Engulu mbuya yikalwa oko Yehova, oMungu w’obutseme, oyw’anzire obunyumba ibwabya m’obutseme. (1 Timoteo 1:11) Iye yo atsukisaya endwa y’erimbere. Obunyumba eribya m’obutseme, kyowene erihandikisya endwa oko leta kundi ekyo kikaleka abana ibalemberwa ahali ndeke. Abakristo batolere ibakenga ebilaghiro by’eleta ebilebirye erihandikisha endwa.​—Usome Luka 2:1, 4, 5.

OMungu akalangira endwa yati? Anzire omulume n’omukali ibabya omo bughuma biro byosi. Yehova anzire omulume n’omukali babye abateleghula oghundi oko ghundi. (Abaebrania 13:4) Akapona eritwa endwa. (Malaki 2:16) Aliwe akalighira Abakristo eritwa endwa n’eritasyatahya kutse eritahibwa omughuma w’okw’ibo amasingira.​—Usome Matayo 19:3-6, 9.

Yehova mwahangika omulume n’omukali eriwatikania omo buteke. (Enzuko 2:18) Kundi omulume y’omutwe w’obunyumba, litolere iniaha omukali n’abana biwe ebyo bayiteyire omo mubiri n’eribakangirirya oko Mungu. Atolere inianza mukali wiwe n’eriyiherera busana naye. Omulume n’omukali batolere ibanzana n’erisikania. Kundi abosi banganakola ebituwene, erigha erighanyirana ni kindu ekyangabaletera obutseme omo ndwa yabo.​—Usome Abanya Efeso 4:31, 32; 5:22-25, 33; 1 Petero 3:7.

Mwamabana amagumu omo buteke, inywe bosi mutolere imwakolerana omo lwanzo. (1 Abanya Korinto 13:4, 5)  EKinywa ky’oMungu sikiribugha kiti erighabana y’enzira y’eribugha amagumu awakabya omo buteke.​—Usome 1 Abanya Korinto 7:10-13.

Yehova anzire inywe bana imwabya n’obutseme. Akabaha obusondoli obuwene ngoko mwangatsemera obulwana bwenyu. Anzire amenge w’ababuti benyu n’ebyo babirilolako bibawatikaye. (Abanya Kolosai 3:20) Kandi ng’Omuhangiki wenyu, Yehova anzire imwabana obutseme bw’erimukolera iye na Mughala wiwe.​—Usome Omugambuli 11:9–12:1; Matayo 19:13-15; 21:15, 16.

Mutolere imwakola kutsibu mutoke eribanira abana benyu b’ebyalya, ah’er’ikala, n’esyongyimba. (1 Timoteo 5:8) Mwamanza muti abana benyu babye n’obutseme, litolere imwakangiriryabo erianza oMungu n’erigha emyatsi yiwe. (Abanya Efeso 6:4) Mwamanza oMungu, ekyo kyanganaleka n’abana benyu nabo ibamwanza. Mwamabakangirirya omwikolesya eKinywa ky’oMungu, eki kyanganaleka ibabya n’amalengekania awuwene.​—Usome Eryibuka Ebihano 6:4-7; Emisyo 22:6.

Abana bakayowa ndeke wamabahira mw’omuhwa n’eribasima. Kandi litolere ibakungwa. Eribakolera ghutya likabateghaya oko mibere eyangaleka ibabula obutseme. (Emisyo 22:15) Aliwe, omughulu tukakungabo situtsurume kutse eribya batsibu.​—Usome Abanya Kolosai 3:21.

Abimiri ba Yehova bakahandika ebitabu bingyi ebyangawatikya ababuti n’abana. Ebitabu ebi bihambene n’eBiblia.​—Usome Esyonyimbo 19:7, 11.