ESOMO 3
Kwenene engulu mbuya yikalwa ew’oMungu?
1. EBiblia yalwa hayi?
Omo Biblia muli engulu mbuya eyikabugha yiti abandu bakendisyabya oko kihugho kera na kera. (Esyonyimbo 37:29) EBiblia yirimo ebitabu 66. Yahandikawa n’abalume abatereghula hakuhi 40. Ebitabu bitano eby’embere-mbere byahandikawa na Musa, hamamilaba emyaka hakuhi 3 500. Ekitabu eky’enduli kyahandikawa n’omukwenda Yoane hamabilaba emyaka kulenga 1 900. Abahandika eBiblia babya ibakahandika amalengekania wandi? OMungu iniakabasondola erilabira omo kirimu kiwe kibuyirire. (2 Samweli 23:2) Mubahandika amalengekania w’oMungu, butsira awabo. Kwesi, eBiblia ni kitabu ekyalwa ewa Yehova.—Usome 2 Timoteo 3:16; 2 Petero 1:20, 21.
Lebaya evideo EBiblia ni kitabu kyandi?
2. Busanaki tw’ikirirye ngoko eBiblia ikabugha ekwenene?
Tukaminya ngoko eBiblia yalwa ew’oMungu kundi yikabugha ndeke-ndeke ebikendisyabya omo biro ebikasa. Sihali omundu oyo wangakola atya. (Yosua 23:14) OMungu musa, Omutoki w’Ebyosi, yo wangabugha ndeke-ndeke ebikendisyabya.—Usome Isaya 42:9; 46:10.
Ekitabu ekikalwa ew’oMungu sikyangabya ng’ebindi; eBiblia ko yiri yitya. Esyo Biblia nyingyi syabirighabwa omo mibughe mingyi. N’omo kine kitabu kya kera, emyatsi eyirimo yikahambana n’esayansi. Abahandiki hakuhi 40 bayo, mubahandika emyatsi eyihambene. * Na kandi, eBiblia yikakanganaya ndeke-ndeke olwanzo lw’oMungu; yiwite obutoki bw’eribindula emibere y’abandu. Ebi bikaleka abandu bangyi ibikirirya ngoko eBiblia ni Kyinywa ky’OMungu.—Usome 1 Abanya Tesalonika 2:13.
Lebaya eVideo Ekikaleka itwikirirya ngoko eBiblia ikabugha ekwenene niki?
3. EBiblia yikakanaya oko ki?
EBiblia yikakanaya kutsibu ngoko oMungu ali n’erisonda ly’olwanzo oko bandu. Amasako akakanganaya ekyaleka omundu iniahiwa omo paradiso, na kandi ngoko eparadiso eyi yikendisyasubibwaho.—Usome Eribisulirwa 21:4, 5.
Kandi eKinywa ky’oMungu kirimo emighambo, esyokanuni, n’amahano. EBiblia yikakanganaya ngoko oMungu abya akakolera abandu biwe kera; eki kikaleka itwaminya emibere yiwe. Kwesi, eBiblia yanganakuwatikya eriminya oMungu. Yikakanganaya ekyo wangakola utoke eribya mwira wiwe.—Usome Esyonyimbo 19:7, 11; Yakobo 2:23; 4:8.
4. Wangaminya eBiblia yo uti?
Akatabu kano kakendikuwatikya uminye eBiblia omwikolesya enzira eyo Yesu akwama. Iniakakolesaya amasako n’eryowisyagho.—Usome Luka 24:27, 45.
Sihali ekikatsemesaya ng’engulu mbuya eyikalwa ew’oMungu. Aliwe, abaghuma sibaitsomene, n’abandi bakapona bak’owa yo. Iwe, uhande omutima. Erigha eriminya oMungu Iyo likendisyaleka iwabana engebe y’erikota.—Usome Yoane 17:3.
^ par. 3 Usome akatabu Kitabu kwa Ajili ya Watu Wote.
