Yosua 4:1-24
-
Amabwe w’eryibukya (1-24)
4 Ekihanda kyosi kyabere kyabinabugha erisoka olusi lwe Yordani, Yehova mwabwira Yosua ati:
2 “Usombole abalume 12 omo bandu; omulume mughuma omo buli kihanda.
3 Neryo ulayirebo uti: ‘Mwimaye amabwe 12 omo lusi lwe Yordani aho ebisando by’abahereri bilue bimene, muhekegho. Mukendihiragho aho mukendighotsera munabwire.’”
4 Neryo Yosua mwabirikira abalume 12 abo abasombola omo Baisraeli; omulume mughuma omo buli kihanda.
5 Neryo Yosua mwabwirabo ati: “Mulabe embere sy’Erisanduku rya Yehova oMungu wenyu, muye omo kati-kati ke Yordani. Neryo obuli mughuma w’okwinywe aheke eribwe righuma oko kitigho kiwe erikwamana n’emighanzo y’ebihanda bye Israeli
6 ribye kiminyikalo omo kati-kati kenyu. Abana* benyu bamabisyababulya bati, ‘Amabwe aya muli nagho busanaki?’
7 Mukendisyasubiryabo muti, ‘Kusangwa amaghetse w’olusi lwe Yordani mwimana embere sy’erisanduku ry’endaghane rya Yehova. Omughulu ryasoka olusi lwe Yordani, amaghetse we Yordani mwimana. Amabwe aya akendisyabya mwatsi owakibukaya* Abaisraeli mughulu wosi.’”
8 Neryo Abaisraeli mubakola ngoko Yosua anahanabo, mubimya amabwe 12 omo kati-kati k’olusi lwe Yordani ngoko Yehova analayira Yosua erikwamana n’emighanzo y’ebihanda bya Israeli. Mubimyagho bamatwalagho aho baghotsera, bamatekagho aho.
9 Kandi Yosua mwasingika amabwe 12 omo kati-kati k’olusi lwe Yordani ahabya himene ebisando by’abahereri ababya bahekire erisanduku ry’endaghane. Amabwe ayo akineho na munabwire.
10 Abahereri ababya bahekire Erisanduku mubasighala ibanimene omo kati-kati k’olusi lwe Yordani erihika aho Abaisraeli babughira erikola ebyosi ebyo Yehova abwira Yosua, ati bakole erikwamana n’ebyosi ebyo Musa abya iniabirilayira Yosua. Oko ndambi eyo abandu babya ibanemusoka luba-luba.
11 Abandu bosi babere babibugha erisoka, abahereri mubasoka n’Erisanduku lya Yehova omo meso w’abandu bosi.
12 Neryo Abarubeni, Abagadi, n’enusu y’ekihanda kya Manase mubasoka ibanatondekire ng’abakaya oko malwa embere sy’Abaisraeli ngoko Musa anabya iniabiribalayira.
13 Abasuda 40 000 abawite oko bimano by’amalwa, abatondekire ng’abakaya oko malwa mubasoka embere sya Yehova, bamingira omo mbwarara y’amerere we Yeriko.
14 Oko kiro ekyo Yehova mwaha Yosua y’olukengerwa omo meso w’Abaisraeli bosi. Nabo mubamusikya* kutsibu omo ngebe yiwe yosi, ngoko banabya basikire Musa yo kutsibu.
15 Neryo Yehova mwabwira Yosua ati:
16 “Ubwire abahereri abahekire erisanduku ry’Endaghane uti balue omo lusi lwe Yordani.”
17 Neryo Yosua mwabwira abahereri ati: “Mulue omo lusi lwe Yordani.”
18 Abahereri abahekire erisanduku ry’endaghane ya Yehova babere balua omo kati-kati k’olusi lwe Yordani n’obulyatiro bw’ebisando byabo bwabere bwabinalyata oko kitaka ekyumire, amaghetse we Yordani mwatsuka eritasyasenda n’eribwaghira oko musike ngoko analue embere.
19 Abandu mubasoka olusi lwe Yordani oko kiro kye 10 ky’omwisi w’erimbere. Mubahira ekambi e Giligali oko luhande lw’eyo eryuba rikasira lwe Yeriko.
20 Yosua mwasingika amabwe 12 agho balusaya omo kati-kati k’olusi lwe Yordani. Mwasingikagho e Gilgali.
21 Neryo mwabwira Abaisraeli ati: “Omo biro ebikasa, omughulu abana benyu bakendisyabya bakabulya abotata wabo bati, ‘Amabwe aya akamaanisayaki?’
22 Litolere imwasubirya abana benyu muti: ‘Abaisraeli mubasoka e Yordani oko kitaka ekyumire
23 omughulu Yehova oMungu wenyu umaya amaghetse w’olusi lwe Yordani erihika aho babughira erisokalo. Yehova oMungu wenyu mwakolera olusi lwe Yordani ngoko anakolera Engetse y’Engula omughulu umayayo embere syetu erihika aho twasokerayo.
24 Mwakola atya abandu bosi b’oko kihugho baminye ngoko ebyala bya Yehova ni by’amaka, nenyu mutoke eryubaha Yehova oMungu wenyu mughulu wosi.
Amaelezo awehikwa
^ Kinywa kwa kinywa, “abaghala benyu.”
^ Kutse “kibukyo.”
^ Kinywa kwa kinywa, “mububaha.”
