Ebaruha ya Yuda 1:1-25
1 Ebaruha eno ikalua oko Yuda, omughombe wa Yesu Kristo, aliwe omughala wabo Yakobo. Akahandikirayo ababirikirawa abo oMungu Tata anzire. Mwateyabo kundi bali omo bughuma na Yesu Kristo.
2 Ngasaba niti oMungu abakanganaye obughanyiri bunene, abahe obuholo bunene kandi abanze kutsibu.
3 Banzwa baghe, nabya nanzire kutsibu eribahandikira oMungu nga akendisyatusabula ati. Aliwe lino, namalangira ini ky’omughaso eribahandikira n’eribahira m’omuhwa w’erilwira kutsibu oko bwikirirya, obwahabawa ababuyirire kaghuma kasa.
4 Ekikaleka inabahandikira ni kundi hane abandu balebe ababiriyimbomberya omw’inywe. Abandu abo Amasako abya iniabirikangania kera ngoko bakendisyahabwa amalipizi. Abandu abo sibasikirye oMungu, bakayihambulisanaya omo lukogho lw’oMungu, neryo ibabya n’emibere y’obutakw’isoni.* Kandi bakaleghula oko Mukama wetu mughuma musa Yesu Kristo, oyo itwe, tuli bandu biwe.
5 Nomo munasi emyatsi yosi eyo yo ndeke, nanzire eribibukya ngoko Yehova* abere abisabula abandu biwe omw’ibalusya e Misri, mwatoghotya abatabya n’obwikirirya.
6 N’abamalaika abalua omo mwanya wabo w’elubula n’erisigha emyanya yabo eyo babyamo, mwaboherabo kera na kera ahali omwirima munene, batoke erisyahabwa amalipizi ekiro kikulu kyabihika.
7 Kutya abandu b’omo muyi we Sodomo ne Gomora n’ab’omo miyi eyabya yibatimbireko babya ibabeghere erikola oburaghane* obukita esyonye, n’eriberererya esyongumbu nyibi sy’omubiri omo nzira eyite y’akawaida, mubahabwa amalipizi omo muliro wa kera na kera. Eky’erileberyako kyabo kikatukunga.
8 Aliwe, abandu abo bakabya ibanemulengekania oko myatsi mibi, bakatsandaya emibiri yabo n’ey’abandi, bakaghonera abatabali, kandi bakabugha muhanda oko bandu b’olukengerwa.
9 Aliwe, omughulu Mikaeli, omumalaika mukulu, akuba obuhaka na Diabolo busana n’omubiri wa Musa, mwayikehya, kandi mwatamutswera n’erimubwira ebinywa ebikalire. Aliwe, mwabugha ati: “Yehova* akuhayire!”
10 Nikwa abandu aba bakabya ibanemubugha muhanda oko myatsi yosi eyo batebataminya ndeke-ndeke. Bali ng’esyonyama esitawite hakili. Kandi emyatsi yosi eyo bakakola, bakakolayo ng’esyonyama, n’emyatsi eyo ikabaheraya.
11 Bulighe okw’ibo! Kundi babirikwama emibere ya Kaini. Busana n’omusahara, babirihumayira n’erikwama enzira nyibi eyo Baalamu ahereramo. Kandi nga Kora, bakabugha muhanda oko bandu abakabasondola, n’ekyo kikendisyaleka ibatsandibwa.
12 Abandu abo bakabya ibane haghuma nenyu omughulu mukakola esyofete sy’erikangania ngoko mwanzire abaghala benyu, aliwe bali ng’amabwe manene-manene awabiseme omo lusi. Ni balisya abakayilisaya ibibene butsira esisoni.* Ni bitu ebitemo amaghetse ebikatwalawa eyi n’eyi bikahekwa n’erihunga. Ni miti eyitehetaya amatunda nibya n’omo mughulu owatolere, eyabirihola ngendo ibiri,* kandi eyabirikulwa.
13 Ngoko ebisunda by’engetse ebighungire bikaghusa omutsafu oko musike, abandu abo bakakola emyatsi eyikita esyonye n’oko mwiso bakahemuka. Bali ng’esyongununu esitekwama enzira yasyo.* OMungu akendisyahirabo omo mwirima kera na kera.
14 Enoka, omundu w’eririnda (7) erilua oko Adamu, naye mwabugha obuminyereri oko bandu abo, omughulu abugha ati: “Yehova* akasa na makumi w’amaelfu w’abamalaika biwe babuyirire,
15 busana n’eritswera abandu bosi, n’erikangania ngoko abandu abatesikaya oMungu bali n’amakosa busana n’ebibi ebyo bakola, kandi busana n’ebinywa ebikala-kalire ebyo abakoli b’amalolo abo babugha oko Mungu busana n’eritendimusikya.”
16 Abandu abo bakayilungumula, sibalitsemera amaisa wabo, bakakwama esyongumbu syabo, bakabugha ebinywa by’eriyihalamba, bakapipa-pipa* abandu busana n’eribarondyako endundi.
17 Aliwe inywe, banzwa baghe, mwibuke ebinywa ebyabughawa kera n’abakwenda b’Omukama wetu Yesu Kristo.
18 Babya ibakababwira bati: “Omo mughulu w’enduli, hakendisyabya abandu abakasekereraya, abakakola erikwamana n’esyongumbu syabo nyibi.”
19 Abandu abo bakaghaba abandi, bakakola ng’esyonyama,* sibalisondolawa n’ekirimu* ky’oMungu.
20 Aliwe inywe, banzwa baghe, obwikirirya bwenyu bubuyirire bubawatikaye eribya n’akaghala, n’ekirimu ky’oMungu kisondole emisabe yenyu.
21 Ekyo kikendileka imwabya imunemukola emyatsi eyikendileka oMungu iniabanza, mukalindirira erighanyirwa n’Omukama wetu Yesu Kristo, erikendisyabakingulira enzira y’erisyabana engebe y’erikota.
22 Mubye mukaghanyira abandu abakatika-tika.
23 Musabulebo omw’ilusyabo omo muliro. Aliwe, mubye mukaghanyira abandi. Mukole mutya imunemusagha, nenyu mukasyayitsandya, ngoko ibo babiritsandya esyongyimba syabo omo mibere mibi.
24 Oyo wangabawatikya eritendikola erilolo, n’oyo wangabawatikya erimana embere sy’olukengerwa* lwiwe imunatsemire kutsibu, kandi isimuliko omutsafu,
25 oMungu mughuma musa oyukatusabula erilabira Yesu Kristo, Omukama wetu, ahabawe olukengerwa, obukulu, obutoki, n’obutabali, eritsuka oko mighulu ya kera, lino, na kera na kera! Amina!
Amaelezo awehikwa
^ Kutse “emibere y’eritendikw’isoni.” Omo Kigiriki ni a·selʹgei·a. Ulebaye amaana w’ebinywa.”
^ Ulebaye endomeko A5.
^ Ulebaye amaana w’ebinywa.
^ Ulebaye endomeko A5.
^ Kinywa kwa kinywa, “obuba.”
^ Kutse “eyabirihola olosi.”
^ Kutse “esikaghalaghanda.”
^ Ulebaye endomeko A5.
^ Kutse “bakabya ngabakatsemera emibere y’abandi.”
^ Kutse “ni bandu b’ekinya-mubiri.”
^ Kinywa kwa kinywa, “sibawite ekirimu.”
^ Kutse “ahali olukengerwa.”
