OMungu mwateghekania olubuto lwa tatakulu Abrahamu mo kihanda kandi mwaha olubuto olu lw’emighambo. Ekihanda ekyo mwakiha erina lya “Israeli,” neryo mwaha Abaisraeli omubiri w’erilolya embere eriramya lye kwenene n’ekwenene y’ekinywa kiwe. (Esyonyimbo 147:19, 20) Busana n’ekyo, Abaisraeli bangalekire ebihanda byosi ibyatsumulwa.​—Usome Enzuko 22:18.

OMungu mwasombola Abaisraeli eribya abimiri biwe. Ebyo balolako bikakanganaya ngoko abandu bakatsumulawa bamakwama emighambo y’oMungu. (Eryibuka Ebihano 4:6) Kwesi, erilabira omo Baisraeli, abandi bandu bangaminyire oMungu w’ekwenene.​—Usome Isaya 43:10, 12.

Habere hahwa biro, Abaisraeli mubaherya obughuma bwabo n’oMungu, neryo Yehova mwabaghana n’erihira endeko y’eKikristo omo mwanya wabo. (Matayo 21:43; 23:37, 38) Munabwire, Abakristo b’ekwenene b’Abimiri ba Yehova, omo mwanya w’Abaisraeli.​—Usome Emibiri 15:14, 17.

Yesu mwateghekania abigha biwe erighisya abandu omo kihugho kyosi. (Matayo 10:7, 11; 24:14; 28:19, 20) Omubiri oyu anemwasa akahwererera omo biro bino bye nduli. Yehova anemukumakumira haghuma erilwa omo bihanda byosi amamiliyoni w’abandu omw’iramya ly’ekwenene, ekindu ekite kyatabya kera. (Eribisulirwa 7:9, 10) Abakristo b’ekwenene bali omo ndeko busana nerisubania emitima omonda n’eriwatikania. Omo kihugho kyosi, bawite e programe nguma eyer’igha eBiblia omo mihindano yabo.​—Usome Abaebrania 10:24, 25.

Omo miaka ye 1870, abigha bake b’eBiblia mubatsuka erikwesa emyatsi y’ekwenene y’eBiblia eyabya iyabiribulirana. Babya banasi ngoko Yesu mwateghekania endeko y’eKikristo itoke eritula engulu, neryo mubatsuka erihubirya Obwami omo kihugho kyosi. Omo mwaka we 1931 mubimia erina ly’Abimiri ba Yehova.​—Usome Emibiri 1:8; 2:1, 4; 5:42.

Omo mughulu w’abakwenda, esyondeko sy’eKikristo esyabya omo biharo mina-mina isikasondolawa n’ekyaghanda kikulu ekyabya kyasi Yesu ko yo Mutwe w’endeko. (Emibiri 16:4, 5) Munabwire kutya, Abimiri ba Yehova omo kihugho kyosi bakasondolawa n’Ekyaghanda Kikulu ky’abasyakulu abasi emyatsi mingyi. Ekyaghanda eki kikimanira esyo Beteli sy’Abimiri ba Yehova esikahindula emibughe, erikokotya ebitabu ebikimira eBibilia omo mibughe kulenga 600. Omo nzira eyi, Ekyaghanda Kikulu kikateghekanaya emyatsi y’erihimba n’erisondola eyikalwa omo Biblia oko syondeko kulenga 100 000 omo kihugho kyosi. Omo buli ndeko, abalume abatolere bakakola ng’abasyakulu, kutse ng’abalebererya. Abalume aba bakateghaya esyombuli sy’oMungu.​—Usome 1 Petero 5:2, 3.

Abimiri ba Yehova bateghekanibwe eritula engulu mbuya n’eriyira abandu mo bigha. Ng’abakwenda b’erimbere, tukahubiraya nyumba oko nyumba. (Emibiri 20:20) Kandi tuk’igha eBiblia n’abanzire eriminya ekwenene. Aliwe Abimiri ba Yehova si ndondeko buyira. Tuli kihanda ekiwite Tata w’olwanzo. Tuli baghala n’abali, tukawatikanaya. (2 Abanya Tesalonika 1:3) Kundi abandu ba Yehova bali omo bughuma busana n’eritsemesya oMungu n’eriwatikya abandi, kikaleka ekihanda kyabo ikyabya ekitsemire kulenga ebyosi oko kihugho.​—Usome Esyonyimbo 33:12; Emibiri 20:35.