Yosua 5:1-15
5 Abami bosi b’Abaamori ababya oko luhande* lw’eyo eryuba likalengera lwe Yordani n’abami bosi b’Abakanana, ababya hakuhi n’engetse mubowa ngoko Yehova mwakumaya amaghetse we Yordani embere sy’Abaisraeli erihika aho balyabughira erisokera. Babere babyowa ekyo, emitima yabo muyalua omo nda.* Kandi babya isibakirimo n’akaghala* kosi-kosi busana n’Abaisraeli.
2 Oko mughulu oyo Yehova mwabwira Yosua ati: “Uyikokoteraye emihamba omo ribwe eritwire* utasyabanaya abalume be Israeli engendo y’akabiri.”
3 Neryo Yosua mwakokotya emihamba omo ribwe eritwire* amabania abalume be Israeli e Gibeati-haaraloti.*
4 Ekyaleka Yosua iniababania kya kino: Abalume bosi abalua e Misri, abalume bosi b’amalwa* mubaholera omo mbwarara omughulu babya omo lughendo bakalua e Misri.
5 Abandu bosi abalua e Misri babya ibanabanibwe, aliwe abandu bosi ababutirawa omo mbwarara ibane omo lughendo bakalua e Misri babya isibabanibwe.
6 Abaisraeli mubaghenda omo mbwarara emyaka 40 erihika oho ekihanda kyosi kyaholera, ni bugha ambu abalume bosi b’amalwa abalua e Misri abatowa omulenge wa Yehova. Yehova mwalapirabo ngoko syendisyabalighira n’ahake erilangira ekihugho ekyo Yehova abya iniabirilapira abotata-kulu wabo ngoko akendisyatuha; ekihuhgo ekikasendamo amasabu n’obuki.
7 Neryo mwimya abana babo omo mwanya wabo. Aba bo Yosua abanaya. Mubabanibwa kusangwa mubatabanibwa omughulu babya omo lughendo.
8 Babere babugha eribania ekihanda kyosi, Abaisraeli mubasighala aho babya omo kambi erihika aho abalume abo balamira.
9 Neryo Yehova mwabwira Yosua ati: “Munabwire namabalusyako akaghonero k’Abanya Misri. Neryo aho hakuhulawa mo Gilgali* erihika na munabwire.”
10 Abaisraeli mubalola embere eriikala omo kambi e Gilgali. Neryo omw’igholo ry’ekiro kye 14 ky’omwisi oyo, mubakola Epasaka* omo mbwarara ye Yeriko.
11 Neryo engyakya y’ekiro ky’Epasaka,* ekiro ekyo kisa-kisa mubatsuka erirya oko by’omo kihugho ekyo, omukati owatemo levire* n’esyonguma esikalangire.
12 Neryo omughulu batsuka erirya oko by’omo kihugho ekyo, ekiro ekyakwama amana mumbya; Abaisraeli mubatsyabya bakabana amana. Aliwe oko mwaka oyo mubatsuka erirya eby’omo kihugho kye Kanana.
13 Yosua iniane hakuhi ne Yeriko mwasumba ameso amalangira omulume inianimene embere siwe inianawite oko muyali omo byala biwe. Yosua mwaseghera aho ali, amamubulya ati: “Uli oko luhande lwetu, kutse oko luhande lw’esyonzighu syetu?”
14 Omulume oyo mwasubirya ati: “Iyehe, aliwe ngasa mo mukulu w’emilondo ya Yehova.” Neryo Yosua mwakukama amunamya obusu bwiwe bw’ahisi n’erimubwira ati: “Omukama waghe mwakaletera omughombe wiwe y’omulaghe wahi?”
15 Omukulu w’emilondo ya Yehova mwabwira Yosua ati: “Lusaya ebiryato byaghu. Kusangwa aho wimene hano habuyirire.” Yosua mwalw’iniakola atya.
Amaelezo awehikwa
^ Kinywa kwa kinywa, “oluhande lw’ebwanga bw’engetse.”
^ Kinywa kwa kinywa, “muyanuna; muyahwerekerera.”
^ Kinywa kwa kinywa, “mubatasyabyamo mutima.”
^ Kutse “eribwe ry’omutwero.”
^ Kutse “eribwe ry’omutwero.”
^ Kikamaanisaya “Ekitwa ky’ebitsule.”
^ Kutse “abalume ababya n’emyaka y’eribya basuda.”
^ Kikamaanisaya “Erikumbaghalya; Erikumbaghalirya hali.”
^ Kutse “Erikiruka.”
^ Kutse “Erikiruka.”
^ Kutse “ekihamya.”
