Omuhangiki wetu atulengire amenge. Nga Tata w’olwanzo, atutsomene kundu. Kandi mwatatuhangika tuyisondole itwibene. (Yeremia 10:23) Ngoko litolere omwana inyasondolwa n’ababuti, itwe bosi tutolere erisondolwa n’oMungu. (Isaya 48:17, 18) Esyokanuni esiri omo Biblia sikatuha obusondoli, n’obusondoli obu ni kihembo ekikalwa ew’oMungu.​—Usome 2 Timoteo 3:16.

Emighambo n’esyokanuni sya Yehova bikatukangiriraya ngoko twangabya n’amaisha awuwene lino, kandi ngoko twangabana emiyisa ya kera na kera omo biro ebikasa. Kundi oMungu yo watuhangika, ni ky’amenge itwatsemera erikwama ndeke obusondoli bwiwe.​—Usome Esyonyimbo 19:7, 11; Eribisulirwa 4:11.

Esyokanuni sy’eBiblia ni kwenene sy’omughaso esitesubawako. Aliwe Emighambo ikakola oko mughulu mulebe. (Eryibuka Ebihano 22:8) Litolere itwakolesya amaka wetu w’erilengekania eriminya ngoko akanuni kalebe k’eBiblia kakakola omo mibere milebe. (Emisyo 2:10-12) Ng’eky’erileberyako, eBiblia yikakangiriraya yiti engebe ni kihembo erilwa ew’oMungu. Akanuni ng’aka kanganatusondola itune oko kashi, itun’eka, n’omughulu tuli omo lughendo. Kakaleka itwayiteya okwihutala.​—Usome Emibiri 17:28.

Yesu mwakania oko syokanuni ngulu-ngulu ibiri. Akanuni ak’erimbere kakakanganaya ekyaleka oMungu inyabumba omundu—eriminya oMungu,  erimwanza, n’erimukolera butareghula. Litolere itwalengekania oko kanuni kano embere sy’erikola ikindu kyosi-kyosi. (Emisyo 3:6) Abakaghendera oko kanuni aka bakabya banwani b’oMungu, bakasyabana etseme y’ekwenene n’engebe y’erikota.​—Usome Matayo 22:36-38.

Akanuni ak’akabiri kakaleka itwatoka eribya bughuma n’abandi. (1 Abanya Korinto 13:4-7) Erikolesya akanuni ak’akabiri aka mo muli erigha ngoko oMungu akakolera abandu.​—Usome Matayo 7:12; 22:39, 40.

Esyokanuni sy’eBiblia sikaleka obunyumba ibwabya m’olwanzo. (Abanya Kolosai 3:12-14) EKyinywa ky’oMungu kikateghaya obunyumba omwikangirirya akandi kanuni akakakanganaya ngoko silitolere endwa iyatwika.​—Usome Enzuko 2:24.

Erighendera oko biri omo Biblia likendituwatikya eriteya ebindu byetu n’erituteya bunyamutima. Ng’eky’erileberyako, abinye mibiri bakanza abakoli abakaghendera oko syokanuni sy’eBiblia esyerikola omo kwenene n’erikola n’omuhwa. (Emisyo 10:4, 26; Abaebrania 13:18) Kandi eKyinywa ky’oMungu kikatukangiriraya eritsemera ebike ebyo tuwite n’erilangira obwira bwetu n’oMungu ko bulengire ebindu byetu kutse ebye kihugho.​—Usome Matayo 6:24, 25, 33; 1 Timoteo 6:8-10.

Erikolesya esyokanuni sy’eBiblia lyanganateya obuyingo bwetu. (Emisyo 14:30; 22:24, 25) Ng’eky’erileberyako, erighendera oko mahano w’oMungu awakaghanaya eritamira likatuteghaya oko makoni awakalire n’ebisida. (Emisyo 23:20) Yehova akatulighira erinywa obwabu, aliwe butsira erilabukirania. (Esyonyimbo 104:15; 1 Abanya Korinto 6:10) Esyokanuni sy’oMungu sikatuwatikaya omwitukangirirya eriyiteya oko ebyo tukakola n’amalengekania wetu. (Esyonyimbo 119:97-100) Nomobine, Abakristo b’ekwenene sibalikenga esyokanuni sy’oMungu kundi sikabawatikaya. Bakasikenga busana n’eriha oMungu y’olukengerwa.​—Usome Matayo 5:14-16.