OMungu w’ekwenene y’Omuhangiki w’ebindu byosi. Iye syawite nzuko n’enduli. (Esyonyimbo 90:2) Engulu mbuya eyiri omo Biblia ni yiwe. (1 Timoteo 1:11) Kundi oMungu yo watuha engebe, litolere itwamuramya iye musa.​—Usome Eribisulirwa 4:11.

Sihali omundu oyo abirilangira oMungu kundi iye ni Mulimu, ni bughambu awite engebe eyilengire ey’abandu b’omubiri ng’itwe. (Yoane 1:18; 4:24) Aliwe, twanganaminya emibere y’oMungu omwilangira eby’ahangika. Ng’eky’erileberyako, ebighuma bingyibingyi n’amawa bikaleka itwaminya ngoko awite olwanzo n’amenge. Obunene bw’ekihugho n’ekyanya kyosi bikakanganaya akaghala kiwe.​—Usome Abanya Roma 1:20.

Twanganatasyaminya bingyi oko mibere y’oMungu omwisoma eBiblia. Ng’eky’erileberyako, yikatubwira eby’oMungu anzire n’ebyo aponire, ngoko akakolera abandu, kandi ngoko akay’owa amughulu abandu bakakola ebyuwene kutse ebituwene.​—Usome Esyonyimbo 103:7-10.

Yesu mwabugha ati tusabe tutya: ‘Tata wetu oyuli elubula, erina lyaghu libye libuyirire.’ (Matayo 6:9) OMungu akahulawa omw’amena mangyi awerisikya, aliwe awite erina lighuma lisa. Obuli mubughe awite ngoko akalibugha. Omo Kinande bakabugha bati “Yehova.” Aliwe abandi bakabugha bati “Yahwe.”​—Usome Esyonyimbo 83:18.

Erina ly’oMungu lyabirilusibwa omo syo Biblia nyingyi n’omo mwanya walyo babirihira mw’amena awerisikya nga Mukama kutse oMungu. Aliwe eBiblia yikahandikwa, erina  ly’oMungu irikabanikamo hakuhi ngendo 7 000. Yesu mwawatikya abandu eriminya erina ly’oMungu omughulu abya akabakangirirya emyatsi eyilebirye oMungu.​—Usome Yoane 17:26.

Lebaya evideo OMungu anawite erina?

Kundi abandu bangyi banemughalwa, ni bughambu Yehova syatutsomene? Abandi bakabugha bati yukatuletera eriaghalwa atoke eritulengako, aliwe ayo ni mabehi.​—Usome Yakobo 1:13.

OMungu abiriha abandu b’obwiranda bw’eriyisombolera. Kwenene tukasima kundi tukakolera oMungu omwanza lyetu! (Yoshua 24:15) Aliwe abandu bangyi bakakolera abandi b’ebitsibu, eki kyikaleka eriaghalwa iryakanya. Yehova akahitana akalangira erighonerwa ng’eri.​—Usome Enzuko 6:5, 6.

Yehova ni Mungu oyututsomene. Anzire itwatsema. Hakisiya hake inyabughaho eriaghalwa n’abakaleta lyo. Aliwe, hane ekikaleka inyalekerera eriaghalwa eri omo katambi kake. Omo nzumwa ye 8, tukendisyaminya ekikaleka inyalekerera eriaghalwa.​—Usome 2 Petero 2:9; 3:7, 13.

Yehova anzire itwaseghera hakuhi naye omwikania naye omo misabe. Atsomene omusabe w’obuli mundu. (Esyonyimbo 65:2; 145:18) Ni mughanyiri. Akalangira ngoko tukayikasa erimutsemesya, n’omo twanganalemerwa omo kandi katambi. Kwesi, n’omo tutahikene, twangananokya obwira haghuma n’oMungu.​—Usome Esyonyimbo 103:12-14; Yakobo 4:8.

Kundi Yehova abirituha engebe, litolere itwamwanza kulenga mundu wosi-wosi. (Mariko 12:30) Tukendikangania ngoko twanzire oMungu omughulu tukendilola embere omwigha bingyi okwiye n’erikola ebyo anzire itwakola, neryo tukendiseghera hakuhi naye.​—Usome 1 Timoteo 2:4; 1 Yoane 5:3.