1, 2. Ababya baghuma b’oko bira ba Yehova ni bahi?

UKANZA eribya n’omwira oyuli ati? Omundu oyo wanzire. Omundu oyo ukahulikirirana naye ndeke. Omundu oyuwite emibere eyuwene kandi eyikakutsemesaya.

² Yehova Mungu akasombola omo kati k’abandu mw’abira biwe. Eky’erileberyako, Abrahamu abya mughuma w’oko bira ba Yehova. (Isaya 41:8; Yakobo 2:23) Yehova mwanza na Dawidi. Mwabugha ati Dawidi abya ‘mundu oyukatsemesaya omutima wiwe.’ (Emibiri 13:22, NWT) N’omuminyereri Danieli abya mundu ‘w’obughuli bunene’ oko Yehova.​—Danieli 9:23, NWT.

3. Abrahamu, Dawidi, na Danieli batoka bati eribya bira ba Yehova?

³ Abrahamu, Dawidi, na Danieli batoka bati eribya bira ba Yehova? Yehova mwabwira Abrahamu ati: ‘Mow’owa omulenge waghe.’ (Enzuko 22:18, NWT) Yehova akabya mwira w’abakayikehaya n’erimw’owa. Nibya oMungu anganabya mwira w’ekihanda ky’abandu. Yehova mwabwira ekihanda kye Israeli ati: “Muhulikirire omulenge waghe, naghe nasyabya [Mungu] wenyu, nenyu mwasyabya bandu baghe.” (Yeremia 7:23) Naghu utolere iwahulikirira Yehova wamabya kwenene iwanzire eribya mwira wiwe.

4, 5. Yehova akateghaya abira biwe b’ati?

⁴ EBiblia yikabugha yiti Yehova akasondekanaya akanya ‘k’eriyikangya mo w’amaka busana n’ab’omutima  ahikene okw’iye.’ (2 Emyatsi y’Emighulu 16:9) Omo Esyonyimbo 32:8, NWT, Yehova akalagha bira biwe ati: ‘Ngasyakuha amenge n’erikukangirirya enzira eyo wangalabamo. Ngasyakuhana n’eriso lyaghe irinakusamalire.’

⁵ Enzighu y’amaka ikasonda eritukakirirya eribya bira ba Yehova. Aliwe Yehova anzire erituteya. (Soma Esyonyimbo 55:22.) Itwe bira ba Yehova, tukamukolera n’omutima wosi. Tukabya abateleghula okw’iye n’omo twangabya omo mibere eyikalire yiti. Kandi tuwite eriyiketera eriri ng’eryo Dawidi abya nalyo. Ak’ahula Yehova, mwahandika ati: ‘Kusangwa ali oko byala byaghe by’amali sindiendisyatundwa.’ (Esyonyimbo 16:8; 63:8) Sitani akatukakiriraya ati okw’ibya bira ba Yehova?

6. Sitani mwalegha abandu atiki?

⁶ Omo Sura 11 motwalangire ngoko Sitani mwatsongera Yehova n’eribugha ati ni mubehi kandi ati syawite eritswera eritunganene kundi mw’atalekera Adamu na Eva b’obutoki bw’eriyihamulira ekibuya n’ekibi. Ekitabu kya Yobu kikatubwira ngoko Sitani akalegha n’abandu abakanza eribya bira b’oMungu. Sitani akabugha ati bakakolera oMungu busana n’ebyo akabaha, si busana n’olwanzo. Kandi Sitani akayihalamba ati anganalusya omundu wosi y’oko Mungu. Tulebaye ekyo twang’igha oko ebyahikira Yobu kandi ngoko Yehova amuteghaya.

7, 8. (a) Yehova abya akayowa ati busana na Yobu? (b) Sitani mwalegha Yobu atiki?

⁷ Yobu abya inindi? Abya mulume mubuya oyo wabyaho habirilaba myaka hakuhi na 3 600. Yehova mwabugha ati omo biro ebyo oko kihugho sikw’abya owundi mundu oyo wabya nga Yobu. Abya asikirye oMungu  yo kutsibu, kandi aby’aponire ekibi. (Yobu 1:8) Kwenene Yobu abya mwira wa Yehova.

⁸ Sitani mwalegha Yobu ati akakolera oMungu busana n’eby’akamuha. Sitani mwabwira Yehova ati: ‘Sulitabimutimbya kw’oluhimbo [kutse, oluba] n’ekitunga kiwe, n’ebyosi awite oko mbande syosi kwehi? Wabiritsumula omubiri w’ebyala biwe, n’obuteke bwiwe bwabirikanyirira omo kihugho. Nikwa tahira ebyala byawu lino, wutule oko byosi awite, naye akendikutsuma embere w’obusu bwawu.’​—Yobu 1:10, 11.

9. Yehova mwalighira Sitani erikolaki?

⁹ Sitani mwalegha Yobu ati akakolera Yehova busana n’eby’akamuha. Kandi Sitani mwayihalamba ati anganakakirirya Yobu erikolera Yehova. Yehova mwataligha ebya Sitani, aliwe mwaleka Sitani alenge oko Yobu atoke erilebya nga ni mwira wa Yehova busana n’erimwanza.

10. Sitani mwalenga oko Yobu kw’ati, kandi Yobu mwayira ati?

¹⁰ Eky’erimbere Sitani mw’ita esyonyama sya Yobu syosi. Neryo mw’ita n’abaghombe bangyi ba Yobu. Yobu mwaherya ebyosi eby’abya awite. Enyuma sy’aho, Sitani mw’ita abana ikumi ba Yobu b’omo kihunga. Aliwe Yobu mwataleka eribya oyuteleghula oko Yehova. ‘Omo byosi ebi, Yobu mwatakola erilolo, kutse mwatatsongera oMungu ati akakola ekitatolere.’​—Yobu 1:12-19, 22, NWT.

11. (a) Sitani mwakola oko Yobu ko kindi kyahi? (b) Yobu mwayira ati?

¹¹ Sitani mwataluhira aho. Mwapuma oMungu omw’ibugha ati: “Nikwa lino wukakaye ebyala byawu wutule ahali erikuha liwe n’omubiri wiwe, naye akendikutsuma embere sy’obusu bwawu.” Neryo Sitani mwaswirya Yobu y’omo bukoni obukaluma kutsibu. (Yobu 2:5, 7) Kandi Yobu mwataleka eribya oyuteleghula oko Yehova. Mwabugha  ati: “Erihika okw’ihola lyaghe sindiendisyaghana eritunganene lyaghe.”​—Yobu 27:5.

12. Yobu mwakangania ati ngoko Sitani ni mubehi?

¹² Yobu syabya asi n’ahake ngoko Sitani anemumutsongera kutse ekikaleka iniaghalwa kutsibu. Mwalengekania ati Yehova yukamwaghalaya. (Yobu 6:4; 16:11-14) Aliwe omo byosi ebyo, Yobu mwataleka eribya oyuteleghula oko Yehova. Mohabya isihakiri eritika-tika. Yobu syabya akakolera Yehova busana n’eby’amuha. Abya mwira w’oMungu kundi aby’amwanzire. Ebyosi ebyo Sitani abugha abya mabehi.

13. Yobu eribya mundu oyuteleghula mwakangania ki?

¹³ Yobu n’omwanabya isyasi ebyalaba elubula, mwataleka eribya oyuteleghula oko Mungu kandi mwakangania ngoko Sitani ni mubi. Yehova mwahemba Yobu busana n’eribya mwira wiwe oyuteleghula.​—Yobu 42:12-17.

14, 15. Sitani akalegha abandu bosi atiki?

¹⁴ Wanganigha emyatsi mingyi y’omughaso oko ebyahikira Yobu. Munabwire, Sitani akatulegha ati netu tukakolera Yehova busana n’ebyo akatuha. Omo Yobu 2:4, Sitani mwabugha ati: ‘Omundu anganaha ebyosi awite busana n’engebe yiwe.’ Eribugha atya Sitani akalegha abandu abosi, butsira Yobu musa, ati bakakolera Yehova busana n’ebyo akabaha. Myaka mingyi Yobu iniabirihola, Sitani abya iniakinatsuma Yehova n’erilegha abaghombe biwe. Eky’erileberyako, omo Emisyo 27:11, hakabugha hati: “Mughala waghe wubye n’amenge, n’eritsemesya omutima waghe, inatoka erisubirya oyukanyitsuma [kutse, oyukanyipuma].”

¹⁵ Wanganasombola eriowa Yehova, n’eribya mwira Wiwe oyutaleghula, n’erikangania Sitani ko ni mubehi. Eribya mwira w’oMungu ly’erisombola eryuwene  kutsibu n’omo lyangabya irikalire eribindula engebe yaghu. Erisombola eribya mwira w’oMungu eri si mwatsi w’amasata. Sitani akabugha ati siwangatoka eribya iune oyuteleghula oko Mungu wamalola oko bitsibu. Akayikasa eritutebya tuleke eribya abateleghula oko Mungu. Akakola atya ati?

16. (a) Sitani akakolesaya nzira syahi erikakirirya abandu erikolera Yehova? (b) Sitani anganakukakirirya ati erikolera Yehova?

¹⁶ Sitani akakolesaya esyonzira nyingyi atoke eritukakirirya eribya bira b’oMungu. Ali “ng’endale, eyikaruruma n’erisonda-sonda oyo yangalya.” (1 Petero 5:8) Isikyakuswekaya omughulu abira baghu, abandu b’omo kihanda kyaghu, kutse abandi eribugha bati uleke erigha eBiblia n’erikola ebitolere. Wanganayowa endale nga yikasonda erikulya. * (Yoane 15:19, 20) Sitani kandi ‘akayisosekanaya ng’omumalaika w’ekyakakala.’ Neryo anganasonda eritutebya ati tughane eryowa Yehova. (2 Abanya Korinto 11:14) Eyindi nzira eyo Sitani akakolesaya erisonda eritukakirya erikolera Yehova, akaleka tulengekanaye tuti situtolere n’ahake erikolera oMungu.​—Emisyo 24:10.

17. Ekikaleka itw’owa Yehova niki?

¹⁷ Twamw’owa Yehova, tukakanganaya ngoko Sitani ni mubehi. Ekyangatuwatikya eribya abak’owa ni kyahi? EBiblia yikabugha yiti: ‘Wasyanza [Yehova Mungu] wawu n’omutima wawu wosi, n’engebe yawu yosi, kandi  n’akaghala kawu kosi.’ (Eryibuka Ebihano 6:5) Tukowa Yehova kundi tumwanzire. Olwanzo lwetu oko Yehova lwamalola embere, itukendianza erikola ekyosi eky’akabugha ati tukole. Omukwenda Yoane mwahandika ati: ‘Erianza oMungu ni kwama ebyalayiro biwe, kandi ebyalayiro biwe sibikalire.’​—1 Yoane 5:3, NWT.

18, 19. (a) Emighuma y’oko myatsi eyo Yehova akabugha ati ni malolo ni yahi? (b) Tukaminya tuti ngoko Yehova syalitusaba erikola ebyo tutetwangatoka?

¹⁸ Emighuma y’oko myatsi eyo Yehova akabugha ati ni malolo ni yahi? Omo kasanduku “ upone ebyo Yehova aponire” muli ebighuma bya kubyo. Erimbere, wanganalengekania uti ebindi bya kubyo si bibi kutsibu. Aliwe omughulu ukasoma eBiblia n’erilengekania ndeke oko ebyo ukasoma, ukendilangira ndeke ngoko erisikya ebilayiro bya Yehova likaleta obwenge. Kandi iwanganayowa ngoko litolere iwasuba oko mibere yaghu. N’omo lyanganakala  oghundi mughulu, wamasuba oko mibere yaghu iwukendibana obuholo n’obutseme obo mwira w’oMungu oyuteleghula akabana. (Isaya 48:17, 18) Tukaminya tuti ngoko kinatokekene erisuba oko mibere yetu?

¹⁹ Yehova syangatusaba n’ahake ati tukole ebyo tutetwangatoka. (Eryibuka Ebihano 30:11-14) Iye ni Mwira wetu, atwasi ndeke kulenga ngoko tuyasi. Anasi ebyo twangatoka n’ebyo tutetwangatoka. (Esyonyimbo 103:14) Omukwenda Paulo mwabugha ati: “[OMungu] syalileghula, siendisyaligha mukalengwako kwilaba amaka wenyu; nikwa omw’irengwako eryo asyabaha amaka w’eriyiyinia n’enzira y’eribala.” (1 Abanya Korinto 10:13) Tukayiketera ngoko Yehova akendibya inianemutuha akaghala ak’erikola ebitolere oko buli mughulu. Akendikuha ‘obutoki bunene’ erikuwatikya eriyiyinia omo mibere eyikalire. (2 Abanya Korinto 4:7) Abere abiyilangirira ngoko Yehova akawatikaya omo mighulu eyiri ngeyo,  Paulo mwabugha ati: “Nyitokire erikola ebyosi busana n’amaka wa Yesu oyukanyitokesaya.”​—Abanya Filipi 4:13.

20. Ni mibere yahi eyo utolere iwakwama, kandi busana naki?

²⁰ Twamanza eribya bira ba Yehova, litolere itwaleka erikola ebyo akabugha ati ni bibi. Aliwe litolere itwakola bingyi okwaho. (Abanya Roma 12:9) Abira b’oMungu bakanza ebyo anzire. Bakakanibawako omo Esyonyimbo 15:1-5. (Soma.) Abira ba Yehova bakakwama emibere yiwe n’erikangania ‘olwanzo, obutseme, obuholo, omutima w’erilindirira, olukogho, obubuya, erikirirya, omutima mwolo, n’eriyikakirirya.’​—Abanya Galatia 5:22, 23, NWT.

21. Wang’igha wuti erikangania emibere eyo oMungu anzire?

²¹ Wang’igha uti erikangania emibere mibuya eyo? Utolere iwigha ebyo Yehova akanza omughulu ukasoma n’erigha eBiblia mughulu wosi. (Isaya 30:20, 21) Ukendibya unemukola utya, olwanzo lwaghu oko Yehova lukendikula, neryo olwanzo olo lukakula lutya, ukendianza erimw’owa.

22. Ery’owa Yehova likendikuleteraki?

²² Erisuba oko mibere yaghu lyangasosekanibwa n’erilusya esyongyimba sya kera n’eriambala esihya-sihya. EBiblia yikabugha yiti utolere ‘iwaghabana n’omundu wa kera’ n’eriambala ‘omundu muhya-muhya.’ (Abanya Kolosai 3:9, 10) Erisuba oko mibere mwangabya isi mwatsi olobire, omughulu tukasuba oko mibere yetu n’eriowa Yehova, akatulagha erituha ‘ekihembo kinene.’ (Esyonyimbo 19:11) Ee, usombole eriowa Yehova, ukanganaye ngoko Sitani ni mubehi. Kolera Yehova, butsira busana n’ekihembo ekyo angakuha, aliwe busana n’olwanzo lwaghu okw’iye. Neryo aho iwukendibya mwira w’oMungu!