Yosua 8:1-35
8 Neryo Yehova mwabugha na Yosua ati: “Isiwubaha kandi isiwatitimana. Ughende n’abalume baghu bosi b’amalwa, uyalwe ne Ai. Nabirihira omwami we Ai, abandu bayo, n’ekihugho kyabo omo byala byaghu.
2 Ukendikolera omwami we Ai ngoko wanakolera omwami we Yeriko. Aliwe hano mukendiheka ebindu n’ebihangulo byabo. Mukendilimbyabo enyuma w’omuyi.”
3 Yosua n’abasuda bosi mubahetuka, bamayalwa ne Ai. Yosua mwasombola abalume b’amalwa esyombangyi 30 000, amabatuma omo kiro.
4 Mwabaha ekyalayiro ati: “Mukendilimbya omuyi enyuma wagho. Isimwaya hali oko muyi, kandi inywe bosi mubye imunayiteghekire.
5 Ingye n’abandu bosi abali haghuma naghe tukendiseghera hakuhi n’omuyi, neryo bakendyasa baksyalwa netu ngoko bakola ekindi kiro. Tukenditibita.
6 Bakendibya babihuluka bakatukwamirira, tukenditwalabo hali oko muyi, kusangwa bakendibugha bati, ‘Kandi twamabitibityabo ng’ekindi kiro.’ Netu tukendibya nga tukatibita tukasaghabo.
7 Neryo mukendilua eyo mulue mubiseme mukalimbya omuyi, imwahambagho; Yehova oMungu wenyu akandibahagho.
8 Mukendibya mwabinahamba omuyi, mukendilw’imwatimyagho. Litolere imwakola erikwamana n’ebinywa bya Yehova. Eryo rye rihana eryo namabaha.”
9 Neryo Yosua mwatumabo, nabo mubaya aho bakendilimbirya omuyi. Mubaya omo kati-kati ke Beteli ne Ai, oko luhande lw’eyo eryuba likalengera lwe Ai. Omo kiro, Yosua iye mwaghotsera eyiri abandi.
10 Yosua mwabuka omo tututu, amahindania abasuda biwe. Iye n’abakulu be Israeli mubasondolabo, bamaya e Ai.
11 Abalume bosi b’amalwa ababya haghuma naye muberuka, bamahika hakuhi n’omuyi. Mubahira ekambi oko luhande lw’endata lw’omuyi we Ai. Omo kati-kati kabo n’omuyi we Ai habya omusya.
12 Yosua abya iniabirituma abalume nga 5 000 omo kati-kati ke Beteli ne Ai eriyalimbya omuyi oko luhande lw’eyo eryuba likalengera.
13 Neryo mubahira ekambi nene oko luhande lw’endata lw’omuyi, n’omulondo w’enyuma w’abasuda abya oko luhande lw’eyo eryuba likarengera lw’omuyi. Omo kiro Yosua mwandaghalira omo kati-kati k’omusya.*
14 Omwami we Ai abere abilangira ekyo, iye n’abalume b’omo muyi mubabuka omo tututu, bamalw’ibanguha eriyalwa ne Israeli omo kiharo ekisamalirene n’eribanda ly’embwarara. Nikwa omwami abya isyasi ngoko enyuma sy’omuyi yine ababirilimbyagho.
15 Omughulu abalume be Ai basa erisyalwa, Yosua n’Abaisraeli bosi mubatibita bamalola eyiri embwarara.
16 Neryo abandu bosi b’omo muyi mubabwirwa ambu bakwamirirebo. Neryo omughulu babya bakakwamirira Yosua, mubaya hali oko muyi.
17 E Ai ne Beteli muyitasighala omulume n’omughuma, abosi mubakwamirira Abaisraeli. Mubasigha omuyi butsira obuteya bosi-bosi, bamakwamirira Abaisraeli.
18 Yehova mwabugha na Yosua ati: “Usumbe akatumo akali omo byala byaghu, ulolerayeko e Ai, kusangwa ngendihira omuyi we Ai omo byala byaghu.” Neryo Yosua mwasumba akatumo akali omo byala biwe, amaloleryako oko muyi.
19 Omughulu asumba ebyala biwe, ababya bakalimbya mubalua eyo babya. Mubalw’ibingira omo muyi n’erihambagho, n’erilw’ibatimyagho aho n’aho.
20 Neryo abalume be Ai babere bakebera enyuma, mubalangira omuki akalua omo muyi, akerukira omo kyanya. Mubayibula, bamabula nga batibite hayi. Abasuda ba Yosua ababya bakatibita erilolera omo mbwarara mubabindukira ababya bakabakwama.
21 Omughulu Yosua n’Abaisraeli bosi balangira ngoko ababya bakalimbya omuyi bamabihambagho n’erilangira omuki akeruka akalua omo muyi, mubabinduka bamalwa n’abalume be Ai.
22 Abandi Baisraeli mubasira omo muyi erisyalwa nabo. Abalume be Ai mubabya omo kati-kati k’Abaisraeli; abandi oko luhande olu n’abandi oko lundi. Neryo Abaisareli mubitabo, abosi. Muhatabya oyukasaka kutse oyukabala.
23 Aliwe mubahamba omwami we Ai, bamamuleta eyiri Yosua.
24 Abaisareli babere babugha eriita abikalani bosi be Ai b’omoli, omo mbwarara eyo bakwamirirabo, abosi ibamabitwa omo muyali, Abaisraeli bosi mubasuba e Ai, bamita abandu bosi ababyayo omo muyali.
25 Abosi abakwa ekiro ekyo abalume n’abakali babya 12 000, abandu bosi be Ai.
26 Yosua mwatakimya ebyala biwe ebyasumbamo akatumo erihika aho abughira eriita abandu bosi be Ai.
27 Abaisraeli mubiyimirya ebihangulo ebyo banyegha omo muyi oyo, erikwamana n’ebyo Yehova alayira Yosua.
28 Neryo Yosua mwahisya omuyi we Ai omo muliro n’eriyiragho mo kilundo ky’amabwe erihika na munabwire.
29 Mwahanika omwami we Ai oko muti erihika omw’igholo. Neryo eryuba ryabere rikasonda erilenga, Yosua mwabugha ati ekinda kiwe kilusibawe oko muti. Mubaghusakyo oko lukyo lw’omuyi. Mubamulundako ekilundo ky’amabwe erihika na munabwire.
30 Neryo Yosua mwahimbira Yehova Mungu we Israeli y’ekiherero oko Kitwa kye Ebali,
31 ngoko Musa omughombe wa Yehova anabya iniabirilayira Abaisraeli ngoko kihandikirwe omo kitabu ky’Emighambo ya Musa: “Ekiherero ky’amabwe awatabatsire awatatulako ekyuma.” Mubaherera kukyo kw’amahere w’eryokererya n’amahera w’obuholo* busana na Yehova.
32 Neryo eyo, mwahandika oko mabwe kw’Emighambo eyo Musa ahandika embere sy’Abaisareli.
33 Abaisraeli bosi, abasyakulu babo, abakulu, n’abatsweri babo babya ibanimene oko syombande ibiri sy’Erisanduku, eryabya embere sy’abahereri Abalawi ababya bahekire erisanduku ry’endaghane rya Yehova. Ababunga n’esyombutirwa, abosi babya ibaneho. Enusu ya kubo yabya imene embere sy’Ekitwa kye Gerizimu, n’eyindi nusu yabya imene embere sy’Ekitwa kye Ebali ngoko Musa omughombe wa Yehova anabya iniabirilayira busana n’eritsumula Abaisraeli.
34 Enyuma sy’aho, mwasoma omo mulenge muli ebinywa byosi by’Emighambo, emiyisa n’eritakira, erikwamana n’ebyosi ebihandikire omo kitabu ky’Emighambo.
35 Sihali n’ekinywa n’ekighuma oko binywa ebyo Musa abugha ekyo Yosua atasoma omo mulenge muli embere sy’endeko yosi ye Israeli. Habya n’abakali, abana, n’ababunga ababya bikere* omo kati-kati kabo.
Amaelezo awehikwa
^ Kutse “ekiharo.”
^ Kutse “amahere w’erisangania.”
^ Kinywa kwa kinywa, “ababya bakalendera.”
