Ekitabu Amasako w’erikolesya omo ngebe y’Ekikristo kikendileka ikyoloba eribana emilondo n’emyatsi eyiri omo Biblia eyangakuwatikya erilwa n’amaligho waghu. Kandi kikendikuwatikya eribana emilondo ye Biblia eyitolere eyo wangakolesya ukasubya mutima abandi n’eribawatikya eriyisogha omo nzira eyikaha Yehova y’olukengerwa. Sombola omwatsi ogho ulaghireko. Amabulyo n’emyatsi mikuhi ebiri omo mwatsi oyo bikendikuwatikya. (Lebaya akasanduku “ Ngoko wangasondya omwatsi omo kitabu kino.”) Ukendilua iwabana emyatsi eyangakuwatikya; amahano, obusondoli, n’erikirania ebiri omo Kinywa ky’oMungu. Kandi ukendibanamo esyokanuni sy’eBiblia sy’erikolesya ukasubya abandi b’omutima, eribawatikya omo maligho wabo, n’eribahana.

Aliwe sibughambu ekitabu kino kikateka amasako wosi awalebirye omwatsi mulebe. Aliwe ni nzuko y’eritsukirako erikwesa-kwesa. (Emi 2:1-6) Eritoka eritasyakwesa-kwesa kutsibu, wanganakolesya amasako awakangirirwe oko mulondo n’ebinywa by’eriyighisya ebiri omo Mbindula y’Ekihugho Kihya eyiwitebyo omo mubughe ogho ukowa. Wanganakolesya na Musaada wa Kutafuta Habari kwa Ajili ya Mashahidi wa Yehova kutse nibya e Endekse, eritasyaminya ndeke amaana w’erisako kutse ngoko ryangakolesibwa. Ngambe iwakolesya ebyahuluka lino-lino utoke eriminya omulondo mulebe nga twasigho tuti lino.

Tukasaba tuti ekitabu Amasako w’erikolesya omo ngebe y’Ekikristo kikuwatikaye eribana amenge, eriminya, n’eriyiteghererya ebiri omo Masako Awabuyirire. Ukendibya ukakolesya ekitabu kino, ukenditasyaligha kundu ngoko “ekinywa ky’oMungu kiriho kandi kiwite akaghala.”​—Ebr 4:12.