A2
Embindula eno yiri yiti?
Embindula y’erimbere y’EBiblia—Embindula y’ekihugho kihya-kihya (Matayo—Eribisulirwa) muyahuluka oko mwaka 1950. N’oko 1961, eyosi, eritsuka oko kitabu ky’Enzuko erihika oko kitabu ky’Eribisulirwa muyahuluka. Eritsuka oko mughulu oyo, amamilioni w’abandu banganasoma Embindula eyo omo mibughe mingyi oko 240. Embindula eyo siyirihengemaya emyatsi, ikasomeka bweghu-bweghu, kandi yabindulawa erikwamana n’emibughe y’erimbere-mbere.
Ekomite y’eribindula Embindula y’ekihugho kihya-kihya yasi ngoko ni ky’omughaso eribya n’embindula eyikatula oko mitima y’abandu abakasoma eBiblia munabwire. Eritoka ekyo, mubayikasa erikola emyatsi eyikwamire:
Erikolesya ebinywa bya lino, ebikowika. Embindula eno siyitakolesya ebinywa bya kera kutse ebikala-kalire ebikabanika omo sindi Biblia sy’Ekinande. Ekyerileberyako, ekinywa “eriyibombeka” ekikabanika omo sindi Biblia mukikabindulawamo “erihanda omutima” kundi kyo bandu bangyi babeghere erikolesya lino bakakania. (Abanya Galatia 5:22) Ebinywa “erikola ry’omubiri” mubikabindulawamo “emibere y’omubiri,” ekinywa “obuha” mukikabindulawamo “eritsuro.”—(Abanya Galatia 5:19-21).
Ebinywa ebiri omo Biblia mubikabindulawa omo nzira eyowikire. Esindi Biblia sikabugha siti Yesu mwaholera oko musalaba. Embindula eno ikakanganaya ndeke-ndeke ngoko Yesu mwaholera oko “muti w’amaghali,” butsira oko “musalaba.” Omo masako nga Matayo 10:38 ne Mariko 8:34, mutukakolesaya “omuti w’amaghali.” Amaana w’ebinywa alimo ekinywa ky’Ekigiriki n’amaana wakyo. Kandi, embindula eno muyikakolesaya ekinywa “Gehena” omo Matayo 5:22, 29, 30; Mariko 9:43; na Luka 12:5 omo mwanya w’ekinywa “omuliro w’ekulimu” ne “kulimu.”
Ebindi ebiri omo tafsiri eno:
Embindula eno yirimo ebinywa bilebe by’eyikwa. Emihanda y’ebinywa by’eyikwa yeno:
“Kutse” Ni yindi nzira y’eribughamo ekinywa kighumerera ky’Ekigiriki.—Matayo 1:1, ebinywa by’eyikwa oko “historia,” Abanya Galatia 5:19, “obutakw’isoni.”
“Kutse kandi” Ni yindi nzira y’eribughamo ekinywa kighumerera aliwe eyipisene hake.—Yakobo 5:15, “oyulwere”; 1 Petro 3:14, “ibasagha.”
“Kinywa kwa kinywa” Ni tafsiri y’ekinywa kwa kinywa y’ekinywa ky’Ekigiriki kutse amaana w’erimbere w’ekinywa ky’emibughe ya kera.—Matayo 6:12, “ebibi”; Emibiiri 26:8, “anganalubukya.”
Amaana w’ebinywa n’eyindi myatsi Amaana w’amena (Mariko 10:51, “Raboni”; 2 Abanya Korinto 6:15, “Beliali”); emyatsi eyikanirye oko bulito n’ebipimo (Luka 12:25, “okuboko”); emyatsi eyikawatikaya omundu eryowa ebyo akasomo yiri omo ndomeko n’amaana w’ebinywa.—Matayo 5:22, “Gehena”; Matayo 1:22, “Yehova”; Mariko 4:19, “kihugho.”
Ekitswe ekitangirire ebitabu by’eBiblia ekiri n’omutwe owakabugha ati “Emyatsi milebe y’erigha omo Biblia,” kiri mw’amakangirirya agho omundu atolere iniatsuka erigha. Enyuma sy’ekitabu ky’Eribisulirwa hali ekitswe “Ebitabu ebiri omo Biblia,” na “Amaana w’ebinywa ebiri omo Biblia.” Amaana w’ebinywa akawatikaya omusomi eriminya amaana w’ebinywa bilebe omughulu bikakolesibawa omo Biblia. Endomeko yirimo ebitswe bino: “Ebyerighenderako omo mubiiri w’eritafsiri eBiblia,” “ Embindula eno yiri yiti?,” “Ngoko eBiblia yatuhikako,” “Erina ry’oMungu omo Masako w’Ekigiriki w’Ekikristo,” ne “Emyatsi mikulu-mikulu omo ngebe ya Yesu oko kihugho”, yirimo n’esyotablo, esyokarte, n’eyindi myatsi eyangawatikya oyo wanzire erigha bingyi omo Biblia.
