Yosua 9:1-27
9 N’abami bosi ababya oko luhande lw’eyo eryuba rikalengera lwe Yordani, ababya omo bitwa, ababya omo Shefela,* n’ababya oko musike wosi w’Engetse Nene,* n’embere we Lebanoni mubowa engulu eyo. Aba babya bami b’Abahiti Abaamori, Abakanana, Abaperizi, Abahivi, n’ab’Abayebusi.
2 Babere babyowa engulu eyo, mubayighunga haghuma eriyalwa na Yosua n’Abaisraeli.
3 Abikalani be Gibeoni nabo mubowa oko ebyo Yosua abirikolera e Yeriko ne Ai.
4 Neryo mubakola omo mayele. Mubahira esyondanda omo syongunza esyabirikula. Mubaheka n’ebindu by’engobi eby’erihiramo edivai ebyabya ibyabirikula kandi ebisona-sonire, bamabihirabyo oko syopunda syabo.
5 Kandi mubambala ebiryato ebikulire ebisona-sonire. Mubambala n’ebisangyi.* Emikati yosi y’endanda yabya iyabaryuma n’eritsuka eritotongoka.
6 Neryo mubaya eyiri Yosua oko kambi kwe Gilgali. Neryo mubabwira Yosua n’abalume be Israeli bati: “Tukalua omo kihugho ky’ehali. Neryo tukabasaba tuti mukole endaghane haghuma netu.”
7 Aliwe abalume be Israeli mubasubirya Abahivi abo bati: “Si mwanganabya imwikere hakuhi netu. Neryo twangatoka tuti erikola endaghane nenyu?”
8 Mubasubirya Yosua bati: “Tuli baghombe* baghu.”
Neryo Yosua mwabulyabo ati: “Muli bahi, kandi mukalua hayi?”
9 Nabo mubasubirya Yosua bati: “Abaghombe baghu bakalua omo kihugho ky’ehali busana n’engulu ya Yehova Mungu waghu. Kusangwa twabiryowa erikumayira liwe, n’ebyosi ebyo akola e Misri,
10 n’ebyosi ebyo akolera abami babiri b’Abaamori, ababya oko ghundi musirya* we Yordani, omwami Sihoni we Heshboni n’omwami Ogi we Bashani oyo wabya e Ashtaroti.
11 Neryo abasyakulu betu n’abikalani bosi omo kihugho kyetu mubakatubwira bati, ‘Mwimaye endanda busana n’olughendo. Mughende eyo bali mubwirebo muti: “Tukendibya baghombe benyu; neryo tukabasaba tuti mukole endaghane haghuma netu.’”
12 Emikati eno eyo twahekamo ndanda, twahekayo iyikinahuhire tukahongoka erilua omo manyumba wetu, tukasa eyo muli. Nikwa mulangire! y’eno yabiryuma n’eritsuka eritotongoka.
13 N’esyongobi sy’erihiramo edivai esi syabya nyihya-nyihya omughulu twahira y’omo, nikwa lino syabiritulangika, n’esyongyimba n’ebiryato byetu byabiritulangika busana n’olughendo luli.”
14 Abalume be Israeli babere babyowa ekyo, mubimya* oko ndanda y’abandu abo, nikwa mubatabulya Yehova.
15 Yosua mwakola nabo endaghane y’obuholo ey’eritenditabo, n’abakulu b’endeko nabo mubalahirya erisikya andaghane eyo.
16 Habere halaba ebiro bisatu ibabirikola nabo endaghane, mubowa ngoko ni b’ahakuhi-kuhi kandi ngoko bahererenie nabo.
17 Neryo Abaisraeli mubahongoka bamahika oko miyi yabo ekiro ky’akasatu. Emiyi yabo yabya Gibeoni, Kefira, Beeroti, ne Kiriati-yearimu.
18 Aliwe Abaisraeli mubatalwa nabo, kundi abakulu b’endeko babya ibabirilahirya omo rina lya Yehova oMungu wa Israeli ngoko sibangabakola nabi. Neryo endeko yosi muyatsuka eriyilungumula oko bakulu b’abandu.
19 Okw’ekyo abakulu mubabwira endeko yosi bati: “Situli n’ehamuli y’eribakola nabi, kusangwa twabirilahirya omo rina rya Yehova oMungu wa Israeli ngoko sitwangabakola nabi.
20 Tukendiyira tutya: Sitwendibita, oMungu akasyatuhitanako kundi mutwalahirya busana nabo.”
21 Abakulu mubatomekako bati: “Isimwitabo, aliwe bakendibya basenyi b’esyongwi n’abatehi b’amaghetse ab’endeko yosi.” Abakulu ko babiriyisogha batya busana nabo.
22 Neryo Yosua mwabirikira Abagibeoni amababulya ati: “Busanaki mumukatuteba muti: ‘Tukalua omo kihugho ekiri hali kw’inywe,’ kwesi imunahererenie netu?”
23 Eritsuka lino muli batakirwa. Mukendisyabya bakobe mughulu wosi. Mukendisyabya basenyi b’esyongwi, n’abatehi b’amaghetse b’enyumba y’oMungu waghe.”
24 Mubasubirya Yosua bati: “Ni busana abaghombe baghu mubabwirwa burora-rora ngoko Yehova Mungu waghu mwalayira Musa omughombe wiwe ati akendisyabaha ekihugho kyosi n’eritoghotya abikalani bosi ba mukyo embere syenyu. Neryo mumwalekire itwakwa obuba busana n’obuyingo* bwetu. Kyo kiryaleka itwakola tutya.
25 Lino tuli omo byala byaghu. Utukolere ekyo ukendilangira ikyuwene omo meso waghu.”
26 N’ekyo kyo anabakolera; mwalamyabo omo byala by’Abaisraeli, nabo mubatitabo.
27 Nikwa erilua ekiro ekyo, Yosua mwabayira mo basenyi b’esyongwi n’abatehi b’amaghetse busana n’endeko n’ekiherero kya Yehova, omo mwanya ogho Mungu angasombola. Ko bakinakola batya erihika na munababwire.
Amaelezo awehikwa
^ Kutse, “omw’ibanda.” Ni bugha ambu, “ehitwa hikuhi-hikuhi.”
^ Ni bugha ambu, Engetse ye Mediterania.
^ Kutse “ebibaka; esyongyimba esitulangikire.”
^ Kutse “abakobe.”
^ Ni bugha ambu, oluhande lw’eyo eryuba rikasira.
^ Kutse “mubayiteghererya.”
^ Kutse “esyonafsi syetu.”
