Yosua 7:1-26
7 Nikwa Abaisraeli mubatasikya ekihano ky’oMungu ekilebirye ebindu ebyabya bitolere ibyaheribwa. Kusangwa Akani mughala wa Karmi, mughala wa Zabdi, mughala wa Zera, ow’ekihanda kya Yuda mwimya oko bindu ebyabya bitolere ibyaheribwa. Neryo Yehova mwahitana kutsibu oko Baisraeli bosi.
2 Neryo Yosua mwatuma abalume erilua e Yeriko bamaya e Ai eyiri hakuhi ne Bete-aveni n’oko luhande lw’eyo eryuba rikasira lwe Beteli. Mwabwirabo ati: “Muhetuke, muyapelelezaye ekihugho. Neryo abalume abo mubahetuka bamayapelelezya omuyi we Ai.
3 Mubabya babisuba eyiri Yosua mubamubwira bati: “Abasuda bosi isibahetukirayo. Abalume nga 2 000 kutse 3 000 batosire erikinda e Ai. Isiwatwalayo abasuda bosi bakasyaluhirayo buyira. Kusangwa yiri abandu bake buyira.”
4 Neryo muyahetukira abasuda nga 3 000. Aliwe abalume be Ai mubatibityabo.
5 Abalume be Ai mubita mubo mw’abasuda nga 36, kandi mubakwamirirabo erilua oko lukyo lw’omuyi erihika e Shebarimi.* Mubitirabo n’omo bwandaghala. Neryo obutubaha* bw’abandu mubwahwerekerera n’erisenda ng’amaghetse.
6 Neryo Yosua mwatulanga esyongyimba siwe n’eritulama oko kitaka embere sy’Erisanduku rya Yehova, erihika omw’igholo, iye n’abasyakulu be Israeli. Kandi mubwira ibanemughusa oko mitwe yabo kw’olututu.
7 Yosua mwabugha ati: “Iyooo! Mwami Mukulu Yehova busanaki muwasokya abandu bosi aba be Yordani erisyatuhira omo byala by’Abaamori batwite? Kyangabere kibuya ko twasighala oko ghundi mwisirya* we Yordani!
8 Yehova unganyire. Nitasyabugha nitiki? E Israeli yabiritibita* ikasagha esyonzighu syayo.
9 Omughulu Abakanani n’abikalani b’omo kihugho bakendyowa omwatsi oyo bakenditutimbako n’eribirya erina ryetu omo kihugho. Neryo ukendikolaki busana n’erilwira oko rina ryaghu rikulu?”
10 Yehova mwasubirya Yosua ati: “Hangana! Busanaki ukasighala ighununamirye obusu bwaghu bw’ahisi?
11 E Israeli yabirikola erilolo. Babiriketa endaghane yaghe eyo nabwirabo niti litolere ibateya. Mubakimaya oko bindu ebilue bitolere ibyaheribwa. Mubakibabyo n’erihirabyo bubiso-biso omo bindu byabo.
12 Busana n’ekyo, Abaisraeli sibenditoka erihangana embere w’esyonzighu syabo; bakendilolya oko syonzighu syabo kw’emighongo n’eritibita. Kusangwa babiribya ekindu ekitolere eriheribwa. Sinendisyabya haghuma nenyu mwamatendilusya omo kati-kati kenyu mw’ekindu ekitolere eriheribwa.
13 Hangana uhighule* abandu! Ubwirebo uti, ‘Muyihighule busana n’omungya. Kusangwa Yehova oMungu wa Israeli ati: “Iwe Isareli ekindu ekitolere eriheribwa kine omo kati-kati kenyu. Simwenditoka erihangana embere w’esyonzighu syenyu erihika aho mukendiyilusiryako ekindu ekitolere eriheribwa ekyo.
14 Omungya omo tututu mukendisyasa embere sya Yehova erikwamana n’ebihanda. Ekihanda ekyo akendisyasombola kikandisyaseghera hakuhi, kitunga oko kitunga. Ekitunga ekyo Yehova akendisyasombola, kikendisyaseghera hakuhi, nyumba oko nyumba. N’enyumba eyo Yehova akendisyasombola ikendisyaseghera hakuhi, mulume kwa mulume.
15 Neryo oyukendisyasungika n’ebindu ebitolere eriheribwa, akendisyatimibwa omo muliro, iye n’ebyosi ebyo awite. Kusangwa mwakaketa endaghane ya Yehova kandi mwakakola ekindu ekikita nye omo Israeli.”’”
16 Neryo engyakya, Yosua mwabuka omo tututu. Mwahindania Abaisareli bosi bo haghuma, kihanda kwa kihanda. Neryo ekihanda kya Yuda mukyasombolwa.
17 Mwaleta ebitunga by’ekihanda kya Yuda byo hakuhi, neryo ekitunga ky’Abazera mukyasombolwa. Enyuma sy’aho mwaleta ekitunga ky’Abazera kyo hakuhi, mulume kwa mulume. Neryo Zabdi mwasombolwa.
18 Oko nduli mwaleta enyumba ya Zabdi yo hakuhi, mulume kwa mulume. Na Akani mughala wa Karmi, mughala wa Zabdi, mughala wa Zera, ow’ekihanda kya Yuda mwasombolwa.
19 Neryo Yosua mwabugha na Akani ati: “Mughala kisi, usikaye Yehova Mungu wa Isareli kandi umubwire ebyosi. Ngakulemba-lemba umbwire ekyo ulyakola. Kisi isiwanibisa mwatsi.”
20 Akani mwasubirya Yosua ati: “Oko kwenene ningye nilyahalaya oko Yehova Mungu wa Israeli. Eki kyo niryakola.
21 Omughulu niryalangira omo bindu ebiryanyeghawa, mw’erikoti eryuwene ry’abakulu erye Shinari, n’esyoshekeli* 200 sy’efeza,* n’omuraba mughuma w’ehoro ow’obulito bw’esyoshekeli 50, mungayitsutsabyo neryo namahekabyo. Binabisire omo kitaka, omo hema yaghe. N’esyofranga sine ahikwa kubyo.”
22 Yosua mwalw’iniatuma abandu, bamalw’ibatibita eyiri ehema eyo. Olukimba olo, lwabya ilunabisire omo hema yiwe n’esyofranga isine omwisi walo.
23 Neryo mubahulukya ebindu ebyo omo hema n’eriletabyo eyiri Yosua n’Abaisraeli bosi ababya haghuma naye. Neryo mubahirabyo embere sya Yehova.
24 Yosua n’Abaisraeli bosi ababya naye mubimya Akani mughala wa Zera, efeza,* erikoti ry’abakulu, omuraba w’ehoro, baghala biwe n’abali biwe, enume yiwe y’ende, epunda yiwe, n’ekihyo kiwe, n’ehema yiwe, n’ebindu biwe byosi, bamaletabo omo Musya* we Akori.
25 Yosua mwabugha ati: “Busanaki mukatuletera obuhanya* bungaha n’obu? Munabwire Yehova akendikuletera obuhanya.” Neryo Abaisraeli bosi mubamwita omo mabwe. Enyuma sy’aho mubabatimya omo muliro. Abosi mubitabo omo mabwe.
26 Mubamulundako ekilundo ky’amabwe. Na munabwire kikineyo. Neryo erihitana rinene rya Yehova mulyatulera. Kyo kikaleka aho ihahulwa mo Musya we Akori,* erihika na munabwire.
Amaelezo awehikwa
^ Kikamaanisaya “Amakariere.”
^ Kutse “omutima.”
^ Ni bugha ambu, “oluhande eyo ryuba rikasira.”
^ Kutse “erilolya omughongo.”
^ Kutse “eriyirwamo mubuyirire.”
^ Eshekeli nguma ini grama 11.4. Ulebaye Endomeko B14.
^ Ambu ni kindu ky’obughuli ekikalua omo kitaka thami.
^ Ambu ni kindu ky’obughulu ekikalwa omo kitaka tami.
^ Kutse “ekiharo.”
^ Kutse “obubi akahangyi.”
^ Kutse “ekiharo.”
