Abandu balebe banganalengekania bati kusudi omusomi abane ebyabya omo mibughe eyo eBiblia yatsuka erihandikwamo, ritolere eBiblia iyabindulwa kinywa kwa kinywa, erikwamana n’emitondekere y’ebinywa omo mibughe ya kera. Aliwe ko bite bitya. Busanaki?

• Sihali emibughe eyibiri eyiwite esyokanuni sy’omubughe (grammaire) sighumerera, ebinywa bighumerera, n’emitondekere mighumerera y’ebinywa. Omuprofesere w’Ekiebrania, ye Samuel Driver, mwahandika ati emibughe “siyiwite esyokanuni ngumerera (grammaire), siyiwite emilihi mighumerera y’ebinywa, aliwe kandi . . . siyiwite emitondekere mighumerera y’ebinywa.” Emibughe siyiritondeka amalengekania omo nzira ngimerera. Omuprofesere oyo akatasyabugha ati: “Ekyo kyo kikaleka emitondekere y’ebinywa iyitasosana omo buli mubughe.”

• Munabwire, sihali omubughe owali mw’ebinywa kutse esyokanuni sy’omubughe esiri ng’esy’Ekiebrania, Ekiaramu n’Ekigiriki. Neryo, eBiblia yamabindulwa kinywa kwa kinywa, isiyendyowika kandi imukendibya amakosa.

• Amaana w’ekinywa kutse ebinywa anganabinduka erikwamana n’aho kikakolesibawa.

Omutafsiri anganatoka eribindula kinywa kwa kinywa ebyabya omo mibughe ya kera, aliwe ikikendimusaba eriyiteghererya kutsibu.

Tulebaye eby’erileberyako bilebe ebikakanganaya ngoko eribindula kinywa kwa kinywa ryanganaleka omwatsi iniatowika ndeke:

• EBiblia yikakolesaya ekinywa “erighotsera” erikania oko tughotseri oto omundu akaghotsera obuli kiro kutse erikania oko oyuholire. (Matayo 28:13; Emibiiri 7:60) Omughulu ekinywa ekyo kikakolesibawa omo milondo eyikakanaya oko luholo, abatafsiri b’eBiblia banganakolesya ebinywa “erighotsera omo luholo.” Ekyo kikawatikaya omusomi wa lino eritendihera.​—1 Abanya Korinto 7:39; 1 Abanya Tesalonika 4:13; 2 Petro 3:4.

• Omo Abanya Efeso 4:14, omukwenda Paulo mwakolesya ebinywa ebyanganabindulwa kinywa kwa kinywa mo “amasata w’esyode (jeu de six) w’abandu.” Ebinywa ebyo bya kera bikakanganaya ngoko abandu babya bakateba abandi omughulu babya bakasata amasata w’esyode. Omo mibughe mingyi, abandu sibangowa “amasata w’esyode (jeu de six) w’abandu” nga ni bugha ambu ki. Aliwe, kyamabindulwamo “amayele w’abandu,” ikikendyowika ndeke.

• Omo Abanya Roma 12:11, muli ebinywa by’Ekigiriki ebyanganabindulwa kinywa kwa kinywa mo “Ekirimu kibabereremo.” Omundu amasoma ebinywa ebyo omo Kinande, syangaminya amaana w’ebinywa by’Ekigiriki ebiri omo mulondo oyo. Kyo kikaleka omo tafsiri eno ibyabindulwamo “Ekirimu ky’oMungu kibahiremo omuhwa.”

• Omo makangirirya wa Yesu w’oko kitwa, Yesu akakolesaya ebinywa ebikabindulawa kangyi-kangyi mo “Omuyisa ari n’abera omo kirimu.” (Matayo 5:3, NTN62) Aliwe omo mibughe mingyi, ebinywa “abera omo kirimu” sibiryowika. Omundu anganalengekania ati ‘eribya mwera omo kirimu’ ry’eritendibya n’obwenge obughonere, eritendibya n’omuhwa, kutse eritendibya n’ekyo wimanireko. Aliwe, omughulu Yesu akolesaya ebinywa ebyo, abya akasonda eribugha ati eribana ebyo ulaghireko si kyo kikaleta obutseme, aliwe eriminya ngoko ulaghire oko busondoli bw’oMungu kyo kikaleta obutseme. (Luka 6:20) Neryo ritolere ebinywa ebyo ibyabindulwamo “abasi ko bali n’obwagha [bw’oMungu]” kutse “abasi ko balaghire oko Mungu.” Eribindulwa bitya rikaleka omundu iniowa amaana w’ebinywa ebyo omo mibughe ya kera.​—Matayo 5:3; The Bible in Kinandi.

Kwesi, eribindula eBiblia omo ghundi mubughe si bindula omo nzira ngumerera ekinywa kilebe ky’omubughe wa kera ahosi-hosi aho kyamabanika. Ritolere omutafsiri iniakolesya amenge atoke erisombola ebinywa omo mubughe wiwe ebiwite amaana maghumerera n’ebinywa ebiri omo mubughe wa kera. Kandi ritolere iniatondeka ebinywa erikwamana n’esyokanuni sy’omubughe wiwe kusudi ebyo akabindula bitoke erisomeka bweghu-bweghu.

Nomo bine bitya, siritolere erilabyaho kateho omughulu w’eritondeka ebinywa. Omutafsiri oyukayitswa eribindula omw’ikania oko mwatsi mulebe ko buli erikwamana n’amalengekania wiwe anganahengemya amaana w’ebinywa. Ati? Anganingiryamo amalengekania wiwe awahengemire akalengekania ati w’amaana w’ebinywa ebiri omo mibughe eyo eBiblia yahandikawamo, kutse iniabula erihiramo emyatsi y’omughaso. Ni kwenene, eribindula omw’ikania oko mwatsi mulebe ko buli ryanganaleka abasomi ibabya bakasomabyo bweghu-bweghu. Aliwe, ekyo kyanganaleka abasomi ibataminya ebyo omuhandiki w’eBiblia asonda eribugha.

Omutafsiri anganahengemya emyatsi busana n’ebyo ikirirye. Eky’erileberyako, Matayo 7:13 ikabugha yiti: ‘Enzira nene-nene ikakolaya okw’iheribwa.’ Alinga busana n’erikwama ebyo bikirirye, abatafsiri balebe mubakolesya ekinywa “omuliro” omo mwanya w’erikolesya ekinywa ekikamaanisaya “eriheribwa” omo Kigiriki.

Kandi ritolere omutafsiri w’eBiblia iniabya inianasi ngoko eBiblia yahandikawa omo mubughe ogho bandu ng’abakulima, abalisya, abasohi b’esyosamaki, babya bakakaniamo buli kiro. (Emibiiri 4:13) Neryo embindula y’eBiblia eyuwene ikabindula emyatsi omo nzira eyikendileka abandu bosi abanzire eriminya ekwenene ibowayo. Embindula eyuwene ikakolesaya ebinywa ebikowika luba ebyo bandu bakakolesaya buli kiro bakakania, butsira ebyo bandu batabeghere erikolesya.

Omo syotafsiri nene sya lino, abatafsiri babiriyitswa erilusyamo erina ry’oMungu, Yehova, nomo rikanabanika omo Biblia sya kera. (Ulebaye endomeko A5.) Omo syotafsiri nyingyi, babirihira erina ry’erisikya, ng’erina “Omwami Mukulu,” omo mwanya w’erina “Yehova.” N’omo sindi, babirilusyamo ebinywa ebikakanganaya ngoko oMungu anawite erina. Tuterilengekania oko musabe wa Yesu owali omo Yohana 17. Omo syotafsiri nyilebe, omulondo we 6 n’owe 26 akabugha ati: “Munakuminyikalya oko bandu wamba,” ne “Nabirikuminyisya kubo.” Aliwe, ritolere omusabe wa Yesu iniabindulwa atya: “Nabiriminyikalya erina ryaghu oko bandu abo wamba,” ne “Nabiriminyisyabo erina lyaghu.”

Ebinywa by’eritangirirya ebiri omo Embindula y’ekihugho kihya-kihya y’erimbere y’Ekingereza bikabugha biti: “Situlibindula omw’ikania oko mwatsi mulebe ko buli. Mutukayikasa eribindula kinywa kwa kinywa omughulu kyamatokekana aho Ekingereza kya lino kyamahamba n’aho eribindula kinywa kwa kinywa siribisire amaana.” Ekomite y’eribindula Embindula y’ekihugho kihya-kihya omo Kingereza yikayikasa eritendilabyaho kateho omw’ikolesya ebinywa n’eritondekabyo omo nzira eyikendiwatikya omundu eriminya ebyabya omo mibughe eyo Biblia yahandikawamo, kandi omw’itendikolesya ebinywa ebikalire kutse ebitowika. Kyo kikaleka eBiblia iyasomwa bweghu-bweghu, n’oyukasomayo inikirirya ngoko anemusoma emyatsi eyasondolawa n’ekirimu ky’oMungu kandi eyiryabindulawa butsira makosa.​—1 Abanya Tesalonika 2:13.