Yosua 22:1-34
22 Neryo Yosua mwabirikira Abarubeni, Abagadi n’enusu y’ekihanda kya Manase.
2 Mwabwirabo ati: “Mwabirikola ebyosi ebyo Musa omughombe wa Yehova abalayira, naghe mwabiryowa omulenge waghe omo byosi ebyo nabalayira.
3 Simwetalekerania abaghala benyu omo mighulu yosi eyi erihika munabwire, kandi mwabirisikya ekyalayiro kya Yehova Mungu wenyu.
4 Neryo lino, Yehova oMungu wenyu abiriha abaghala benyu b’eriluhuka ngoko analaghabo. Neryo lino mwanganasuba omo mahema wenyu omo kihugho ekyo Musa omughombe wa Yehova abaha eribya mwandu wenyu oko ghundi musirya* we Yordani.
5 Ekighuma kisa, muyikase erikwama ebihano n’emighambo eyo Musa omughombe wa Yehova abaha, eryanza Yehova oMungu wenyu n’erilendera omo syonzira siwe syosi, n’erikwama ebihano biwe, n’erimumakirira, n’erimukolera n’omutima wenyu wosi, n’obuyingo* bwenyu bwosi.”
6 Neryo Yosua mwatsumulabo n’eribwirabo ati baghende. Neryo mubasuba eyiri amahema wabo.
7 Musa abya iniabiriha enusu y’ekihanda kya Manase y’omwandu e Bashani; n’eyindi nusu y’ekihanda ekyo, Yosua mwahayo ekihugho oko luhande lw’eyo eryuba rikalengera eyisirya we Yordani, haghuma n’abahgala babo. Kandi omughulu Yosua abugha ati basube eyiri amahema wabo mwatsumulabo
8 n’eribwirabo ati: “Musube eyiri amahema wenyu, n’obuteke bungyi n’ebihangulo bingyi haghuma n’efeza, n’ehoro, n’ekwivre,* n’ekyuma, n’esyongyimba nyingyi kutsibu. Mwimaye ebyo mulyanyegha oko syonzighu syenyu, muyaghabebyo n’abaghala benyu.”
9 Enyuma sy’aho, Abarubeni, Abagadi, n’enusu y’ekihanda kya Manase, mubasubula bamalua ahali abandi Baisraeli e Shilo omo kihugho kye Kanana. Mubasuba omo kihugho kye Gileadi, ekihugho ky’omwandu wabo eyo babya ibabiriikala erikwamana n’ebyo Yehova abugha erilabira Musa.
10 Abarubeni, Abagadi, n’enusu y’ekihanda kya Manase babere babihika omo biharo bye Yordani omo kihugho kye Kanana, mubahimba ekiherero e Yordani. Ekiherero ekyo kyabya kinene, ekikaswekaya.
11 Neryo enyuma sy’aho, abandi Baisraeli mubowa omwatsi oyo, ambu: “Mwasyowagho! Abarubeni, Abagadi n’enusu y’ekihanda kya Manase babirihimba ekihereo oko mupaka w’ekihugho kye Kanana omo biharo bye Yordani oko luhande lw’Abaisraeli.”
12 Omughulu Abaisraeli bowa omwatsi oyo, endeko yosi y’Abaisraeli muyahindana e Shilo eriyalwa nabo.
13 Neryo Abaisraeli mubatuma Finehasi mughala wa Eleazari omuhereri eyiri Abarubeni, Abagadi, n’enusu y’ekihanda kya Manase omo kihugho kye Gileadi.
14 Mwaghenda n’abakulu 10 b’ebihanda; omukulu mughuma erilua omo buli kitunga ky’ebihanda bya Israeli. Obuli mughuma wa kubo abya mukulu w’ekitunga ky’abotata-kulu biwe, omo kati-kati k’amaelfu* w’Abaisraeli.
15 Babere bahika ahali Abarubeni, Abagadi n’enusu y’ekihanda kya Manase omo kihugho kye Gileadi, mubabwirabo bati:
16 “Endeko yosi ya Yehova yiti: ‘Busanaki mwabirileghula oko Mungu wa Israeli mukakola omwatsi mungana n’oyu? Munabwire mwabiribinduka n’erileka erikwama Yehova kundi mwabiriyihimbira ekiherero n’eriyisamambula oko Yehova.
17 Erilolo eryo twakola e Peori ryabya rike kwehi? Erihika na lino situli twayerya kuryo nomo ekihuzo kyanahunza endeko ya Yehova.
18 Kandi nenyu munabwire mukabinduka erileka erikwama Yehova. Mwamabiyisamambula oko Yehova, omungya iniakendisyahitana oko ndeko yosi ya Isareli.
19 Neryo mwamabya imulyakola mutya kundi ekihugho kyenyu si ky’erire, musokere omo kihugho ky’omwandu wa Yehova eyiri e Tabernakulo ya Yehova mwikale netu; aliwe isimwayisamambula oko Yehova, kandi isimwaleka netu itwabya bayisamambuli busana nenyu erihimba ekindi kiherero eritomeka oko kiherero kya Yehova Mungu wetu.
20 Omughulu Akani omughala wa Zera akola erilolo, akiba oko bindu ebyabya bitolere eritsandibwa, erihitana ry’oMungu mulitahika oko ndeko yosi y’oMungu kwehi? Akani musa yo watahola busana n’erilolo riwe.’”
21 Neryo Abarubeni, Abagadi, n’enusu y’ekihanda kya Manase mubasubirya abakulu b’amaelfu* w’Abaisrali bati:
22 “OMungu w’emiungu Yehova, oMungu w’emiungu Yehova, iye anasi, na Israeli akendiminya. Twamabya imutukayisamambula kutse imutukaleghula oko Yehova,* isiwatubalaya munabwire.
23 Twamabya imutukayihimbira ekiherero busana n’erileka erikwama Yehova kutse busana n’eriherera kukyo k’obuhere bw’eryokererya kutse obuhere bw’eyisyano, kutse amahere w’obuholo,* Yehova isyatubalaya munabwire.
24 Nikwa tulyakola tutya busana n’oghundi mwatsi, kusangwa mutukabugha tuti, ‘Omo biro ebikasa abana benyu ibanganasyabwira abana betu bati: “Niki kyo kikakanganaya ngoko muli bandu ba Yehova oMungu wa Israeli?
25 Yehova abiriyira e Yordani eribya mupaka omo kati-kati ketu nenyu, Abarubeni, n’Abagadi. Simuwite omwandu omo Yehova.” Neryo abana benyu ibakakirya abana betu eriramya* Yehova.’
26 “Neryo mutwabugha tuti, ‘Tukole omwatsi mulebe, tuhimbe ekiherero butsira busana n’eriherera kukyo kw’amahere w’eryokererya n’awandi mahere,
27 aliwe eribya bwimiri omo kati-kati kenyu netu, n’abana betu enyuma syetu, ngoko tukendibya tukasa embere sya Yehova erimuramya, tukamuherera amahere wetu w’eryokererya, n’awandi mahere, n’amahere wetu w’obuholo. Neryo omo biro ebikasa abana benyu isibasyabwira abana betu* bati: “Simuwite omwandu omo Yehova.”’
28 Neryo mutwabugha tuti, ‘Bamasyatubwira batya kutse eribwira batya abana betu omo biro ebikasa, itukendisyabugha tuti: “Mulebaye ekisosekanio ky’ekiherero kya Yehova ekyo abotata-kulu wetu bakokotaya butsira busana n’amahere w’eryokererya kutse busana n’esyohongo, nikwa busana n’eribya bwimiri omo kati-kati kenyu netu.”’
29 Kibye hali okw’itwe eriyisamambula oko Yehova kutse eribinduka munabwire n’erileka erikwama Yehova n’erihimba ekiherero busana n’amahere w’eryokererya, amahere w’eyisyano, n’esyohongo, kite iky’ekiherero kya Yehova Mungu wetu ekiri embere w’etabernakulo yiwe.”
30 Omughulu Finehasi omuheri, abakulu b’endeko, n’abakulu b’amaelfu* w’abana ba Israeli ababya haghuma naye bowa ebinywa by’abana ba Rubeni, Gadi, na Manase, mubatulera.
31 Neryo Finehasi mughala wa Eleazari omuhereri mwabwira abana b’ekihanda kya Rubeni, Gadi na Manase ati: “Munabwire twamaminya ngoko Yehova ali omo kati-kati ketu. Kusangwa simwetakola omwatsi oyu w’erileghula oko Yehova. Neryo lino Yehova syendisyasuyira Abaisraeli.”
32 Neryo Finehasi mughala wa Eleazari omuhereri, n’abasondoli mubasubula, bamalua eyiri Abarubeni n’Abagadi omo kihugho kye Gileadi, bamasuba e Kanana. Mubasyatulira abandi Baisraeli b’omwatsi oyo.
33 Abaisraeli mubatulera babyowa ebinywa ebyo. Neryo Abaisraeli mubapipa oMungu. Mubaleka eritasyakania oko mwatsi w’eriyalwa n’ekihanda kya Rubeni na Gadi, eriyatoghotya ekihugo ekyo babya bikeremo.
34 Neryo Abarubeni n’Abagadi mubaha ekiherero* ekyo ky’erina, kusangwa “ni bwimiri omo kati-kati ketu ngoko Yehova yo Mungu w’ekwenene.”
Amaelezo awehikwa
^ Ni bugha ambu, oluhande lw’eyo eryba rikasira.
^ Kinywa kwa kinywa, “enafsi.” Ulebaye Amaana w’ebinywa.
^ Kutse “omulinga.”
^ Kutse “ebihanda.”
^ Kutse “ebihanda.”
^ Kutse “Ow’amaka, oMungu, Yehova.”
^ Kutse “amahere w’erisangania.”
^ Kinywa kwa Kinywa, “eryubaha.”
^ Kinywa kwa kinywa, “ebizazi.”
^ Kutse “ebihanda.”
^ Erikwamana n’amafasiriyo, erina ry’ekiherero ekyo alinga ryabya Bwimiri.
