1. Ebyo wamab’igha omo kitabu kino byanganaleka iwayibulya utiki?

EKITABU kino kyamabikuwatikya er’igha emyatsi mingyi y’omo Biblia, ng’omulaghe w’oMungu ow’engebe y’erikota, emibere eyo abaholi balimo, n’eriyiketera ly’erilubuka. (Omughambuli 9:5; Luka 23:43; Yoane 5:28, 29; Eribisulirwa 21:3, 4) Wanganabya iwabiritsuka erihindana n’Abimiri ba Yehova oko mihindano yabo n’erikirirya ngoko bakaramaya omo nzira y’ekwenene. (Yoane 13:35) Wanganabya iwabiritsuka eribya n’obwira obusikire haghuma na Yehova, kandi wanganabya iwabiriyisogha uti  wanzire erimukolera. Neryo wanganayibulya uti, ‘Litolere inakolaki lino nyitoke erikolera oMungu?’

2. Ekyaleka omulume we Etiopia inianza eribatisibwa niki?

² Ekyo ky’omulume mughuma we Etiopia ow’oko mughulu wa Yesu ayibulaya. Enyuma sy’erilubuka lya Yesu, omwigha wa Yesu yo Filipo mwatulira omulume oyo y’engulu mbuya. Filipo mwamowisya ndeke-ndeke ngoko Yesu yo Masiya. Ebyo Omunya Etiopia igha mobyamutula oko mutima neryo mwalwa iniabugha ati: “Lebaya, hano hali amaghetse! Ekyanganyikakirirya eribatisibwa ni kyahi kwehi?”​—Emibiri 8:26-36.

3. (a) Yesu mwaha abigha biwe b’ekilayiro kyahi? (b) Omundu atolere iniabatisibwa ati?

³ EBiblia yikakangiriraya ndeke-ndeke yiti wamanza erikolera Yehova, utolere iwabatisibwa. Yesu mwabwira abigha biwe ati: ‘Muyire abigha erilwa omo bihanda byosi; mubatisayebo.’ (Matayo 28:19) Yesu iyuwenewene mwabya eky’erileberyako naye amabatisibwa. Mobamulubika ndeke omo maghetse, butsira eryutilira amaghetse w’oko mutwe wiwe. (Matayo 3:16) Na munabwire oMukristo amasonda eribatisibwa, atolere inialubikwa ndeke omo maghetse.

4. Olubatiso lwaghu lukakanganaya abandi boki?

⁴ Omughulu ukabatisibawa, kikakanganaya abandi ngoko wanzire eribya mwira w’oMungu n’erimukolera. (Esyonyimbo 40:7, 8) Neryo wanganayibulya uti, ‘Litolere inakolaki imonatoka eribatisibwa?’

5. (a) Embere sy’eribatisibwa, utolere iwatsuka erikolaki? (b) Emihindano y’eKikristo ni y’omughaso munene busana naki?

⁵ Embere sy’eribatisibwa, utolere iwatsuka eriminya Yehova na Yesu. Wabiritsuka erikola utya uk’igha eBiblia.  (Soma Yoane 17:3.) Aliwe, isiw’imanira aho. EBiblia yikabugha yiti utolere ‘iwaminya ndeke-ndeke’ erisonda lya Yehova. (Abanya Kolosai 1:9) Emihindano y’Abimiri ba Yehova yikendikuwatikya eribya n’obwira obunokire haghuma na Yehova. Eyo ni nzumwa ngulu eyangaleka iwabya ukahindana obuli mughulu oko mihindano eyo.​—Abaebrania 10:24, 25.

6. Utolere iwatsuka eriminya amakangirirya wahi w’eBiblia embere sy’eribatisibwa?

⁶ Kwenene, Yehova syalibugha ati utolere iwatsuka eriminya obuli mwatsi owali omo Biblia imowabatisibwa. Mwatabugha ati omulume we Etiopia atsuke eriminya ebyosi imwabatisibwa. (Emibiri 8:30, 31) Nibya tukasyabya itunemw’igha eriminya Yehova yo kera na kera. (Omughambuli 3:11) Aliwe, eritolera eribatisibwa, utolere iwaminya n’erikirirya amakangirirya makulu-makulu w’eBiblia.​—Abaebrania 5:12.

7. Erigha eBiblia lyabirikuwatikya liti?

⁷ EBiblia yikabugha yiti: “Ahate erikirirya, omundu syangatoka eritsemesya oMungu.” (Abaebrania 11:6) Neryo kwesi litolere iwabya n’erikirirya embere sy’eribatisibwa. EBiblia yikabugha yiti abandi bandu b’omo muyi we Korinto mobowa ebyo abigha ba Yesu babya bakakangirirya, neryo “mobikirirya, mobabatisibwa.” (Emibiri 18:8) Naghu kutya, erigha eBiblia lyabirikuwatikya eribya n’erikirirya omo milaghe y’oMungu n’omo kaghala k’eriyiherera lya Yesu, eyangatulusya omo bukobe bw’erilolo n’oluholo.​—Yosua 23:14; Emibiri 4:12; 2 Timoteo 3:16, 17.

8. Ekikendikuhira m’omuhwa w’eribwira abandi b’oko ebyo uk’igha niki?

⁸ Ukendibya waminya myatsi mingyi y’omo Biblia  n’erilangira ngoko yikakuwatikaya omo ngebe yaghu, erikirirya lyaghu likendiwata kutsibu. Ukendianza eribwira abandi b’oko ebyo uk’igha. (Yeremia 20:9; 2 Abanya Korinto 4:13) Aliwe, abo wangabwira ni bahi?

9, 10. (a) Abo wangatsuka eribwira ebyo wabir’igha ni bahi? (b) Wamasonda eritsuka erihubirya haghuma n’endeko, litolere iwayira wuti?

⁹ Wangananza eribwira ebyo uk’igha ab’okwiwe, abira baghu, abalikyenyu, n’ab’ukakola nabo omubiri. Ekyo kyuwene, aliwe utolere iwakangania olukogho n’olwanzo omughulu ukakanaya n’abo. Enyuma sy’aho, wanganatsuka erihubirya haghuma n’endeko. Wamalangira uti wamabiyitekatekania eribya ukahubirya haghuma n’endeko, wanganabwira oMwimiri oy’ukakukangiriraya eBiblia uti wanzire eribya ukahubirya haghuma n’endeko. Amalangira ati kwenene wabiriyitekatekania, kandi emighendere yaghu yabirihulikirirana n’esyokanuni sy’eBiblia, neryo iwe naye imukendihindana haghuma n’abasyakulu babiri b’omo ndeko.

¹⁰ Omo muhindano oyo mukendikania mw’oko myatsi yahi? Abasyakulu bakendikania naghu erilebya nga wabiriminya n’erikirirya amakangirirya makulu-makulu w’eBiblia, nga unasikirye ebyo eBiblia yikabugha by’omo ngebe yaghu y’ebiro byosi, kandi nga unanzire eribya mughuma w’oko Bimiri ba Yehova. Litolere iwaminya ngoko abasyakulu bakateghaya obuli mundu oyuli omo ndeko, naghu kutya, neryo isiwasagha erikania nabo. (Emibiri 20:28; 1 Petero 5:2, 3) Enyuma sy’omuhindano oyo, abasyakulu bakendikubwira nga wanganatsuka erihubirya haghuma n’endeko.

11. Litolere erisuba oko mibere embere sy’eritsuka erihubirya haghuma n’endeko busana naki?

¹¹ Abasyakulu banganakubwira bati hakine ebindi  ebyo wangakola erisuba oko mibere yaghu imo watsuka erihubirya haghuma n’endeko. Erisuba oko mibere yaghu liri n’omughaso kutsibu busana naki? Kundi omughulu tukabwira abandi b’omwatsi w’oMungu, tukabya omo mwanya wa Yehova, neryo litolere emibere yetu iyamusikya.​—1 Abanya Korinto 6:9, 10; Abanya Galatia 5:19-21.

12. Litolere obuli mundu iniabindula omutima wiwe busana naki?

¹² Hane ekindi ekyo utolere iwakola embere sy’eribatisibwa. Omukwenda Petero mwabugha ati: ‘Mubindule emitima yenyu, mulolaye eyiri [oMungu] ebibi byenyu bisangulawe.’ (Emibiri 3:19) Eribindula omutima kutse eriyisubako ni bughambu ki? Ly’eriyikubya bw’omo busana n’ebibi byosi ebyo twabirikola. Eky’erileberyako, wamabya iwabya musingiri, utolere iwabindula omutima kutse eriyisubako. Kandi n’omo wangabya iwabya ukayikasa erikola ebitolere, itwe bosi litolere itwabindula omutima, kundi itwe bosi tukakola amalolo neryo litolere itwasaba oMungu tuti atughanyire.​—Abanya Roma 3:23; 5:12.

13. ‘Erilola eyiri oMungu’ kutse eribinduka ni bughambuki?

¹³ Omundu amayikubya bw’omo busana n’ebyo akola lisa byanganahwera aho? Iyehe. Petero mwabugha ati kandi “mulolaye eyiri oMungu [kutse mubinduke].” Ekyo ni bughambu utolere iwatsira emitsye mibi yosi eyo wabya nayo n’eritsuka erikola ebitolere. Ekyerileberyako, tubughe tuti ni ngendo yaghu y’erimbere ey’eriya omo kihugho kilebe. Habilaba akatambi, wamaminya ngoko wabirihera oko nzira. Ukendiyira wuti? Ahate eritika-tika iwukend’imana, iwabinduka n’erilola omo nzira eyitolere. Kobine bitya, omughulu uk’igha  eBiblia, wanganaminya ngoko utolere iwatsira emibere milebe kutse ebindu bilebe by’omo ngebe yaghu. Uyitekatekanaye eriligha eribinduka​—ni bughambu, erisuba oko mibere yaghu​—n’eritsuka erikola ebitolere.

14. Omundu akayiherera iyuwenewene oko Mungu kw’ati?

¹⁴ Ekindi kika kinene ekyo utolere erikola embere sy’eribatisibwa ly’eriyiherera iwuwenewene oko Yehova. Eriyiherera iwuwenewene oko Yehova, ly’erimubwira omo musabe uti ukamulagha ngoko ukendimuramya Iye musa n’erikola erisonda liwe mo kindu ky’omughaso kulenga ebyosi omo ngebe yaghu.​—Eryibuka Ebihano 6:15.

15, 16. Ekikaleka omundu iniayiherera oko Mungu niki?

¹⁵ Erilagha Yehova uti ukendimukolera Iye musa liri ng’erilagha omundu oyo wanzire uti engebe yaghu eyikisiya ukendilabya yo haghuma naye. Terilengekania omulume n’omukali abamatsuka obwira. Omulume akasa akabeghera oko mukali n’erimuminya ndeke, neryo amahika okw’imwanza n’erisonda erimutahya. Kwenene eriyisogha eritahya ni mwatsi alitohire, n’omo byangabya bitya omulume akaligha eriheka obulito obo kundi anzire omukali oyo.

¹⁶ Ukabya unemw’igha eriminya Yehova, ukamwanza kandi ukayikasa kutsibu erimukolera. Ekyo kikendileka iwamulagha omo musabe uti ukendimukolera. EBiblia yikabugha yiti omundu oyukanza erikwama Yesu, atolere ‘iniayighana.’ (Mariko 8:34) Eryo ni bughambuki? Kikakanganaya ngoko wamahira eriowa Yehova ly’embere omo ngebe yaghu yosi. Ebyo Yehova anzire bilengire kutsibu ebyo wanzire n’ebyo usondire erikola omo ngebe yaghu.​—Soma 1 Petero 4:2.

17. Ekikaleka abandi ibaghana eriyiherera oko Yehova niki?

¹⁷ Abandi  bakaghana eriyiherera oko Yehova kundi bakasagha bati bakenditaluka eriberererya omulaghe wabo w’erimukolera. Sibalyanza erihitania Yehova, kutse banganalengekania bati kundi sibalibayiherera oko Yehova, syangabatswera busana n’ebyo bakakola.

18. Ekikendikuwatikya eritedisagha erihitania Yehova niki?

¹⁸ Erianza Yehova likendikuwatikya erikinda obuba bw’erimuhitania. Kundi umwanzire, ukendiyikasa eriberererya ebyo ulyamulagha. (Omugambuli 5:4; Abanya Kolosai 1:10) Siwendilengekania uti erikola erisonda lya Yehova likalire kutsibu. Omukwenda Yoane mwahandika ati: ‘Erianza [oMungu] ni sikya ebilayiro biwe, kandi ebilayiro biwe sibikalire.’​—1 Yoane 5:3, NWT.

19. Siwutolere erisagha eriyiherera oko Yehova busana naki?

¹⁹ Yehova syalitusaba ati tubye bandu abahikahikene imotwayiherera okw’iye. Syalitusaba ati tukole ebyo tutetwangatoka. (Esyonyimbo 103:14) Akendikuwatikya erikola ebitolere. (Isaya 41:10) Uyiketere Yehova n’omutima waghu wosi, neryo ‘akenditunganania esyonzira syaghu.’​—Emisyo 3:5, 6.

20. Enyuma sy’eriyiherera oko Yehova, ekika ekikwamire ni kyahi?

²⁰ Ukalengekanaya uti wamabiyitekatekania neryo wanganayiherera oko Yehova? Enyuma sy’eriyiherera oko Yehova, hane ekindi kika eky’eritwa. Utolere iwabatisibwa.

21, 22. ‘Eritulagho’ embere sy’abandu bosi erikirirya lyaghu likakoleka liti?

²¹ Ubwire omusondoli w’akatunga k’abasyakulu ow’omo ndeko yenyu ngoko w’abiriyiherera oko  Yehova kandi ngoko w’anzire iwabatisibwa. Neryo akendibwira abasyakulu balebe ati basubirire haghuma naghu omo makangirirya makulu-makulu w’eBiblia. Bamalangira bati unatolere, ibakendikubwira bati wanganabatisibwa oko muhindano munene w’Abimiri ba Yehova owakasa. Oko muhindano oyo kukabya omukania owakakanaya búli oko lubatiso. Neryo oyukalabaya omukania oyo akabulaya abakendibatisibwa b’amabulyo molomolo abiri.  Omughulu ukasubaya oko mabulyo ayo, ukabya ‘iwamatulagho’ embere sy’abandu bosi erikirirya lyaghu.​—Abanya Roma 10:10.

²² Neryo enyuma syaho ukendibatisibwa. Ukalubikawa ndeke omo maghetse. Olubatiso lukakanganaya obuli mundu ngoko wabiriyiherera oko Yehova kandi ngoko wamabibya mughuma w’oko Bimiri ba Yehova.

23. Eribatisibwa omo lina ‘ly’Ise n’ery’oMughala n’ery’ekirimu kibuyirire’ ni bughambuki?

²³ Yesu mwabugha ati abigha biwe ibabatisibwa ‘omo lina ly’Ise n’ery’oMughala n’ery’ekirimu kibuyirire.’ (Soma Matayo 28:19.) Eryo ni bughambuki? Ukakanganaya ngoko w’ikirirye obukulu bwa Yehova n’omubiri wa Yesu omw’isonda ly’oMungu, kandi ngoko oMungu akakolesaya ekirimu kiwe kibuyirire eriberererya erisonda liwe.​—Esyonyimbo 83:18, Matayo 28:18; Abanya Galatia 5:22, 23; 2 Petero 1:21.

24, 25. (a) Olubatizo lukasosekanayaki? (b) Omo sura y’enduli tukendikania oko mwatsi wahi?

²⁴ Olubatiso ni kisosekanio ky’ekindu ky’omughaso munene. Omughulu ukalubikawa omo maghetse, kikasosekanaya kiti wamahola oko ngebe yaghu ya kera, kutse eritsira emibere yaghu ya kera. Omughulu ukalwa omo maghetse, kikasosekanaya kiti wamatsuka engebe nyihya-nyihya ey’erikola erisonda ly’oMungu. Kandi kikakanganaya kiti erilwa aho, wamatsuka erikolera Yehova. Uminye ngoko siwutayiherera oko mundu, oko kitunga kilebe, kutse oko mubiri mulebe. Ukabya iwamaherera engebe yaghu y’oko Yehova.

²⁵ Eriyiherera lyaghu likendikuwatikya erikulya obwira bwaghu haghuma n’oMungu. (Esyonyimbo 25:14) Ekyo si bughambu omundu akendisyalamibwa kundi abiribatisibwa. Omukwenda Paulo mwahandika ati: ‘Muberereraye erilama lyenyu omw’ubaha n’erititimana.’ (Abanya Filipi 2:12) Eribatisibwa ni nzuko buyira. Aliwe ekyo wangakola utoke eribya n’obwira obutetwika haghuma na Yehova niki? Esura y’enduli y’ekitabu kino yikendisubya oko libulyo eryo.