Yosua 2:1-24
2 Neryo Yosua omughala wa Nuni mwatuma omo bubiso-biso abalume babiri mo bapelelezi* erilua e Shitimu. Mwabwirabo ati: “Mughende muyiteghereraye ekihugho, kutsibu-tsibu omuyi we Yeriko.” Neryo mubaghenda bamahika omo nyumba y’omumbalaka mughuma oyukahulawa mo Rahabu, bamabya aho wiwe.
2 Neryo omwami we Yeriko mwabwirwa ambu: “Abalume Abaisraeli mubakahika omo muyi omo kiro erisyapelelezya* ekihugho kyosi.”
3 Omwami we Yeriko abere abyowa ekyo, mwatuma omulaghe ono oko Rahabu, ati: “Hulukaya abalume abalyasa. Bane omwaghu muno. Kusangwa balyasya erisyapelelezya* ekihugho kyosi.”
4 Aliwe omukali oyo, mwayabisa abalume babiri abo. Mwabugha ati: “Kwenene abalume abo mobakahika hano, aliwe munditaminya eyo balyasira.
5 Omwirimya mwakabya abiwa ahisi, omulango w’omuyi iniakisiya iniakingwa, abalume abo mubakaghenda. Sinasi nga mubakalolera mukyo mo hayi. Aliwe, mwamabibakwamirira luba, imwanganabahikako.”
6 (Nikwa abya iniabiritwalabo omo lutwe lw’enyumba yiwe n’eribisabo omo biti by’ekitani ebyabya bitondekire oko lutwe.)
7 Neryo abalume abo mubakwamirirabo ebwanga bwe Yordani eyiri ekisokero. Babere babinahuluka, omulango w’omuyi mwalw’inyakingwa.
8 Embere abapalelezi* babiri abo baghotsere, omukali oyo mwasambira eyo bali oko lutwe.
9 Mwabwirabo ati: “Ninasi ngoko Yehova akendibaha ekihugho kino. N’obuba bwenyu bwabirituhikako. Abikalani bosi b’omo kihugho babiriyibulamo omutima busana nenyu.
10 Kusangwa mutwowa ngoko Yehova umaya Engetse y’Engula embere syenyu omughulu mwalua e Misri. Kandi mutwowa ebyo mwakolera abami babiri b’Abaamori, ye Sihoni na Ogi, abo mwita oko ghundi musirya* we Yordani.
11 Twabere twowagho, emitima* muyalua omo nda. Muhatabya n’omughuma oyukakanganaya obutubaha* busana nenyu, kusangwa Yehova oMungu wenyu ni Mungu omo lubula, endata, n’eyikwa oko kihugho.
12 Neryo kisi mulape oko Yehova ngoko mukendisyanikangania olwanzo oluteleghula,* kandi ngoko mukendisyakangania olwanzo oluteleghula oko nyumba ya baba waghe, kundi naghe mungabakanganaya olwanzo oluteleghula. Kandi litolere imwamba ekiminyikalo ekyangaleka inikirirya.*
13 Litolere imwateya obuyingo bwa baba waghe na mama waghe, abaghala betu n’abali betu, n’ebyosi ebyo bawiteko. Kandi litolere imwatulamya* oko luholo.”
14 Neryo abalume abo mubabwira omukali oyo bati: “Tukendisyaligha esyongebe* syetu sihere omo mwanya w’esyongebe syenyu! Mwamatendibisula omwatsi ogho tulyasyakola itukendisyabakangania olwanzo oluteleghula* n’obutaleghula omughulu Yehova akendisyatuha ekihugho kino.”
15 Enyuma sy’aho mwandaghalyabo omo lukoba omw’idirisa kusangwa enyumba yiwe yabya ihimbire oko luhimmbo lw’omuyi. Abya ikere oko luhimbo.
16 Mwabwirabo ati: “Mughende omo kihugho ky’ebitwa, muyibise eyo omo biro bisatu, abakabakwamirira bakasyabeya. Neryo bakendisyabya babisubula, nenyu imwanganaghenda.”
17 Abalume abo mubabwira omukali oyo bati: “Sitwendisyabyako olubanza losi-losi okw’ilapa eryo wamatulapisya lino,
18 wamabisyakola kino: Omughulu tukendisyingira omo kihugho kino, ukendisyabohera oko ridirisa eryo ulyatwandaghalayako kw’olukoba luno lw’erangyi y’omusasi eyihena-henirye. Litolere iwasyahindania haghuma omo nyumba eno, baba waghu, mama waghu, abaghala benyu, n’enyumba yosi ya baba waghu.
19 Neryo oyukendisyahuluka omo nyumba iniaya ehihya, omusasi wiwe akendisyabya oko mutwe wiwe, netu sitwendisyabyako olubanza. Aliwe omwatsi wosi-wosi mubi amabihikira* omundu oyune haghuma naghu omo nyumba eno, omusasi wiwe akendisyabya oko mitwe yetu.
20 Nikwa wamabibisula omwatsi ogho tulyasyakola, isitwendisyabyako olubanza losi-losi okw’ilapa eryo wabiritulapisya.”
21 Mwasubiryabo ati: “Bibye ngoko mwamabugha.”
Neryo mwabaleka, bamaghenda. Enyuma sy’aho mwabohera olukoba lw’erangyi y’omusasi eyihena-henirye olo oko ridirisa.
22 Neryo abalume babiri abo mubaghenda omo kihugho ky’oko bitwa, bamabyayo omo biro bisatu bakalinda abakabakwamirira basubule. Abakabakwamirira babya ibanemukwesa-kwesabo omo syonzira syosi, aliwe mubatasungabo.
23 Neryo abalume babiri abo, mubandaghala bakalua omo kihugho ky’oko bitwa. Mubasoka olusi bamasa eyiri Yosua omughala wa Nuni. Mubamukanirya ebyosi ebyo balolako.
24 Mubabwira Yosua bati: “Yehova abirituha ekihugho kyosi. Nibya n’abikalani bosi b’omo kihugho ekyo babiriyibulamo omutima busana netu.”
Amaelezo awehikwa
^ Kutse “balingyi.”
^ Kutse “erisyalinga.”
^ Kutse “erisyalinga.”
^ Kutse “abalingyi.”
^ Ni bugha ambu, “oluhande lw’eyo eryuba rikasira.”
^ Kinywa kwa kinywa, “emitima yetu muyahwerekerera.”
^ Kinywa kwa kinywa, “muhatabya n’ekirimu ekikahangana omo mundu.”
^ Kutse “olwanzo olutyusa.”
^ Kutse “ekiminyikalo ky’eriyiketerwa.”
^ Kutse “imwalamya esyonafsi syetu.”
^ Kutse “esyonafsi syetu isikendisyahola omo mwanya w’esyonafsi syenyu.”
^ Kutse “olwanzo olutyusa.”
^ Kutse “ebyala byamabisumbirwa oko.”
