Yosua 16:1-10
16 N’ekihugho ekyaghabirawa abana ba Yozefu omo bukanga kyabya kitsukire e Yordani; e Yeriko ahali amaghetse oko luhande lw’eyo eryuba likasira lwe Yeriko. Kyabya kilabire omo mbwarara eyerukire eritsuka e Yeriko erihika oko kihugho ky’ebitwa kye Beteli.
2 Kandi kyabya kiluire e Beteli eye Luzi erihika oko mupaka w’Abaarki e Ataroti,
3 erilua eyo kyabya kindaghere butambi-tambi erilolera eyo eryuba likalengera erihika oko mupaka w’Abayafeleti n’erighenda erihika oko mipaka ye Bete-horoni y’Eyikwa ne Gezeri, ikyatwirya oko ngetse.
4 Neryo abana ba Yozefu, ye Manase na Efraimu mubimya ekihugho ky’omwandu wabo.
5 Omupaka w’abana ba Efraimu erikwamana n’ebitunga byabo w’ono: Omupaka w’ekihugo kyabo oko luhande lw’eyo eryuba rikalengera abya Ataroti-adari erihika e Bete-horoni y’Endata,
6 n’omupaka oyo abya ahikire oko ngetse. E Mikmetati yabya oko luhande lw’endata, kandi omupaka oyo abya atimbire oko luhande lw’eyo eryuba rikasira erihika e Tanati-shilo, n’eritwangana erihika oko luhande lw’eyo eryuba rikasira erihika e Yanoa.
7 Kandi iniandaghere erilua e Yanoa erihika e Ataroti ne Naara, n’erihika e Yeriko n’erihulukira e Yordani.
8 Erilua e Tapua, omupka abya atambukire butambi-tambi erilolera eyo eryuba likalengera erihika oko Musya we Kana owakumamo amaghetse n’eritwirya oko ngetse. Oyo wo mwandu w’ekihanda kya Efraimu erikwamana n’ebitunga byabo;
9 abana ba Efraimu babya bawite n’eyindi miyi omo kihugho ky’Abamanase, emiyi yosi n’ehiyi hyayo.
10 Nikwa mubatahigha Abakanana ababya bikere e Gezeri. Neryo Abakanana banikere haghuma n’Abaefraimu erihika na munabwire kandi babiribya bakabakolesya erikola emibiiri y’obukobe.
