Yosua 6:1-27
6 Neryo emilango ye Yeriko yabya iyabirikingwa kutsibu busana n’Abaisraeli. Sihabya oyo wabya akaluayo kutse oyukingirayo.
2 Yehova mwabwira Yosua ati: “Lebaya, nabirihira e Yeriko n’omwami wayo n’abalwi bosi b’amaka b’omuyi oyo omo byala byaghu.
3 Inywe balume bosi, abasuda mukenditimba oko muyi. Mukenditimba kugho ngendo nguma. Mukendikola mutya omo biro 6.
4 Ukendibwira abahereri 7 uti bakendibya embere sy’erisanduku ibanahekire amahembe 7 w’embangale. Aliwe oko kiro kye 7 mukendisyatimba oko muyi ngendo 7, n’abahereri bakendisyabuha amahembe.
5 Omughulu amahembe w’embangale akendisyabuhwa—mukanowa omulenge* w’engubi, abandu bosi bakendisyabuya olukanda lunene lw’amalwa. Neryo oluhimbo lw’omuyi lukendisyatera, n’abandu bakendisyingira omo muyi. Obuli mundu akendisyalw’iningira omo muyi.”
6 Neryo Yosua mughala wa Nuni mwabirikira abahereri bo haghuma. Mwabwirabo ati: “Mwimaye erisanduku ry’endaghane. N’abahereri 7 bakendiheka amahembe 7 w’ebangale embere sy’Erisanduku rya Yehova.”
7 Neryo mwabwira abasuda ati: “Mughende, mutimbe oko muyi. N’abasuda abahekire ebyamano by’amalwa bakendibya embere w’Erisanduku rya Yehova.”
8 Ngoko Yosua anabwira abusuda, abahereri 7 abahekire amahembe 7 w’embangale embere sya Yehova, mubabya embere ibanemubuha amahembe ayo. Erisanduku ry’endaghane ya Yehova ryabya irinabakwamire enyuma.
9 Abasuda abahekire ebyamano by’amalwa mubabya embere sy’abahereri ababya bakabuha amahembe. N’omulondo w’enyuma w’abasuda abya akwamire erisanduku, amahembe inianemubuhwa lughumerera.
10 Neryo Yosua abya iniabiribwira abasuda ati: “Isimwabughaya olukanda kutse emilenge yenyu isiyowika. Ekinywa n’ekighuma isikyalua omo buno bwenyu, erihika ekiro ngendisyababwira niti, ‘Mubughaye olukanda!’ Nenyu mukendisyabuya olukanda.”
11 Oko kinywa kya Yosua, Erisanduku rya Yehova muryatimba oko muyi kw’engendo nguma. Enyuma sy’aho mubasuba oko kambi, bamaghotserako.
12 Ekiro ekyakwama, Yosua mwabuka omo tututu. Neryo abahereri mubimya Erisanduku rya Yehova.
13 Abahereri 7 abahekire amahembe 7 w’embangale mubaghenda embere sy’Erisanduku rya Yehova ibanemubuha amahembe lughumerera. Abasuda abahekire ebyamano by’amalwa babya ibane embere syabo. Omulondo w’enyuma w’abasuda abya inianakwamire Erisanduku rya Yehova, amahembe inianemubuhwa lughumerera.
14 N’ekiro ky’akabiri mubatimba oko muyi ko ngendo nguma. Enyuma sy’aho mubasuba omo kambi. Mubakola batya omo biro 6.
15 Ekiro kye 7 mubabuka omo mitsange, bamatimba oko muyi ngoko banalue bakakola. Mubatimba kugho ko ngendo 7. Ekiro ekyo kisa kyo batimba oko muyi ko ngendo 7.
16 Oko ngendo ye 7 abahereri mubabuha amahembe. Na Yosua mwabwira abasuda ati: “Mubughaye olukanda, kusangwa Yehova abiribaha omuyi!
17 Omuyi n’ebyosi ebirimo litolere ibyatoghotibwa; owosi ni wa Yehova. Rahabu, omumbalaka musa yo mukendisigha, iye n’abosi abali haghuma naye omo nyumba yiwe; kusangwa mwabisa abatumwa abo twatuma.
18 Muyiteghaye oko bindu ebitolere ibyatsandibwa, mukasyayitsutsa ekindu kyosi-kyosi ekitolere ikyaheribwa neryo imwimyakyo. Mwamabimyakyo, imukendileta obuhanya* oko kambi ye Isareli, neryo iyabya kindu ekitolere eritoghotibwa.
19 Aliwe efeza* yosi, ehoro, n’ebindu by’ekwivre,* n’ekyuma, oko Yehova bibuyirire. Litolere ibyaya omo kighona kya Yehova.”
20 Neryo omughulu amahembe abuhawa, abasuda mubuta obwogho. Abasuda babere babinowa omulenge w’amahembe, n’eryuta obwogho bunene ng’omulenge w’amalwa, oluhimbo mulwatera. Neryo abasuda mubingira omo muyi. Mubalw’ibingira mugho n’erihambagho.
21 Mubita abalume bosi n’abakali bosi omo muyali; mubita abalere n’abakulu. Kandi mubita n’esyonume sy’esyonde, esyombuli, n’esyopunda.
22 Yosua mwabwira abalume babiri abayapelelezaya* ekihugho ati: “Mughende omo nyumba y’omumbalaka. Mumuhulukaye, iye n’ebyosi ebyo awite ngoko mwanamulapira.”
23 Neryo abalwana abapelelezi* abo mubaghenda bamahulukya Rahabu, haghuma na baba wiwe, na mama wiwe n’abaghala babo n’abandu biwe bosi. Mubahulukya ekihanda kyosi. Neryo mubatwalabo mbolere omo mwanya owabya ehihya w’ekambi y’Abaisareli.
24 Neryo mubatimya omuyi n’ebyosi ebyabya mugho omo muliro. Nikwa efeza,* ehoro, n’ebindu by’ekwivre* n’ekyuma, mubabikabyo busana n’ekighona ky’enyumba ya Yehova.
25 Omumbalaka ye Rahabu musa yo Yosua atita haghuma n’enyumba ya baba wiwe n’abandu biwe bosi. Omukali oyo anikere omo Isareli erihika na munabwire. Kusangwa mwabisa abatumwa abo Yosua atuma eriyapelelezya* e Yeriko.
26 Oko mughulu oyo Yosua mwalahirya* ati: “Atakirawe embere sya Yehova omundu oyukendisyabukamo amalengekania w’eritasyahimba omuyi we Yeriko. Omughulu akendisyahimba efondasyo* yagho akambere kiwe kakendisyahola. N’omughulu akendisyahirako esyongyo, akatungo kiwe kakendisyahola.”
27 Neryo Yehova abya haghuma na Yosua. Naye mwakumayira omo kihugho kyosi.
Amaelezo awehikwa
^ Kutse “omulenge muli.”
^ Kutse “eriyitwa engebe nguhi; omukosi.”
^ Ni kindu ky’obughuli ekikalua omo kitaka.
^ kutse “omulinga.”
^ Kutse “abasyalinga.”
^ Kutse “abalingyi.”
^ Ni kindu ky’obughuli ekikalua omo kitaka.
^ Kutse “omulinga.”
^ Kutse “eriyalinga.”
^ Kutse alinga, “mwalapisya abandu.”
^ Kutse “ekibanza.”
