1. Ni musabe wahi owasibwe owo tukendikaniako?

ABANDU bangyi b’asi omusabe owasibwe kutsibu owakahulawamo Thatha Wetu kutse oMusabe w’oMukama. Yesu mwakolesya omusabe oyo erikangirirya abigha biwe ngoko bangasaba. Eby’asaba omo musabe oyo ni bihi? Kandi busana naki omusabe oyo ni w’omughaso okwitwe munabwire?

2. Ni bindu bisatu byahi ebyo Yesu akangiriraya ati itwasaba?

² Yesu mwabugha ati: ‘Neryo ko musabe mutya, muti, Thatha wetu oyuli elubula, erina lyawu libye libuyirire. Obwami bwawu bwase. Erisonda lyawu liyirawe, omo lubula na kutya omo kihugho.’ (Soma Matayo 6:9-13, NWT) Ekyaleka Yesu iniatukangirirya erisaba ebindu bisatu ebyo ni kihi?​—Lebaya Endomeko 20.

3. Ebyo tutolere itwaminya oko Bwami bw’oMungu ni byahi?

³ Twabir’igha ngoko erina ly’oMungu yo Yehova. Kandi twabir’igha erisonda ly’oMungu nga ni ryahi oko bandu n’ekihugho. Aliwe Yesu asonda eriminyisyaki akabugha ati: “Obwami bwawu bwase”? Tukend’igha oBwami bw’oMungu nga niki, ekyo bukasyakola, kandi ngoko bukasyayira erina ly’oMungu mo libuyirire.

4. OBwami bw’oMungu niki, n’oMwami wabo nindi?

⁴ Yehova mwahiraho obutabali bw’elubula, kandi mwasombola Yesu eribya Mwami wabo. EBiblia yikahula obutabali obo mo Bwami bw’oMungu. Yesu ni “Mukama w’abakama, n’oMwami w’abami.”  (Eribisulirwa 17:14) Yesu awite obutoki obw’erikola ebibuya bingyi kulenga omutabali wosi-wosi w’ekihugho, kandi awite obutoki bunene kutsibu kulenga abatabali abosi b’ekihugho n’omo bangahirwa haghuma.

5. OBwami bw’oMungu bukatabalira hayi? Bukasyatabala okuki?

⁵ Biro makumi ani enyuma sy’erilubuka liwe, Yesu mwasuba elubula. Neryo, Yehova mwamusombola eribya Mwami w’oBwami. (Emibiri 2:33) Obutabali bw’oMungu bukasyatabala ekihugho ibune elubula. (Eribisulirwa 11:15) Ky’ekikaleka eBiblia iyahula oBwami bw’oMungu mo ‘Bwami bw’elubula.’​—2 Timoteo 4:18.

6, 7. Ekikaleka Yesu iniabya mutabali oyulengire abandi bosi ab’ekihugho niki?

⁶ EBiblia yikabugha yiti Yesu alengire abatabali b’ekihugho kundi iye ‘syendisyaswahola na kera.’ (Abanya Roma 6:9) Abatabali bosi b’ekihugho bakahola, aliwe Yesu iye syendisyahola n’ahake. Ebibuya byosi ebyo Yesu akasyatukolera bikasyabyaho kera na kera.

⁷ Obuminyereri bw’eBiblia bukabugha buti Yesu akasyabya Mwami w’eritswera eritunganene n’ow’obulighe: ‘Ekirimu kya [Yehova] kyasyamwikalako, ekirimu kw’obwenge n’eriminya, ekirimu ky’erihana n’eky’amaka, ekirimu ky’eriminya n’eky’eryubaha [Yehova]. Naye asyatsema omo buba bwa [Yehova], kandi syendisyatswera busana n’ebyo akalolako omo meso wiwe kutse syalisoha busana n’ebyo akowa omo matwe wiwe; nikwa omo litunganene asyatswera abera.’ (Isaya 11:2-4) Wangan’anza eribya n’omutabali oyuli atya?

8. Tukaminya tuti ngoko Yesu syendisyatabala iyuwene?

⁸ OMungu abirisombola abandi bandu eritabala haghuma na Yesu omo butabali bw’elubula. Eky’erileberyako,  omukwenda Paulo mwabwira Timoteo ati: ‘Twamayiyinia, netu itukasyatabala haghuma naye.’ (2 Timoteo 2:12) Abakasyatabala haghuma na Yesu ni bangahi?

9. Abakasyatabala na Yesu ni bangahi? OMungu atsuka eribasombola mughulu wahi?

⁹ Ngoko tw’igha omo Sura 7, omukwenda Yoane mwakanganibwa embere, Yesu iniane elubula n’abandi bami 144 000. Abandu 144 000 ni bahi? Yoane mwabugha ati ‘bawite erina lya Yesu n’erina lya Thatha wiwe, awasakire oko mbumo syabo.’ Kandi ati: “Bakakwama Ekyana ky’Embuli [ni bughambu, Yesu] ahosi kikaya. Aba babirighulwa omo kati-kati k’abandu.” (Soma Eribisulirwa 14:1, 4.) Abandu 144 000 ni Bakristo abataleghula ab’oMungu abirisombola erisyatabala ekihugho haghuma na Yesu. Bakabya bahola bakalubukibawa oko ngebe y’elubula. (Eribisulirwa 5:10) Erilwa oko biro by’abakwenda, Yehova anemusombola Abakristo abateleghula eribya baghuma b’oko bami 144 000.

10. Busana naki ni ky’olwanzo Yehova erihiraho Yesu n’abandu 144 000 eritabala ekihugho?

¹⁰ Yehova atutsomene kutsibu kikaleka iniateghekania n’abandu ng’itwe eritabala na Yesu. Yesu akasyabya mutabali oyuwene kundi atwasi ndeke. Mwabya mundu kandi anasi eriaghalwa nga niki. Paulo mwabugha ati Yesu atutsomene kundi ‘akatukwira obulighe omo bolo bwetu,’ kandi ‘abirilengwako omo myatsi y’emisindo yosi.’ (Abaebrania 4:15; 5:8) N’abandu 144 000 nabo ni bandu ng’itwe, nabo b’asi ebikatuhikira. Kandi b’asi ngoko omundu akayowa busana n’eribya oyutahikahikene n’omughulu akalwala. Kwenene Yesu na bandu 144 000 bakasyaminya ndeke-ndeke ngoko tukayowa n’amaghali awo tukalolako.

11. Busana naki Yesu mwakangirirya abigha biwe erisaba bati erisonda ly’oMungu liyirawe omo lubula?

¹¹ Yesu mwakangirirya abigha biwe erisaba bati erisonda ly’oMungu liyirawe omo lubula. Busana naki? Motw’igha omo Sura 3 ngoko Sitani Diabolo mwaghana ery’owa Yehova. Abere abitsuka obutabwirika, Yehova mwamuleka n’abamalaika babi, kutse esyombinga, eribya ibane elubula omo katambi kalebe. Neryo abosi ababya elubula si babya bakakola erisonda ly’oMungu. Omo Sura 10, tukasy’igha bingyi ebilebirye Sitani n’esyombinga.

12. Ni myatsi mikulu-mikulu yahi ibiri eyikakanibawako omo Eribisulirwa 12:10?

¹² EBiblia yikatubwira yiti Yesu angabere abibya Mwami w’oBwami bw’oMungu, angalwire na Sitani. (Soma Eribisulirwa 12:7-10.) Omulondo 10 akakanaya oko myatsi mikulu-mikulu ibiri eyangakolekire. Obwami bw’oMungu eritsuka eritabala na Yesu Kristo mo Mwami wabo, na Sitani erighuswa oko kihugho erilua elubula. Ngoko tukend’igha, emyatsi eyi yabirikoleka.

13. Ekyabya omughulu Sitani aghusawa erulwa elubula niki?

¹³ EBiblia yikakanaya oko butseme obo abamalaika abateleghula babya nabo omughulu Sitani n’esyombinga siwe baghusawa erilwa elubula. Yikabugha yiti: “Inywe lubula mutseme, nenyu abikere omo lubula!” (Eribisulirwa 12:12) Lino elubula yiri obuholo bunene n’obughuma kundi abosi abaliyo bakakola erisonda ly’oMungu.

14. Ebikakoleka oko kihugho busana na Sitani erighuswa erilwa elubula ni byahi?

¹⁴ Aliwe engebe oko kihugho ko yite yitya. Abali omo kihugho bakalola oko bitsibu kundi “Sitani abiribandaghalirako  iniahitene kutsibu” kundi asi ‘kw’awite katambi kake buyira.’ (Eribisulirwa 12:12) Sitani ahitene kutsibu. Abirighuswa erilwa elubula, kandi anasi ko hakisiya hake iniatoghotibwa. Akayikasa kutsibu erileta ebitsibu, obulumi, n’eriaghalwa by’omo kihugho kyosi.

15. Erisonda ly’oMungu oko kihugho niki?

¹⁵ Aliwe erisonda ly’oMungu oko kihugho siririlyabinduka. Akin’anzire abandu abahikahikene ib’ikala kera na kera oko kihugho ekikasyabya paradiso. (Esyonyimbo 37:29) Neryo, oBwami bw’oMungu bukasyaberereraya ekyo kyo buti?

16, 17. Danieli 2:44 ikatubwiraki oko Bwami bw’oMungu?

¹⁶ Obuminyereri obuli omo Danieli 2:44 bukabugha buti: ‘N’oko biro by’abami abo, oMungu w’elubula asyahangania obwami obutendisyaheribwa na kera; kutse eritabala lyabo siryendisyasighirwa abandi bandu. Nikwa bwasyatulanga mo bihande-bihande, n’eribughaho amami wosi aya; nabo bwasyahangana kera na kera.’ Obuminyereri obo bukatw’ighisayaki oko Bwami bw’oMungu?

¹⁷ Eky’erimbere, bukatubwira buti Obwami bw’oMungu bwangatsukire eritabala “oko biro by’abami abo.” Eki kikakanganaya kiti awandi matabali angabere iniakine oko kihugho oBwami bukatsuka eritabala. Ekyakabiri, bukatubwira ngoko oBwami bw’oMungu bwangabereho kera na kera kandi isihali obundi butabali obwangasuba omo mwanya wabo. Ekyakasatu, hangabere amalwa omo kati k’oBwami bw’oMungu n’amami w’ekihugho kino. OBwami bw’oMungu bukasyakyinda amami wosi neryo ibo busa ibwatabala ekihugho kyosi. Neryo abandu bakasyabya n’obutabali obuwene kutsibu obo bate batalokako.

18. Amalwa w’enduli omo kati k’amatabali w’ekihugho n’oBwami bw’oMungu akahulawa mo ki?

 ¹⁸ OBwami bw’oMungu bukasyalusyaho buti amatabali w’ekihugho? Embere sy’amalwa w’enduli awakahulawa mo Harmagedoni, esyombinga sikasyatebaya ‘abami b’ekihugho, erihindaniabo omo malwa w’ekiro kinene ky’oMungu Omutoki w’Ebyosi.’ Kwenene, amatabali w’abandu akasyalwa n’oBwami bw’oMungu.​—Eribisulirwa 16:14, 16; lebaya Endomeko 10.

19, 20. Busana naki tukayitagha oBwami bw’oMungu eritabala ekihugho kyosi?

¹⁹ Busana naki tuyitaghire oBwami bw’oMungu? Tukanaye oko esyonzumwa isatu. Ey’erimbere, tuli bakoli b’amalolo, tukalwala n’erihola. Aliwe eBiblia yikabugha yiti omo Bwami bw’oMungu, tukasyabyaho kera na kera. Yoane 3:16 ikabugha yiti: “[OMungu] mwanza ekihugho ky’atya, kyaleka iniaha Mughala wiwe, Ekyusa kiwe, neryo oyukamwikiriraya syahere, nikwa abye n’engebe y’erikota.”

²⁰ Enzumwa ey’akabiri eyikaleka itwayitagha Obwami bw’oMungu ni busana tutimbirweko n’abandu babi. Abandu bangyi bakabugha amabehi, b’akiba, n’erisingira. Sihali ekyo twangakola eribalusyaho, aliwe oMungu iye akasyabalusyaho. Abandu abat’anzire erileka erikola ebindu bibi bakasyatoghotibwa oko malwa we Harmagedoni. (Soma Esyonyimbo 37:10.) Enzumwa ey’akasatu eyikaleka itwayitagha oBwami bw’oMungu ni busana amatabali w’abandu syawite kaghala, akakola ebitsibu, kandi anzire ekanyaka. Syatsomene eriwatikya abandu eryowa oMungu. EBiblia yikabugha yiti “omundu mughuma awite obutoki endata oko wundi erimuhutalya.”​—Omugambuli 8:9.

21. Obwami bukasyakola erisonda ly’oMungu ly’oko kihugho ko buti?

 ²¹ Enyuma sy’eHarmagedoni, oBwami bw’oMungu, bukasyakola erisonda ly’oMungu ly’oko kihugho. Eky’erileberyako, bukasyalusyaho Sitani n’esyombinga siwe. (Eribisulirwa 20:1-3) Neryo, sihendisyasyabya oyukalwala kutse oyukahola. Busana n’endihi eyikabohola, abandu abateleghula abosi bakasyikala omo Paradiso mo kera na kera. (Eribisulirwa 22:1-3) Obwami bukasyayira erina ly’oMungu mo libuyirire. Ekyo ni bughambu ki? Ni bughambu, oBwami bw’oMungu bukasyabya bukatabala ekihugho, abandu abosi bakasyaha erina lya Yehova ly’olukengerwa.​—Lebaya Endomeko 21.

22. Tukaminya tuti ngoko Yesu mwatabya Mwami iniane oko kihugho kutse anabilubuka?

²² Yesu mwakangirirya abigha biwe erisaba bati, ‘Obwami bwawu bwase.’ Ekyo mokyakangania ngoko obutabali bw’oMungu bwangasire omo biro ebikasa. Yehova angatsukire erihiraho obutabali bwiwe n’eriyira Yesu mo Mwami wabo. Yesu mwanayirwa mo Mwami akanahika elubula? Iyehe, mwalindirira. Biro bilebe  enyuma sy’erulubuka lya Yesu, Petero na Paulo mobakangania ekyo kyo ndeke-ndeke bakakania ngoko obuminyereri obuli omo Esyonyimbo 110:1 bwabererera oko Yesu. Omo buminyereri obo, Yehova akabugha ati: “Wikale oko luhande lwaghe lw’amali, erihika aho nasyahirira esyonzighu syawu mo kitumbi ky’ebisando byawu.” (Emibiri 2:32-35; Abaebrania 10:12, 13) Yesu angalindire erihika kiroki Yehova imwamuyira mo Mwami?

23. (a) Yesu atsuka eribya Mwami w’obutabali bw’oMungu mughulu wahi? (b) Omo sura eyikwamire tukend’igha mo ki?

²³ Myaka mingyi embere omwaka we 1914 ahike, endeko y’Abakristo ab’ekwenene mobaminya ngoko omwaka oyo angabere mukulu omo buminyereri bw’eBiblia. Ebikakoleka omo kihugho eritsuka oko 1914 byabirikangania ngoko babya basingene. Yesu mwatsuka eritabala ng’oMwami omo mwaka oyo. (Esyonyimbo 110:2) Enyuma syaho, Sitani mwaghuswa oko kihugho, kandi lino “awite katambi kake buyira.” (Eribisulirwa 12:12) Omo sura eyikwamire, tukend’igha emyatsi mingyi eyikakanganaya ngoko tuli omo akatambi ako. Kandi tukend’igha ngoko hakisiya hake, OBwami bw’oMungu ibwakola erisonda ly’oMungu ly’oko kihugho.​—Lebaya Endomeko 22.