Yosua 3:1-17
-
Abaisraeli bamasoka e Yordani (1-17)
3 Neryo Yosua mwabuka omo tututu. Iye n’Abaisraeli* bosi mubalua e Shitimu bamahika oko Yordani. Mubaghotseraho embere basokere oko ghundi musirya.
2 Enyuma w’ebiro bisatu, abakulu b’abandu mubalaba omo kambi yosi
3 n’eribwira abandu bati: “Mukendibya mukanalangira abahereri Abalawi ibanahekire erisanduku ry’endaghane ya Yehova oMungu wenyu, mukendihongoka aho muli, imwakwamalyo.
4 Aliwe mukendibya hali kulyo, oko maboko nga 2 000.* Isimwaseghera hakuhi nalyo. Neryo mukendiminya enzira eyo mwangalabamo, kundi eno ni nzira eyo mutemwatalabamo.”
5 Neryo Yosua mwabwira abandu ati: “Muyihighule,* kusangwa omungya Yehova akendisyakola emyatsi y’eriswekera omo kati-kati kenyu.”
6 Neryo Yosua mwabwira abahereri ati: “Muheke erisanduku ry’endaghane, mulabe embere sy’abandu.” Neryo mubaheka erisanduku ry’endaghane, bamalaba embere sy’abandu.
7 Neryo Yehova mwabwira Yosua ati: “Munabwire ngenditsuka erikuha olukengerwa omo meso w’Abaisraeli bosi baminye ngoko ngendibya haghuma naghu ngoko nanabya haghuma na Musa.
8 Ukendihana abahereri abahekire erisanduku ry’endaghane uti: ‘Mukendibya mwabihika oko musike w’amaghetse w’olusi lwe Yordani mukendilyata omo maghetse, imwimana.’”
9 Neryo Yosua mwabwira Abaisraeli ati: “Mwase muhulikirire ebinywa bya Yehova oMungu wenyu.”
10 Yosua mwabugha ati: “Erilabira omwatsi ono mukendiminya ngoko oMungu oyuliho ane haghuma nenyu, kandi ngoko syendibula erihigha embere syenyu Abakanana, Abahiti, Abahivi, Abaperizi, Abagirgashi, Abaamori, n’Abayebusi.
11 Mulebaye, erisanduku ry’endaghane y’Omukama w’ekihugho kyosi rikalaba embere syenyu omo lusi lwe Yordani.
12 Neryo musombole abalume 12 omo bihanda bye Israeli; omulume mughuma omo buli kihanda.
13 Obulyatiro bw’ebisando by’abahereri abahekire erisanduku rya Yehova, Omukama w’ekihugho kyosi bukendibya bwabinatulya* oko maghetse we Yordani, amaghetse w’olusi lwe Yordani awakasira endata akendimana. Akendimana, iniabya ng’oluhimbo.”
14 Neryo omughulu abandu balua omo mahema wabo embere basoke olusi lwe Yordani, abahereri abahekire Erisanduku ry’Endaghane mubaghenda embere syabo.
15 Abahereri ababya bahekire erisanduku ry’endaghane babere babinahika oko Yordani n’erilyatya ebisando byabo omo maghetse w’oko musike (olusi lwe Yordani lukabwayira oko musike walo omughulu wosi w’erighesa),
16 amaghetse awabya akasira endata mwimana. Mwimana hali ng’oluhimbo e Adamu, omuyi owali hakuhi ne Zaretani. Nikwa amaghetse awabya akandaghalira omo Ngetse ye Araba ni bugha ambu Engetse y’Omunyu* mwalola embere erisenda, amuma. Olusi mulwimana. N’abandu mubasokera oko ghundi musirya erilolera e Yeriko.
17 Abaisraeli bosi mubasoka oko kitaka ekyumire. Ekihanda kyosi mukyabugha erisoka olusi lwe Yordani abahereri ababya bahekire erisanduku ry’endaghane ya Yehova ibanimene butsira erisegha-seghana oko kitaka ekyumire omo kati-kati k’olusi lwe Yordani.
Amaelezo awehikwa
^ Kinywa kwa kinywa, “abaghala ba Israeli.”
^ Nga metre 890. Ulebaye Endomeko B14.
^ Kutse “muyiyire mo babuyirire.”
^ Kinywa kwa kinywa, “eriikala oko”
^ Ni bugha ambu, “Engetse eyikwire.”
