Yosua 17:1-18
17 Neryo obukanga mubwasombola ekihanda kya Manase, kusangwa Manase yo wabya kambere ka Yozefu. Kundi Makiri akambere ka Manase kandi tata wa Gileadi abya mulume oyo wasi erilwa mwahabwa e Gileadi ne Bashani.
2 N’obukanga mubwawa busana n’abandi bana ba Manase erikwamana n’ebitunga byabo, busana n’abaghala ba Abiezeri, abaghala ba Heleki, abaghala ba Asrieli, abaghala ba Shekemu, baghala ba Heferi, n’abaghalaba Shemida. Abaghala abaluire oko Manase omughala wa Yozefu babo, abalume erikwamana n’ebitunga byabo.
3 Nikwa Zelofehadi mughala wa Heferi, mughala wa Gileadi, mughala wa Makiri, mughala wa Manase, syabya awite abana b’obulume; abya awite abambesa basa. Amena w’abali biwe w’ano: Mala, Noa, Hogla, Milka, na Tirza.
4 Neryo mubasa eyiri Eleazari, Yosua mughala wa Nuni, n’abakulu. Mubababwira bati: “Yehova mwalayira Musa ati tusyahabawa omwandu omo kati-kati k’abaghala betu.” Neryo erikwamana n’ebinywa bya Yehova, mwahabo omwandu omo kati-kati k’abaghala babo tata wabo.
5 Eritomeka oko Gileadi ne Bashani ebiri oko ghundi mwisirya* we Yordani, ekihanda kya Manase mukyahabwa awandi maghabo 10,
6 kusangwa abali ba Manase mubahabwa omwandu haghuma n’abaghala biwe n’ekihugho kye Gileadi mukyabya mwandu w’abandi bana ba Manase abasighalira.
7 Neryo omupaka w’Abamanase abya atsukire e Asheri erihika Mikmetati, eyisamalirene ne Shekemu, n’oko luhande lw’eyikwa,* omupaka oyo abya andaghere erihika oko kihugho ky’abikalani be En-Tapua.
8 Ekihugho kye Tapua mukyabya kya Manase. Nikwa omuyi we Tapua owabya oko mupaka wa Manase abya w’abaghala ba Efraimu.
9 Kandi omupaka oyo abya andaghere oko Musya we Kana owakumamo amaghetse, oko luhande lw’eyikwa lw’omusya. Omo kati-kati k’emiyi ya Manase mwabya n’emiyi ya Efraimu, n’omupaka wa Manase abya oko luhande lw’endata lw’omusya iniatwirya oko ngetse.
10 Oluhande lw’eyikwa lwabya lwa Efraimu, n’oluhande lw’endata lwabya lwa Manase; engetse yo yabya mupaka wiwe. Oko luhande lw’endata Abamanase* ibahikire oko Asheri, n’oko luhande lw’eyo eryuba rikasira ibahikire oko Isakari.
11 Omo kiharo kya Isakari na Asheri, Manase mwahabwa Bete-Sheani n’emiyi yayo, Ibleamu n’emiyi* yayo, abikalani be Dori n’emiyi yayo, abikalani be En-dori n’emiyi yayo, abikalani be Taanaki n’emiyi yayo, n’abikalani be Megido n’emiyi yayo, amalambo asatu.
12 Nikwa abana ba Manase mubatatoka erihamba emiyi eyi; Abakanana mubahanda, bamaghanira omo kihugho ekyo.
13 Abaisraeli babere bayira akaghala mubakolesya Abakanana erikola emibiiri y’obukobe, aliwe mubatahighabo* abosi.
14 Abana ba Yozefu mubabulya Yosua bati: “Busanaki wamatukolera obukanga ngendo nguma nyisa n’erituha* erighabo righuma lisa mo mwandu wetu? Tuli bandu bangyi kusangwa Yehova abiritutsumula erihika lino.”
15 Yosua mwasubiryabo ati: “Mwamabya imuli bandu bangyi, muhetukire omo musitu muyikonderegho omo kihugho ky’Abaperizi, n’eky’Abarefaimu, kusangwa ekihugho ky’ebitwa ky’Abarefaimu kyamabya kike okw’inywe.”
16 Abaghala ba Yozefu mubabugha bati: “Ekihugho ky’ebitwa ni kike okw’itwe, n’Abakanana bosi abikere omo kihugho ky’omo musya bawite oko ngurubani* sy’amalwa esiriko ebyuma;* abikere e Bete-sheani n’emiyi* yayo n’abikere omo musya* we Yezreeli.”
17 Neryo Yosua mwabwira ekitunga kya Yozefu, ni bugha ambu Efraimu na Manase ati: “Muli bandu bangyi kandi muwite amaka manene, simwendihabwa erighabo righuma risa.
18 N’ekihugho ky’ebitwa kikendibya kyenyu. Nomo ane musitu, mukendikondagho neryo akendisyabya mupaka w’ekiharo kyenyu. Kusangwa Abakanana nomo banawite amaka n’eribya n’esyongurubani* sy’amalwa esiriko ebyuma,* mukendisyahighabo.”
Amaelezo awehikwa
^ Ni bugha ambu, oluhande lw’eyo eryuba rikasira.
^ Kinywa kwa kinywa, “oluhande lw’amali.”
^ Kutse “ekihugho ky’Abamanase.”
^ Kutse “emiyi eyitimbire.”
^ Kutse “mubatimurabo.”
^ Kinywa kwa kinywa, “erimba.”
^ Kutse “emitoka eyikakurawa; esyosyaryo.”
^ Kutse “esyongurubani sy’ebyuma.”
^ Kutse “emiyi eyitimbire.”
^ Kutse “eribanda.”
^ Kutse “emitoka eyikakurawa; esyosyaryo.”
^ Kutse “esyongurubani sy’ebyuma.”
