Yosua 18:1-28
18 Neryo endeko yosi y’Abaisraeli muyahindana haghuma e Shilo. Mubasingikayo ehema y’erihindanamo, kusangwa babya ibabirikinda ekihugho.
2 Aliwe habya ihakine ebihanda 7 omo Baisareli ebyabya isibiribyahabwa omwandu wabyo.
3 Neryo Yosua mwabwira Abaisraeli ati: “Mukendisyalinda erihika mughulu wahi eriingira n’erimya ekihugho ekyo Yehova oMungu w’abotata-kulu wenyu abiribaha?
4 Omo buli kihanda, mumbe abalume basatu abo ngendituma. Bakendighenda, ibalaba omo kihugho kyosi n’erikola akarte kakyo erikwamana n’emyandu yabo, n’enyuma sy’aho bakendisuba eyo niri.
5 Bakendiyighabirakyo mo maghabo 7. Yuda akendisyasighala omo kiharo kiwe oko luhande lw’eyikwa, n’enyumba ya Yozefu ikendisyasighala omo kiharo kyayo oko luhande lw’endata.
6 Nikwa inywe mukole akarte k’ekihuhgo ekyo, mughabekyo mo maghabo 7. Mukendinileteragho, naghe ngendibakolera obukanga embere sya Yehova Mungu wetu.
7 Nikwa Abalawi sibawite erighabo omo kati-kati kenyu, kusangwa eribya bahereri ba Yehova w’omwandu wabo; na Gadi, Rubeni, n’enusu y’ekihanda kya Manase ibo babirimya omwandu wabo oko luhande lw’eyo eryuba rikasira olwe Yordani ogho Musa omughombe wa Yehova ahabo.”
8 Neryo abalume abo mubayiteghekania busana n’olughendo. Yosua mwabwira abakendikola akarte k’ekihuhgo ekyo ati: “Mughende, mulabe omo kihugho mukole akarte kakyo, n’enyuma sy’aho mukendisuba eyo niri, neryo naghe ngendibakolera obukanga embere sya Yehova e Shilo.”
9 Neryo abalume abo mubaghenda bamalaba omo kihugho n’erikola akarte kakyo erikwamana n’emiyi, bamaghabakyo mo maghabo 7. Mubahandika emyatsi eyo omo kitabu. Enyuma sy’aho, mubasuba eyiri Yosua e Shilo omo kambi.
10 Neryo Yosua mwakolerabo obukanga e Shilo embere sya Yehova. Eyo, Yosua mwaghabira Abaisraeli b’ekihugho erikwamana n’amaghabo wabo.
11 Obukanga mubwasombola ekihanda kya Benyamini erikwamana n’ebitunga byabo, n’ekiharo kyabo ekyasombolawa omo bukanga kyabya omo kati-kati k’ekihanda kya Yuda n’ekihanda kya Yozefu.
12 Oko luhande lw’endata, omupaka wabo abya atsukire oko Yordani iniahetuka erilua oko bw’eruka bwe Yeriko oko luhande lw’endata, kandi iniahetuka butambi-tambi oko kitwa erilolera oko luhande lw’eyo eryuba rikalengera n’erihika omo mbwarara ye Bete-aveni.
13 Erilua aho, omupaka abya ahikire e Luzi, oko luhande lw’eyikwa lw’obweruka bwe Luzi, ni bugha ambu e Beteli; omupaka abya andaghere erihika e Ataroti-adari oko kitwa ekiri oko luhande lw’eyikwa lwe Bete-haroni y’Eyikwa.
14 Omupaka mwalaba oko luhande lw’eyo eryuba likalengera kandi mwatimba oko luhande lw’eyikwa eritsuka oko kitwa ekisamalirene ne Bete-horoni oko luhande lw’eyikwa; mwatwirya e Kiriati-baali, ni bugha ambu e Kiriati-yearimu omuyi we Yuda. Olo lo luhande lw’eyo eryuba likalengera.
15 Oluhande lw’eyikwa lwabya lutsukire oko musike we Kiriati-yearimu, n’omupaka abya aghendire butambi-tambi erilolera oko luhande lw’eyo eryuba likalengera; abya ahikire oko nunga y’amaghetse we Neftoa.
16 Omupaka abya andaghere erihika oko musike w’ekitwa ekisamalirene n’Omusya wa Mughala wa Hinomu ekiri omo Musya wa Refaimu oko luhande lw’endata, kandi abya andaghere erihika oko Musya wa Hinomu, erihika oko bwandaghala bw’Omuyebusi oko luhande lw’eyikwa n’erindaghalira e En-rogeli.
17 Kandi mwalaba oko luhande lw’endata; eritsuka e En-shemeshi n’erihetukira e Geliloti eyiri embere sy’obweruka bwe Adumimu, kandi abya andaghere erihika oko ribwe rya Bohani mughala wa Rubeni.
18 Kandi abya aghendire erihika oko bwandaghala bw’oko luhande lw’endata obusamalirene ne Araba n’erindaghala erihika oko Araba.
19 Kandi omupaka abya aghendire erihika oko bweruka bw’oko luhande lw’endata lwe Bete-hogla, n’eritwirya oko kalimi-limi k’oko luhande lw’endata ak’Engetse y’Omunyu,* aho olusi lwe Yordani lwingirire omo ngetse oko luhande lw’eyikwa. Oyo w’abya mupaka w’oko luhande lw’eyikwa.
20 Oko luhande lw’eyo eryuba rikasira, e Yordani w’abya mupaka w’ekihugho ekyo. Oyo wabya mwandu w’abaghala ba Benyamini erikwmana n’ebitunga byabo. Eyo yo yabya mipaka yabo oko syombande syosi.
21 N’emiyi y’ekihand kya Benyamini erikwamana n’ebitunga byabo yabya: Yeriko, Bete-hogla, Emeki-kesisi,
22 Bete-araba, Zemaraimu, Beteli,
23 Avimu, Para, Ofra,
24 Kefaramoni, Ofni, ne Geba—emiyi 12 n’ehiyi hyayo.
25 Gibeoni, Rama, Beeroti,
26 Mizpe, Kefira, Moza,
27 Rekemu, Irpeli, Tarala,
28 Zela, Halefu, Yebusi, ni bugha ambu e Yerusalema, Gibea, ne Kiriati—emiyi 14 n’ehiyi hyayo.
Oyu w’abya mwandu w’abana ba Benyemini erikwamana n’ebitunga byabo.
Amaelezo awehikwa
^ Ni bugha ambu, Engetse Eyikwire.
