oko luhande lw’eyikwa, erilolera e Kadeshi-barnea, erihika e Hezroni, iniahetukira e Adari, n’eritimba erihika e Karka.
4 Neryo abya alabire ebwanga e Asimoni, erilolera oko Musya* we Misri owakumamo amaghetse, n’omupaka oyo abya atwirirye oko Ngetse.* Oyu w’abya mupaka wabo oko luhande lw’eyikwa.
5 Engetse y’Omunyu* yo yabya mupaka w’oko luhande lw’eyo eryuba rikasira erihika aho olusi lwe Yordani lwingirire omo ngetse. Omupaka w’oko ngonde y’oko mupaka w’endata abya oko kalimi-limi k’engetse aho olusi lwe Yordani lwingirire omo ngetse.
6 Omupaka abya irukire ebwanga e Bete-hogla n’erilaba oko luhande lw’endata lwe Bete-araba, kandi iniahetukire erihika oko ribwe rya Bohani mughala wa Rubeni.
7 Omupaka abya ahetukire erihika e Debiri omo Musya* we Akori, n’eritimba oko luhande lw’endata, erihika e Gilgali embere sy’obweruka bwe Adumimu eyiri oko luhande lw’eyikwa lw’omusya owakumamo amaghetse, kandi omupaka oyo abya alabire oko maghetse we En-shemeshi, n’eritwirya e En-rogeli.
8 Omupaka abya ahetukire erihika oko Musya wa Mughala wa Hinomu erihika oko bwandaghala bw’Omuyebusi oko luhande lw’eyikwa, ni bugha ambu e Yerusalema. Oko luhande lw’eyo eryuba rikalengera, abya ahetukire oko singyi eyisamalirene n’Omusya wa Hinomu owali oko nduli-nduli y’Omusya wa Refaimu* oko luhande lw’endata.
9 Omupaka mwatulwa erilua oko singyi y’ekitwa erihika oko nunga y’amaghetse we Neftoa kandi mwaghenda erihika oko miyi y’Ekitwa kye Efroni, n’omupaka oyo mwatulwa erihika e Baala, ni bugha ambu e Kiriati-yearimu.
10 Omupaka abya atimbire erilua e Baala erilolera oko luhande lw’eyo eryuba likalengera erihika oko Kitwa kye Seiri, inialaba oko bwandaghala bw’Ekitwa kye Yearimu oko luhande lw’endata, ni bugha ambu e Kesaloni, kandi abya andaghere e Bete-shemeshi inialabira hakuhi ne Timna.
11 Neryo omupaka oyo mwaghenda erihika oko bwandaghala bwe Ekroni erihika oko luhande lw’endata, omupaka oyo mwalaba e Shikeroni amasoka erihika oko Kitwa kye Baala, n’erilaba erihika e Yabnieli, n’eriyatwirya oko ngetse.
12 Omupaka w’oko luhande lw’eyo eryuba likalengera abya Engetse Nene* n’omusike wayo. Eyo yo yabya mipaka y’ekiharo ky’ekihanda kya Yuda oko mbande syosi, ekiharo ekyahabawa ebitunga byabo byosi.
13 Erikwamana n’ebyo Yehova abugha, Yosua mwaha Kalebu y’erighabo omo kati-kati k’abana ba Yuda; mwamuha e Kiriati-arba (Arba abya baba wa Anaki), ni bugha ambu e Hebroni.
14 Neryo Kalebu mwahighayo abaghala basatu ba Anaki: Sheshai, Ahimani, na Talmai, abana ba Anaki.
15 Neryo mwayalwa n’abikalani be Debiri (kera e Debiri iyikahulawa mo Kiriati-seferi.)
16 Neryo Kalebu mwabugha ati: “Omulume oyukendisyakinda e Kiriati-seferi n’erihambayo ngendisyamuha mwali waghe ye Aksa, iniabya mukali wiwe.”
17 Otnieli mughala wa Kenazi omughala wabo Kalebu, mwahamba omuyi oyo. Neryo Kalebu mwamuha mwali wiwe ye Aksa eribya mukali wiwe.
18 Aksa inianemughenda ew’iba wiwe, mwabwira iba wiwe ye Otnieli ati asabe baba wiwe ye Kalebu eririma. Neryo Aksa mwakima oko punda yiwe. Kalebu mwamubulya ati: “Ukasondaki?”
19 Mwamusubirya ati: “Kisi unitsumule, kusangwa wabirimba ekitaka oko luhande lw’eyikwa;* utasyamba ne Guloti-maimu.”* Neryo mwamuha e Guloti y’Endata ne Guloti y’Eyikwa.
20 Oyu w’abya mwandu w’ekihanda kya Yuda erikwamana n’ebitunga byabo.
21 Emiyi eyabya oko musike w’ekihanda kya Yuda erilua oko mipaka ye Edomu oko luhande lw’eyikwa yabya: Kabzeeli, Ederi, Yaguri,
22 Kina, Dimona, Adada,
23 Kedeshi, Hasori, Itanani,
24 Zifu, Telemu, Bealoti,
25 Hazori-hadata, ne Kirioti-hezroni, ni bugha ambu e Hasori,
26 Amamu, Sema, Molada,
27 Hasari-gada, Heshmoni, Bete-peleti,
28 Hasari-shuali, Beeri-sheba, Biziotia,
29 Baala, Iyimu, Ezemi,
30 Eltoladi, Kesili, Horma,
31 Ziklagi, Madmana, Sansana,
32 Lebaoti, Shilihimu, Aini, ne Rimoni—eyosi yabya miyi 29 n’ehiyi hyayo.
33 Omo Shefela, mwabya: Eshtaoli, Zora, Ashna,
34 Zanoa, En-ganimu, Tapua, Enamu,
35 Yaramuti, Adulamu, Soko, Azeka,
36 Shaaraimu, Aditaimu, ne Gedera ne Gederotaimu* —emiyi 14 n’ehiyi hyayo.
37 Zenani, Hadasha, Migdali-gadi,
38 Dileani, Mizpa, Yokteli,
39 Lakishi, Boskati, Egloni,
40 Kaboni, Lamamu, Kitilishi,
41 Gederoti, Bete-dagoni, Naama, ne Makeda—emiyi 16 n’ehiyi hyayo.
42 Libna, Eteri, Ashani,
43 Ifta, Ashna, Nezibu,
44 Keila, Akzibu, ne Maresha— emiyi 9 n’ehiyi hyayo.
45 Ekroni n’emiyi yayo* n’ehiyi hyayo;
46 erilua e Ekroni erilolera oko luhande lw’eyo eryuba likalengera, ekiharo kyosi ekiri hakuhi na Ashdodi n’ehiyi hyayo.
47 Ashdodi, emiyi* yayo n’ehiyi hyayo, e Gaza emiyi yayo n’ehiyi hyayo erihika oko Musya we Misri owakumamo amaghetse, Engetse Nene,* n’ekiharo ekihererenie nayo.
48 N’omo kihugho ky’ebitwa, Shamiri, Yatiri, Soko,
49 Dana, Kiriati-sana, ni bugha ambu Debiri,
50 Anabu, Eshtemo, Animu,
51 Gosheni, Holoni, ne Gilo—emiyi 11 n’ehiyi hyayo.
52 Arabia, Duma, Eshani,
53 Yanimu, Bete-tapua, Afeka,
54 Humta, Kiriati-arba, ni bugha ambu e Hebroni, ne Ziori —emiyi 9 n’ehiyi hyayo.
55 Maoni, Karmeli, Zifu, Yuta,
56 Yezreeli, Yokdeamu, Zanoa,
57 Kaina, Gibea, ne Timna—emiyi 10 n’ehiyi hyayo.
58 Halhuli, Bete-zuri, Gedori,
59 Maarati, Beti-anoti, ne Eltekoni—emyi 6 n’ehiyi hyayo.
60 Kiriati-baali, ni bugha ambu e Kiriati-yearimu, ne Raba—emiyi ibiri n’ehiyi hyayo.
61 Omo mbwarara, Bete-araba, Midini, Sekaka,
62 Nibshani, Omuyi w’Omunyu, ne En-gedi—emiyi 6 n’ehiyi hyayo.
63 Oko bilebirye Abayebusi ababya bikere e Yerusalema, abalume be Yuda mubatatoka erihighabo. Busana n’ekyo Abayebusi bakinikere e Yerusalema haghuma n’abandu be Yuda erihika na munabwire.
Amaelezo awehikwa
^ Kutse “ekyahabawa omo bukanga.”
^ Ni bugha ambu, Engetse Eyikwire.
^ Ulebaye Amaana w’ebinywa.
^ Engetse Nene, Engetse ye Mediterania
^ Engetse Eyikwire.
^ Kutse “eribanda.”
^ kutse “eribanda.”
^ Ni bugha ambu, Engetse ye Mediterania.
^ Kutse “e Negebu.”
^ Kikamaanisaya, ebibeseni (ebibindi by’amaghetse.)
^ Kutse alinga, “Gedera n’obulisiryo bwayo.”
^ kutse “emiyi eyitimbire kuyo.”
^ Kutse “emiyi eyitimbire.”
^ Ni bugha ambu, Engetse ye Mediterania.