ESOMO 5
Erisonda ly’oMungu oko kihugho niki?
1. Ekyaleka oMungu iniahangika ekihugho niki?
Yehova mwaha abandu b’ekihugho. Ni bwikalo bwetu. Busana n’ekyo, abandu b’erimbere, yo Adamu na Eva, mubatahangikwa erisulya olubula. OMungu abya iniabirihangika abamalaika eribya elubula. (Yobu 38:4, 7) Aliwe, oMungu mwahira omundu w’erimbere y’omo paradiso eyuwene; iyikahulawa mo eririma lye Edeni. (Enzuko 2:15-17) Yehova abya anzire omundu oyu n’abana biwe b’ikale oko kihugho kera na kera.—Usome Esyonyimbo 37:29; 115:16.
Okwitsuka, eririma lye Edeni lisa lyo lyabya paradiso. Omulume n’omukali ab’erimbere bangasulirye ekihugho mw’abana babo. OMungu abya anzire ibahika okwitabala ekihugho kyosi n’erikiyiramo paradiso. (Enzuko 1:28) Ekihugho sikyendisyatsandibwa na hake. Kikendisyabya bwikalo bw’abandu ebirimo n’ebirimo.—Usome Esyonyimbo 104:5.
Lebaya evideo OMungu ahangyika ekihugho busanaki?
2. Busanaki ekihugho si paradiso lino?
Yo Adamu na Eva mubat’owa oMungu, neryo mwabahigha omw’irima. Eparadiso muyahera, kandi sihali omundu oyo abiritoka erisubyayo. EBiblia yikabugha yiti: ‘Ekihugho kyabirihirwa omo byala by’ababi.’—Yobu 9:24; Soma Enzuko 3:23, 24.
Yehova abirilemwa eriberererya erisonda liwe ly’erimbere? Iyehe! Iye ni Mutoki w’Ebyosi. Syangalemwa. (Isaya 45:18) Akendisyaberererya erisonda liwe ly’erimbere.—Usome Esyonyimbo 37:11, 34.
3. Eparadiso yikendisyasubaho yiti?
Ekihugho kino kikendisyasyabya paradiso omo butabali bwa Yesu ng’Omwami oyo Mungu abirihiraho. Omughulu w’evita eyikahulawamo Harmagedoni, Yesu akendisyasondola abamalaika b’oMungu eritoghotya abosi abakaghana oMungu. Enyuma syaho, akendisyahira Sitani y’omo muliki, naye akendisyabugha mw’emyaka 1 000. Abandu b’oMungu bakendisyalama kundi Yesu akendisyabasondola n’eribateya. Bakendisyabana engebe y’erikota omo Paradiso oko kihugho.—Usome Eribisulirwa 20:1-3; 21:3, 4.
4. Eriaghalwa likendisyahwa mughulu wahi?
OMungu akendisyatsandya ababi oko kihugho mughulu wahi? Yesu mwabugha ‘ekiminyikalo’ ekyangakanganirye ngoko enduli yiri hakuhi. Ebikakoleka omo kihugho munabwire byamalekwaho byanganahwerekererya abandu, kandi bikakanganaya ngoko tuli omo biro ‘by’erihwererera ly’emighulu.’—Usome Matayo 24:3, 7-14, 21, 22.
Omo butabali bwiwe obw’emyaka 1 000 iniane elubula, Yesu akendisyabughaho amalighe wosi oko kihugho. (Isaya 9:6, 7; 11:9) Yesu akendisyakola ng’Omuhereri Mukulu, neryo akendisyasangula amalolo aw’abosi abanzire oMungu. Neryo erilabira omo Yesu, oMungu akendisyabughaho asyondwala, erikekeluha, n’oluholo.—Usome Isaya 25:8; 33:24.
5. Ni bahi abakendisy’ingira omo Paradiso?
Oko Kisenge ky’Obwami, ukendyeya abandu abanzire oMungu n’abawite engumbu nene y’erigha ngoko bangatsemesya oMungu
Abandu abak’owa oMungu bakendisy’ingira omo Paradiso. (1 Yoane 2:17) Yesu mwatuma abigha biwe ati basondekanaye abandu ab’omutima molo kandi ati bakangirirayebo ngoko bangatsemesya oMungu. Munabwire, Yehova anemuteghekania abandu bangyi erisyabya omo kihugho Paradiso. (Sefania 2:3) Oko Bisenge by’Obwami eby’Abimiri ba Yehova, abandu bak’igha ngoko bangabya abira babuya n’abakali babuya kandi ngoko bangabya babuti babuya. Abana n’ababuti babo, abosi bakaramaya oMungu haghuma kandi bak’igha ngoko engulu mbuya yanganabawatikya.—Usome Mika 4:1-4.
