1, 2. Busana naki omusabe ni kihembo ky’omughaso munene, kandi busana naki litolere itwaminya eBiblia nga yikabughaki oko musabe?

OMO kyanya kyosi, ekihugho ni kandu kake buyira. Yehova akabya asamalira ekihugho, abandu abosi abali kukyo bakabya ng’akatondi k’amaghetse akakalua omo kalegha. (Esyonyimbo 115:15; Isaya 40:15) N’omo twangabya ng’akandu kake buyira omo kyanya kyosi, Esyonyimbo 145:18, 19 sikabugha siti: ‘Yehova ali hakuhi oko bosi abakamubirikira, ali hakuhi oko bosi abakamubirikira n’ekwenene. Akaberereraya obwagha bw’abosi abakamubaha, akowa erilaka lyabo, akalamayabo.’ Oyo kwenene ni muyisa munene! Yehova, Omuhangiki n’omutoki w’ebyosi, anzire itwabya bira biwe, kandi akanza erihulikirira emisabe yetu. Kwenene, omusabe ni muyisa, ekihembo ky’omughaso munene ekyo Yehova abiriha obuli mughuma w’okw’itwe.

² Aliwe Yehova akatuhulikirira twamakania naye omo nzira eyo akaligha. Twangakola tutya tuti? Tulebaye eky’eBiblia yikakanaya oko musabe.

3. Busana naki utolere iwasaba Yehova?

³ Yehova anzire iwamusaba kutse erikania naye. Tukaminya ekyo kyo tuti? Kisi soma Abanya Filipi 4:6, 7. Terilengekania oko risako eryo. Omutabali w’ekihugho n’ekyanya kyosi akutsomene kutsibu kandi anzire iwamubwira ngoko ukayowa n’amaligho waghu.

4. Erisaba Yehova y’obuli mughulu likawataya liti obwira bwaghu haghuma naye?

 ⁴ Omusabe akatuwatikaya eribya n’obwira obusikire haghuma na Yehova. Abira eribya bakakanirania oko ebyo bakalengekanaya, ebikabahangahangaya, ngoko bakayowa, obwira bwabo bukawata. Erisaba Yehova nalyo ko line ritya. Omo Biblia, akakubwira ngoko akayowa n’amalengekania wiwe, kandi akakubwira eky’akasyakola omo biro ebikasa. Naghu wanganamubwira ebiri omo mutima waghu wamabya ukamusaba obuli mughulu. Ukendibya unemukola utya, obwira bwaghu na Yehova bukendiwata kutsibu.​—Yakobo 4:8.

5. Tukaminya tuti ngoko Yehova syalihulikirira emisabe yosi?

⁵ Yehova akahulikirira emisabe yosi kwehi? Iyehe. Omo biro bw’omuminyereri Isaya, Yehova mwabwira Abaisraeli ati: “Omughulu mukakanyiriraya erisaba lingyi, sinendiowa. Ebyala byenyu byoswire m’omusasi.” (Isaya 1:15) Kwesi tutetayiteya, itwanganakola amategheko awo Yehova aponire, neryo ikyaleka iniatahulikira emisabe yetu.

6. Busana naki erikirirya ni ly’omughaso munene? Wangakangania wuti ngoko uwite erikirirya?

 ⁶ Twamabya itwanzire tuti Yehova ahulikirire emisabe yetu, litolere itwamwikirirya. (Mariko 11:24) Omukwenda Paulo mwahandika ati: “Ahate erikirirya, omundu syangatoka eritsemesya oMungu, kusangwa litolere oyukahika oko Mungu in’ikirirya oMungu kw’aneho, kandi kw’akahemba abakamusonda-sonda.” (Abaebrania 11:6) Aliwe isitwabugha omo buno busa tuti tw’ikirirye. Tukakanganaya erikirirya lyetu lyo ndeke omughulu tukasikaya ebilayiro bya Yehova byo buli kiro.​—Soma Yakobo 2:26.

7. (a) Busana naki tutolere itwabya n’emibere y’eriyikehya n’erisikya omughulu tukasaba Yehova? (b) Twangakangania tuti ngoko tukasaba erilua omo mutima?

⁷ Tutolere itwayikehya kandi itwabya n’erisikya omughulu tukasaba Yehova. Busana naki? Twamabya n’omwatsi w’eribwira omwami kutse omuprezida, itukendikania naye omo mibere y’erisikya. Yehova yo Mungu Mutoki w’Ebyosi, busana n’ekyo omughulu tukakanaya naye, kwenene tutolere erimusikya n’eriyikehya embere siwe kutsibu okwaho! (Enzuko 17:1; Esyonyimbo 138:6) Kandi emisabe yetu litolere iyalwa omo mutima, butsira eribeghera erisubirira omo binywa bighumerera.​—Matayo 6:7, 8.

8. Twamasaba Yehova y’ekindu kilebe, tutolere netu itwayira tuti?

⁸ Omughulu tukasaba ekindu kilebe, tutolere itwayikasa erikola ebihulikirirene n’omusabe wetu. Eky’erileberyako, twamasaba Yehova y’ebyo tuyitaghire obuli kiro, twamabya itunawite akaghala k’erikola omubiri sitwangabya baghata n’erilengekania tuti Yehova akendituha obuli kindu. Tutolere itwayikasa eribya bakoli n’eriligha obuli mubiri owo twangatoka. (Matayo 6:11; 2 Abanya Tesalonika 3:10) Kutse twamasaba Yehova tuti atuwatikaye eritsira erilolo lirebe, tutolere itwayihighula oko mibere yosi eyangatukolya okw’ilengwako. (Abanya Kolosai 3:5) Tukanaye oko mabulyo awalebirye omusabe awakabulibawa kangyi-kangyi.

9. Tutolere itwasabandi? Yoane 14:6 ikatukangirirayaki oko musabe?

⁹ Tutolere itwasabandi? Yesu mwakangirirya abigha biwe ati basabe “Thatha wetu oyuli elubula.” (Matayo 6:9) Kandi mwabugha ati: ‘Ingye indi nzira, ingye indi mwatsi w’ekwenene, ingye indi ngebe; sihali mundu oyukahika oko Thatha atalyalaba omw’ingye.’ (Yoane 14:6) Busana n’ekyo tutolere itwasaba Yehova musa erilabira omo Yesu. Emisabe yetu erilabira omo Yesu ni bughambu ki? Yehova eriligha emisabe yetu, tutolere itwakangania ngoko tukasikaya omubiri w’omughaso munene owo Yehova aha Yesu. Ngoko tw’igha, Yesu mwasa oko kihugho eritulamya oko rilolo n’oko luholo. (Yoane 3:16; Abanya Roma 5:12) Kandi Yehova abirisombola Yesu eribya Muhereri Mukulu kandi Mutsweri.​—Yoane 5:22; Abaebrania 6:20.

10. Omughulu tukasaba, hane emibere eyo tutolere itwabyamo? Sobolaya.

¹⁰ Omughulu tukasaba, litolere itwimana, itwikala, itwakukama, kutse itwabya omo yindi mibere? Iyehe, Yehova syalibugha ati itwakukama, itw’ikala, kutse erimana omughulu tukasaba. EBiblia yikatukangiriraya yiti twanganasaba Yehova itune omo mibere yosi-yosi eyiri mw’erisikya. (1 Emyatsi y’Emighulu 17:16; Nehemia 8:6; Danieli 6:10; Mariko 11:25) Ekyo Yehova akalangira mo ky’omughaso, si y’emibere eyo tukabyamo omughulu tukamusaba, aliwe ly’erimusaba itunawite amalengekania awuwene. Twanganasaba omo mulenge kutse bukutu-kutu ahosi-hosi aho tuli n’oko ndambi yosi-yosi. Twamasaba Yehova, tutolere eriyiketera ngoko akenditw’owa n’omo hangabya isihali omundu oy’owire ko tukasaba.​—Nehemia 2:1-6.

11. Ni bindu byahi ebyo twangabwira Yehova y’omo misabe yetu?

¹¹ Twangasabaki? Twanganasaba obuli kindu ekihulikirirene n’erisonda lya Yehova. EBiblia yikabugha yiti:  ‘Twamasaba ekindu omw’isonda liwe, akatowa.’ (1 Yoane 5:14) Twanganasaba busana n’ebitulebirye itw’ibene-bene? Inga. Erisaba Yehova litolere iryabya ng’erikania n’omwira wa hakuhi. Twanganabwira Yehova y’ekyosi-kyosi ekyo tukalengekanaya n’ekiri omo mutima. (Esyonyimbo 62:8) Twanganamusaba tuti atuhe ekirimu kibuyirire kituwatikaye erikola ebitolere. (Luka 11:13) Kandi twanganasaba Yehova y’obwenge bw’erituwatikya eriyihamulira ndeke, n’akaghala k’erilwa n’ebikatuhangahangaya. (Yakobo 1:5) Tutolere itwasaba Yehova tuti atughanyire amalolo wetu. (Abanya Efeso 1:3, 7) Kandi tutolere itwasabira abandi, ng’ab’okw’itwe n’abaghala betu n’abali betu ab’omo ndeko.​—Emibiri 12:5; Abanya Kolosai 4:12.

12. Ekitolere ikyabya ky’omughaso munene omo misabe yetu niki?

¹² Ekitolere ikyabya ky’omughaso munene omo misabe yetu niki? Yehova n’erisonda liwe. Tutolere itwamusima erilua omo mutima busana n’ebyosi eby’abiritukolera. (1 Emyatsi y’Emighulu 29:10-13) Tukaminya tutya kundi omughulu Yesu abya oko kihugho, mwakangirirya abigha biwe ngoko bangasaba. (Soma Matayo 6:9-13.) Mwabugha ati batolere ibatsuka erisaba bati erina ly’oMungu libye libuyirire, ni bughambu libye elyerire kandi litolere erisikibwa. Kandi Yesu mwakangania ngoko tutolere itwasaba tuti oBwami bw’oMungu bwase n’erisonda liwe likolawe omo kihugho kyosi. Enyuma sy’erisaba busana n’ebindu by’omughaso munene ebyo, Yesu mwabugha ati litolere itwasaba busana n’ebitulebirye itw’ibene-bene. Omughulu tukahira Yehova n’erisonda liwe ly’embere omo misabe yetu, tukakanganaya ekyo tukalangira mo ky’omughaso munene okwitwe.

13. Emisabe yetu yitolere iyabya n’obuli bwahi?

¹³ Emisabe yetu yitolere iyabya n’obuli bwahi? EBiblia siyiribugha. Emisabe yetu yanganabya mikuhi kutse  miri erikwamana n’emibere eyo tulimo. Eky’erileberyako, twanganasaba omusabe mukuhi tukalya aliwe itwasaba omusabe muli tukaha Yehova y’ewasingya kutse tukamubwira ebikatuhangahangaya. (1 Samweli 1:12, 15) Situtolere erisaba emisabe miri-miri busana n’eriyikangania, ngoko abandu balebe babya bakakola omo biro bya Yesu. (Luka 20:46, 47) Yehova syalitsemera emisabe eyiri ng’eyo. Ekyo Yehova akanza ly’erisaba ebikalwa omo mitima yetu.

14. Tutolere itwasaba ngendo singahi, kandi ekyo kikatukangirirayaki oko Yehova?

 ¹⁴ Tutolere itwasaba ngendo singahi? Yehova akabugha ati tukanaye naye obuli mughulu. EBiblia yikatubwira yiti ‘tubye tukasaba,’ ‘tuyitsingirire omw’isaba,’ ‘n’erisaba butsira eriumbya.’ (Matayo 26:41; Abanya Roma 12:12; 1 Abanya Tesalonika 5:17) Yehova akabya inianayiteghekire erihulikirira emisabe yetu. Twanganamusima obuli kiro busana n’olwanzo lwiwe n’ebyakatuha. Twanganamusaba obusondoli, akaghala n’eritusubya omutima w’omonda. Twamabya kwenene itukalangira erisaba Yehova mo ly’omughaso, itukendikolesya akanya kosi-kosi ako twamabana erikania naye.

15. Busana naki tutolere itwabugha tuti “amina” oko nduli y’omusabe?

¹⁵ Busana naki tutolere itwabugha tuti “amina” oko  nduli y’omusabe? Ekinywa “amina” ni bughambu “kwenene” kutse “kobinabye bitya.” Ni nzira ey’erikangania ngoko ebyo tulyasaba tulighirebyo kandi ngoko bikalwa omo mutima. (Esyonyimbo 41:13) EBiblia yikatubwira yiti tutolere eribugha tuti “amina” omo bukutu kutse omo mulenge oko nduli y’omusabe owakahulikirirawa n’abandu bangyi, erikangania ngoko twamaligha ebiryabughawa mugho.​—1 Emyatsi y’Emighulu 16:36; 1 Abanya Korinto 14:16.

16. Kwenene Yehova akanasubiraya oko misabe yetu? Sobolaya?

¹⁶ Kwenene Yehova akanasubaya oko misabe yetu? Inga. EBiblia yikabugha yiti, ‘akasubiraya erisaba.’ (Esyonyimbo 65:2) Yehova akasubaya oko misabe y’esyomiliyoni sy’abandu abakamusaba erilua omo mutima, kandi akatusubiraya omo nzira mbiriri-mbiriri.

17. Yehova akakolesaya ati abaghombe biwe abali oko kihugho n’abamalaika erisubirya oko misabe yetu?

¹⁷ Yehova ekasubiraya oko misabe yetu omo nzira y’abamalaika n’omo nzira y’abaghombe biwe abali oko kihugho. (Abaebrania 1:13, 14) Hali ebyerileberyako bingyi eby’abandu abasaba oMungu bati abawatikaye batoke ery’owa eBiblia, neryo katambi kake enyuma syaho Abimiri ba Yehova ibabahikira. EBiblia yikakanganaya yiti abamalaika nabo bakakola oko mubiri w’eritulaghania “engulu yuwene” omo kihugho kyosi. (Soma Eribisulirwa 14:6.) N’abangyi b’omw’itwe kyabirituhikira erisaba Yehova busana n’ekindu kilebe ekikatuhangahangaya kutse busana n’ebyo tuyitaghire neryo itwabana obuwatikya erilua oko Mukristo mulikyetu.​—Emisyo 12:25; Yakobo 2:16.

18. Yehova akakolesaya ekirimu kiwe kibuyirire n’eBiblia erisubya oko misabe yetu kw’ati?

 ¹⁸ Yehova akakolesaya ekirimu kiwe kibuyirire erisubirya oko misabe yetu. Omughulu tukasaba obuwatikya bw’erilwa n’ekindu kilebe ekikatwaghalaya, anganakolesya ekirimu kiwe kibuyirire erituha obusondoli n’akaghala. (2 Abanya Korinto 4:7) Kandi Yehova akakolesaya eBiblia erisubirya oko misabe yetu n’erituwatikya eriyisogha ndeke. Omughulu tukasoma eBiblia twanganabana erisako erikendituwatikya. Kandi Yehova anganakolesya omundu oyukasubaya oko mabulyo k’omo mihindano eribugha ekyo tutolere eryowa kutse anganakolesya omusyakulu w’endeko eritubwira enzumwa eyiri omo Biblia.​—Abanya Galatia 6:1.

19. Busana naki kyanganalangirika Yehova nga syalitatusubirya oko misabe yetu?

¹⁹ Aliwe, akandi katambi twanganayibulya tuti, ‘Busana naki Yehova syatasubya oko misabe yaghe?’ W’ibuke ngoko iye yo w’asi ng’angatusubirya oko misabe yetu kw’ati kandi mughulu wahi. Asi ebyo tuyitaghire. Eyindi ndambi lyanganatolera erisaba butsira eriluha omo mughulu mulebe tutoke erikangania ngoko ebyo tukasaba tulighirebyo n’erimukangania kwenene ngoko tumwikirirye. (Luka 11:5-10) Hanganabya n’akandi katambi, Yehova iniasubirya oko misabe yetu omo nzira eyo tutalwe tuyilindirireko. Eky’erileberyako, twanganasaba busana n’omughulu owakalire owo tulimo, aliwe omo mwanya w’eritulusya mugho, oMungu anganatuha akaghala k’eriyiyinia mugho.​—Soma Isaya 40:29.

20. Busana naki tutolere itwasaba Yehova y’oko mughulu wosi?

²⁰ Kwenene erisaba Yehova ni muyisa munene! Tutolere itwayiketera ngoko akendihulikirira emisabe yetu. (Esyonyimbo 145:18) Twamabya tukasaba Yehova y’oko mughulu wosi erilua omo mutima, obwira bwetu naye ibukendinoka.