1, 2. Twangabana obusayiro bo hayi munabwire?

TERILENGEKANIA, unemuyilenderya eyihya, neryo ekihunga kinene ikyatsuka. Olubula ilwahîmba, obutuku ibwatsuka eripalya n’eripura. Neryo embula iyawa. Wamasondya ah’eryuwama. Wamatsema kutsibu ukabana ah’eryuwama ahatolere!

² Munabwire tuli omo mibere eyiri ng’eyo. Emibere y’ekihugho yikalolaya embere eribya mibi kutsibu. Wanganayibulya uti, ‘Ni hayi aho nangabana obusayiro?’ Omuhandiki w’esyonyimbo mwabugha ati: “Ngendisyabwira Yehova nyiti: ‘Uli busayiro bwaghe n’obubisano bwaghe, [oMungu] waghe oyo ngayiketera.’” (Esyonyimbo 91:2, NWT) Kwenene, Yehova akatusubaya omutima w’omonda omo maligho wa lino, kandi akatuha eriyiketera erikatsemesaya omo biro ebikasa.

3. Twangayira Yehova mo busayiro bwetu tuti?

³ Yehova angabya busayiro bwetu ati? Anganatuwatikya eriyiyinia n’erilwa n’ebyosi ebikatwaghalaya, kandi awite obutoki obulengire obw’omundu wosi-wosi oyo wangasonda erituhutalya. N’omo kindu kibi kyangatuhikira lino, tukayiketera ngoko omo biro ebikasa Yehova akasyalusyaho ebituwene byosi. EBiblia yikatubwira yiti: ‘Muyitsinge omo lwanzo lw’oMungu.’ (Yuda 21, NWT) Tutolere itwahatikana eribya bira bw’oMungu biro byosi imwatoka erituwatikya omo biro ebikalire. Aliwe twangakola ekyo kyo tuti?

4, 5. Yehova abiritukangania olwanzo lwiwe lw’ati?

⁴ Twamanza erihatikana eribya bira ba Yehova biro  byosi, tutolere itwaminya ngoko atwanzire kutsibu. Terilengekania oko byosi ebyo Yehova abiritukolera. Mwatuha ekihugho kibuya, amusulya mukyo mw’emiti n’esyonyama esikatsemesaya. Abirituha n’ebyalya ebisihire n’amaghetse aw’erinywa awasongokere. Omo Biblia, Yehova abiritukangirirya erina liwe n’emibere yiwe eyikatsemesaya. Ekikulu oko byosi, mwatukangania olwanzo omughulu atuma Mughala wiwe, Yesu, y’oko kihugho eriherera engebe yiwe busana netu. (Yoane 3:16) Kandi busana n’obuhere obo, tuwite eriyiketera erikatsemesaya omo biro bikasa.

⁵ Yehova abirihiraho oBwami bwa Masiya, hakisiya hake obutabali bw’elubula obo ibwabughaho eriaghalwa lyosi. Obwami obo bukasyayira ekihugho mo paradiso, omo paradiso eyo obuli mundu akasyabya omo buholo n’obutseme kera na kera. (Esyonyimbo 37:29) Eyindi nzira eyo Yehova akatukanganaya mw’olwanzo ly’eritukangirirya ngoko twangabya n’engebe eyuwene lino. Kandi akabugha ati tumusabe, na kandi anayiteghekire erihulikirira emisabe yetu. Kwenene Yehova akakanganaya olwanzo lwiwe l’obuli mughuma w’okw’itwe.

6. Wangakangania wuti ngoko ukasima Yehova busana n’olwanzo lwiwe?

⁶ Wangakangania wuti ngoko ukasima Yehova busana n’olwanzo lwiwe? Ukanganaye oMungu ngoko ukamusima busana n’ebyosi eby’abirikukolera. Eky’obulighe abandu bangyi munabwire sibalimusima. Ko byanabya bitya n’omughulu Yesu abya oko kihugho. Kiro kighuma Yesu mwalamya abahagha ikumi, aliwe omughuma musa yo wamuha ewasingya. (Luka 17:12-17) Twanzire itwabya ng’omulume oyo waha Yesu y’ewasingya. Tutolere itwabya tukaha Yehova y’ewasingya mughulu wosi.

7. Tutolere itwanza Yehova yo tuti?

⁷ Netu tutolere itwakangania ngoko twanzire Yehova. Yesu mwabwira abigha biwe ati batolere ibanza Yehova n’omutima  wabo wosi, n’engebe yabo yosi, n’obulengekania bwabo bosi. (Soma Matayo 22:37.) Eryo ni bughambuki?

8, 9. Twangakangania Yehova ngoko tumwanzire tuti?

⁸ Eribugha omo buno lisa tuti twanzire Yehova ly’erimwanza kwehi? Iyehe. Twamanza Yehova n’omutima, engebe, n’obulengekania bwetu bwosi, itukendimukangania olwanzo lwetu l’omo mikolere yetu. (Matayo 7:16-20) Kwenene eBiblia yikabugha yiti eryanza oMungu, ly’erikwama ebilayiro biwe. Ekyo kinakalire? Iyehe, kundi ‘[ebilayiro] bya Yehova sibikalire.’​—Soma 1 Yoane 5:3.

⁹ Twamahulikirira Yehova, itukendibya n’engebe eyuwene n’eyobutseme. (Isaya 48:17, 18) Aliwe, ekikendituwatikya erihatikana eribya bira ba Yehova mughulu wosi niki? Tulebaye.

10. Busana naki litolere iwayitsinga erigha eriminya Yehova?

¹⁰ Wabya mwira wa Yehova wuti? Er’igha eBiblia lyamabikuwatikya eriminya Yehova yo ndeke n’erinokya obwira haghuma naye. Obwira obo buli ng’omuliro ow’omundu akabetekerera kundi syanzire ati alime. Ngoko esyongwi sikaleka omuliro iniatalima, naghu kutya utolere iwayitsinga erigha eriminya Yehova neryo obwira bwenyu bukendibya ibunawatire obuli kiro.​—Emisyo 2:1-5.

11. Ebyo uk’igha omo Biblia byangahamba oko mutima waghu ko biti?

¹¹ Omughulu ukayitsinga erigha eBiblia, ukend’igha emyatsi eyikakuhamba oko omutima. Lebaya abigha babiri ba Yesu ngoko b’ayowa akabasobolera amaminyereri w’eBiblia. Mobabugha bati: “Emitima yetu muyitetahuhana omw’isi wetu akakania netu omo nzira, n’omughulu alyatukaniraya Amasako kwehi?”​—Luka 24:32.

12, 13. (a) Ekyangahikira olwanzo lwetu oko Mungu niki? (b) Twamabya itusondire tuti olwanzo lwetu oko Yehova isilwaholoka twangayira tuti?

 ¹² Ngoko ebyo abigha ba Yesu bowa omo Masako byahamba oko mitima yabo, naghu wanganabya ikowayowa wutya ukatsuka eriminya ndeke ebyo eBiblia yikabugha. Ekyo mokyakuwatikya eriminya Yehova n’erimwanza. Siwanganza uti olwanzo olo luholoke.​—Matayo 24:12.

¹³ Wamabibya mwira w’oMungu, litolere iwayikasa kutsibu eribetekerera obwira obo bubye ibunawatire. Utolere iwayitsinga erigha erimuminya n’eriminya Yesu, kandi n’eribya ukalengekania oko ebyo uk’igha, n’erilengekania ngoko wangakolesya byo omo ngebe yaghu. (Yoane 17:3) Omughulu ukasoma kutse erigha eBiblia, yibulaye: ‘Kino kyamanyikangiriryaki oko Mungu Yehova? Busana naki litolere inamwanza n’omutima waghe wosi n’engebe yaghe yosi?’​—1 Timoteo 4:15.

14. Omusabe akawatikaya olwanzo lwetu oko Yehova eribya ilunawatire ati?

 ¹⁴ Wamabya n’omwira oyuwene, ukakanaya naye oko buli mughulu, n’ekyo kikaleka obwira bwenyu ibwabya ibunawatire. Kutya, omughulu tukakanaya na Yehova oko buli mughulu omo musabe, kikaleka olwanzo lwetu okwiye ilwabya ilunawatire. (Soma 1 Abanya Tesalonika 5:17.) Omusabe ni kihembo kibuya ekikalwa ewa Tata wetu w’elubula. Obuli mughulu litolere itwamubwira ebikalwa omo mutima. (Esyonyimbo 62:8) Silitolere eribya tukasubirira omo misabe eyo twabirihamba omo mutwe, aliwe tutolere itwamubwira ebikalwa omo mutima. Kwenene, twamayitsinga erigha eBiblia n’erisaba ebikalwa omo mutima, olwanzo lwetu oko Yehova ilukendibya ilunawatire.

15, 16. Omubiri w’eritulaghania engulu yuwene ukalangiragho wuti?

¹⁵ Twamanza eribya itune bira ba Yehova litolere itwabya tukabwira abandi b’okw’ebyo twikirirye. Eribwira abandi b’oko mwatsi wa Yehova ni muyisa munene. (Luka 1:74) Kandi oyo ni mubiri owo Yesu aha Abakristo bosi ab’ekwenene. Obuli Mukristo w’ekwenene atolere iniatulaghania engulu yuwene ey’oBwami bw’oMungu. Naghu wabiritsuka erikola utya?​—Matayo 24:14; 28:19, 20.

¹⁶ Omukwenda Paulo iniakalangira omubiri w’eritula engulu yuwene mo w’obughuli bunene, neryo mwahulagho mo “buteke.” (2 Abanya Korinto 4:7) Eribwira abandi b’oko mwatsi wa Yehova n’erisonda liwe w’omubiri w’omughaso munene owo wangakola. Ni nzira eyo wangakolera mo Yehova, kandi akatsemera ebyo ukamukolera. (Abaebrania 6:10) Kandi eritulira abandi b’engulu yuwene lyanganakuwatikya iwe n’abakakuhulikirira kundi  omughulu ukakola utya ukawatikaya abandi n’eriyiwatikya eriyitunda hakuhi na Yehova, n’erisyabana engebe y’erikota. (Soma 1 Abanya Korinto 15:58.) Hanganabya oghundi mubiri owangakuletera obutseme obulengire obo?

17. Busana naki omubiri w’eritula engulu yuwene ni w’erikola luba?

¹⁷ Omubiri w’eritulira abandi b’engulu yuwene ni w’erikola luba. Tutolere ‘itwatula engulu yuwene’ kandi tutolere ‘itwahatikana.’ (2 Timoteo 4:2) Abandu batolere ibowa ebilebirye oBwami b’oMungu. EBiblia yikabugha yiti: “Ekiro kinene kya [Yehova] kiri hakuhi, kiri hakuhi kandi kikasa luba.” Enduli ‘siyendi mala!’ (Zefania 1:14; Habakuki 2:3) Kwenene, hakisiya hake, Yehova iniatoghotya ekihugho kibi kya Sitani. Embere sy’ekiro ekyo, litolere abandu ibabwirwa ekikandibya batoke erisombola erikolera Yehova.

18. Busana naki litolere itwaramya Yehova haghuma n’abandi Bakristo ab’ekwenene?

¹⁸ Yehova anzire itwamuramya haghuma n’abandi Bakristo ab’ekwenene. EBiblia yikabugha yiti: ‘Tughaniraye ngoko twang’ibukania oko lwanzo n’emibiri yuwene. Si tuleke erihindana lyetu haghuma, ng’emibere y’abandi bandu, nikwa tusikanaye mutima. Kandi tuyitsinge omw’ebyo, omughulu tukalangira ekiro ky’oMukama kikahika hakuhi.’ (Abaebrania 10:24, 25) Tutolere itwayikasa kutsibu erihika oko mihindano yosi. Emihindano yikatuha akanya ak’erihimbana n’erisubania m’omutima.

19. Ekyangatuwatikya erianza abalikyetu Bakristo niki?

¹⁹ Omughulu ukahika oko mihindano, ukendibana abira abuwene abakendikuwatikya eriramya Yehova. Ukendihindana na baghala betu na bali betu mina-mina abakayikasa ngawe eriramya Yehova. Nabo kobane ngawe, sibahikahikene kandi bakatandalawa. Bamatandalwa, utolere iwabaghanyira. (Soma Abanya Kolosai 3:13.) Ekyo utolere iwatsomana kutsibu obuli kiro y’emibere mibuya  y’abalikyetu Abakristo, wamabya ukakola utya ikikendikuwatikya erianzabo n’eriyitunda hakuhi na Yehova.

20, 21. “Engebe eyiri ngebe kundu” kutse engebe y’ekwenene niki?

²⁰ Yehova asondire ati abira biwe bosi babye n’engebe eyuwene. EBiblia yikatubwira yiti omo biro ebikasa engebe yetu yikasyuwana kutsibu kulenga eyo tulinayo lino.

²¹ Omo biro ebikasa, tukasyabya n’engebe y’erikota, butsira engebe nguhi y’emyaka 70 kutse 80 misa. Tukasyabya ‘n’engebe y’erikota’ n’emibîri eyihikahikene, omo buholo, n’obutseme omo paradiso. Eyo y’eBiblia yikahula mo ‘engebe eyiri ngebe kundu kutse engebe y’ekwenene.’ Yehova akalagha erituha engebe y’ekwenene, aliwe tutolere itwayikasa “erihamba ndeke” engebe eyo.​—1 Timoteo 6:12, 19.

22. (a) Twangatoka tuti ‘erihamba ndeke engebe y’ekwenene’? (b) Busana naki sitwangatolera engebe y’erikota?

²² Twangatoka tuti ‘erihamba ndeke engebe y’ekwenene’? Tutolere ‘itwakola ebibuya’ n’eribya ‘bateke omo mikolere eyuwene.’ (1 Timoteo 6:18) Eryo ni bughambu litolere itwakola ebyo tuk’igha omo Biblia. Aliwe, situlibana engebe y’ekwenene busana n’akaghala ketu itwibenebene. Sihali ekyo twangakola erisingana oko ngebe y’erikota. Ni kihembo ekyo Yehova akaha abaghombe biwe abateleghula butsir’iriha, akakanganaya ‘olukogho lwiwe olo tutatolere.’ (Abanya Roma 5:15) Kwenene Tata wetu w’elubula anzire iniaha abaghombe biwe abateleghula b’ekihembo ekyo.

23. Utolere iwasombola ndeke lino busana naki?

²³ Yibulaye, ‘Nyinemuramya oMungu y’omo nzira ey’akaligha?’ Wamalangira uti ukine n’emibere eyo utolere iwasubako, isiwalindirira. Twamayiketera Yehova kandi twamayikasa erimwowa, Yehova iniakendibya busayiro  bwetu. Akateghaya abandu biwe abateleghula b’omo biro by’enduli eby’ekihugho kibi kya Sitani kino. Neryo Yehova akasyaberereraya eky’alagha abandu biwe eribaha engebe y’omo paradiso mo kera na kera. Kwenene, wanganabana engebe y’ekwenene wamasombola ndeke lino!