Yosua 23:1-16
23 Enyuma w’ebiro bingyi Yehova iniabiriluhukya Abaisrali oko syonzighu syabo syosi esyabya sibatimbireko, Yosua inyabiribya musyakulu, iniabiriyira emyaka mingyi,
2 Yosua mwahindania Abaisraeli bosi, abasyakulu babo, abakulu babo, abatsweri babo, n’abasondoli babo. Mwabwirabo ati: “Nabiribya musyakulu, nabiriyira emyaka mingyi.
3 Kandi mwabiriyilangirira inywibene-bene ebyosi ebyo Yehova Mungu wenyu akolera ebihanda byosi ebi busana nenyu, kusangwa Yehova Mungu wenyu yo wabya akabalwira.
4 Mulebaye! Munabaghabira erilabira obukanga* ekihugho ky’ebihanda ebikisighere eribya mwandu w’ebihanda byenyu, kutya n’ekihugo ky’ebihanda ebyo natoghotaya eritsuka oko Yordani erihika oko Ngetse Nene* oko luhande lw’eyo eryuba rikalengera.*
5 Na Yehova Mungu wenyu yo wabya akahighabo* erilua embere syenyu. Kandi mwabahighirabo, nenyu mumwimya ekihugho kyabo ngoko Yehova Mungu wenyu anabalagha.
6 “Neryo lino litolere imwabya batubaha kutsibu erikola n’eriteya ebyosi ebisakire omo kitabu ky’Emighambo ya Musa, eritendikita kuyo oko luhande lw’amali kutse olw’amalembe.
7 Isimwasyatamba n’ahake n’ebihanda ebi ebikinikere nenyu, simutolere nibya eryahula amena w’emiungu yabyo kutse erilapa omo mena ayo. Kandi isimwasyakolerayo n’ahake, kutse eryunamirayo.
8 Nikwa litolere imwamakirira Yehova Mungu wenyu ngoko mwanabirikola erihika munabwire.
9 Yehova akendihighira hali ebihanda binene-binene n’eby’amaka, ibyalua embere syenyu. Kusangwa erihika munabwire, sihali omundu oyo wabiritoka erilwa nenyu.
10 Omundu mughuma musa w’okw’inywe, akendisyahigha abandu 1 000, kundi Yehova Mungu wenyu akabalwira ngoka anabalagha.
11 Neryo mughulu wosi muyiteghaye,* mwanze Yehova Mungu wenyu.
12 “Nikwa mwamabibinduka n’erimakirira oko bihanda ebikisighere omo kati-kati kenyu neryo imwatahania nabo n’erikola obwira haghuma nabo, nabo ibakola obwira haghuma nenyu,
13 imwalw’imwaminya kwenene ngoko Yehova syendisyabahighira* ebihanda ebyo. Ibikendisyabya mughuli n’ekitegho, n’eribya ng’olufimbo oko nganga syenyu, n’eribya mahwa omo meso wenyu erihika aho mukendisyahwerekerera omo kihugho eki ekyo Yehova Mungu wenyu abiribaha.
14 “Neryo lino, mulebaye! Nikisiya inahola.* N’emitima yenyu yosi n’esyonafsi* syenyu sinasi ndeke-ndeke ngoko sihali n’ekinywa n’ekighuma oko milaghe yosi eyuwene eyo Yehova Mungu wenyu abalagha, ekyabiribula eribererera. Ebyosi byabiribererera busana nenyu, sihali n’ekighuma ekyabula eriberera.
15 Aliwe ngoko emilaghe yosi eyuwene eyo Yehova Mungu wenyu abalagha yabiribererera busana nenyu, kutya Yehova akendisyaleta okw’inywe ebitsibu* byosi ebyo abirilagha n’eribahwerekererya erilua omo kihugho kibuya kino ekyo Yehova Mungu wenyu abirilagha.
16 Mwamabitwa endaghane eyo Yehova Mungu wenyu ababwira ati litolere imwakwama, kandi mwamabiyakolera eyindi miungu n’eryunamirayo, erihitana rya Yehova irikendisyaghulumira okw’inywe, kandi imukendisyalw’imwahwerekerera omo kihugho kibuya ekyo abiribaha.”
Amaelezo awehikwa
^ Kutse “munabaha.”
^ Ni bugha ambu, Engetse ye Mediterania.
^ Kutse “erilolera eyo eryuba likalengera.”
^ Kutse “eriimurabo.”
^ Kutse “muteghaye ndeke esyonafsi syenyu.”
^ Kutse “eriimura.”
^ Kinywa kwa kinywa, “munabwire ngalaba omo nzira y’ekihugho kyosi.”
^ Ulebaye Amaana w’ebinywa.
^ Kutse “emitsumo.”