Omo syodini syosi mukabya imune abandu abanzire eriminya ekwenene. Kikatsemesaya eriminya ngoko oMungu akalangira abandu abo, kandi ngoko abatsomene. Aliwe eky’obulighe, esyodini syabirikolesibwa omo syonzira situwene. (2 Abanya Korinto 4:3, 4; 11:13-15) Esyongulu sikabugha siti, esindi dini syabiriyingirya omwita bandu bangyi, omo malwa, omwighalya abana n’eribakola kw’ebyagha. Abandu abikirirye kwenene oMungu bakabya n’obulighe bakalangira ebi!​—Usome Matayo 24:3-5, 11, 12.

Edini y’ekwenene yikapipa oMungu, aliwe esyodini sy’amabehi sikamuhitanaya. Sikakangiriraya emyatsi eyite omo Biblia, ng’amabehi oko Mungu n’oko luholo. Aliwe Yehova anzire abandu ibaminya ekwenene okwiye.​—Usome Ezekieli 18:4; 1 Timoteo 2:3-5.

Ekyeritsemera, oMungu syangatebwa n’esyodini esikabugha siti simwanzire aliwe kwenene isianzire ekihugho kya Sitani. (Yakobo 4:4) EKinywa ky’oMungu kikahula esyodini syosi sy’amabehi mo ‘Babeli Mukulu.’ Babeli abya muyi wa kera owatsuka mw’amakangirirya w’amabehi enyuma Amaghetse Eribwagha oko kihugho omo mughulu wa Noa. Hakisiya hake oMungu iniabughaho omwitsumbukania esyodini esikakangiriraya amabehi n’erinubya abandu.​—Usome Eribisulirwa 17:1, 2, 5, 16, 17; 18:8.

Hane eyindi ngulu mbuya. Yehova sy’abirirwe abandu abanzire ekwenene abali omosyodini sy’amabehi omo kihugo kyosi. Anemuhindania abandu ng’abo haghuma akabakangirirya ekwenene.​—Usome Mika 4:2, 5.

Yehova atsomene abandu abanzire ekwenene n’abanzire erikola ebyuwene. Akabahana ati balwe omo syodini sy’amabehi. Abandu abanzire Yehova banemuligha erisuba oko mibere yabo n’eritsemesya oMungu.​—Usome Eribisulirwa 18:4.

Omo mughulu w’abakwenda, abandu abanzire ekwenene babere b’owa engulu mbuya yikatulwa n’abakwenda, mubalighayo n’obutseme. Mub’igha enzira nyihya-nyihya eya Yehova, eyikaleta etseme omo ngebe, kandi eyiwite ekihenderwako n’amaha. Litolere itwakola ngoko bakola kundi mubaligha engulu mbuya omwilabya erisonda lya Yehova embere sy’engebe syabu.​—Usome 1 Abanya Tesalonika 1:8, 9; 2:13.

Abandu banemulwa omo syodini sy’amabehi na Yehova anemubakokya omo kihanda eky’abakamuramaya. Naghu wamabiligha omulaghe oyu owa Yehova oweribirikira abandu, iwukendibya mwira wiwe, ukend’ingira omo kihanda kihya-kihya eky’abandu abakaramaya Yehova abanzene kundu, n’erisyabana engebe y’erikota.​—Usome Mariko 10:29, 30; 2 Abanya Korinto 6:17, 18.

Eritswerwa ry’esyodini sy’amabehi erikasa ni ngulu mbuya. Likendisyalusya ekihugho kyosi omo nabi. esyodini sy’amabehi sisyendisyasyateba n’erighaba abandu. Abandu bosi bakendisyaramya oMungu mughuma w’ekwenene omo bughuma.​—Usome Eribisulirwa 18:20, 21; 21:3, 4.