ESOMO 6
Tuli n’eriyiketera lyahi oko baholi?
1. Engulu mbuya oko baholi ni yahi?
Yesu abere ahika eBetania hakuhi ne Yerusalemu, munwani wiwe Lazaro abya iniamabibugha biro bini omw’isinda. Yesu mwaghenda okw’isinda haghuma na bali ba bo Lazaro, ni bughambu, Marata na Maria. N’abandi bandu bangyi mubahika enyuma syaho. Teri lengekania yo Marata na Maria nga mubabya n’etseme yingahi Yesu abilubukya Lazaro!—Usome Yoane 11:21-24, 38-44.
Marata iye aby’inyanasi engulu mbuya oko baholi. Aby’asi ngoko Yehova akendisyalubukya abaholi batoke erikala kandi oko kihugho.—Usome Yobu 14:14, 15.
2. Abaholi bali bati?
OMungu mwabwira yo Adamu: ‘Uli lututu na kandi wasyasuba omo lututu.’—ENZUKO 3:19.
Abandu mubabumbwa omo lututu. (Enzuko 2:7; 3:19) Tuli bandu b’omubiri. Situli mw’ekirimu ekitehola. Tukabya twahola, obongo bwetu nabo bukahola, n’amalengekania wetu akahwa. Ky’ekyaleka Lazaro iniatakania ngoko abya omughulu abya aholire kundi abaholi sibasiki.—Usome Esyonyimbo 146:4; Omugambuli 9:5, 6, 10.
OMungu akanaghalaya abandu b’omo muliro babihola? Abakakangiriraya bati oMungu akahisaya abandu b’omo muliro bakalegha oMungu kundi eBiblia yikakanganaya ngoko abaholi sibasiki. Omwatsi ow’eriaghalya abandu b’omo muliro akamuhitanaya kutsibu.—Usome Yeremia 7:31.
Lebaya evideo Abaholi bali omo mibere eyiri yiti?
3. Abaholi banganakania netu?
Abaholi sibangakania kutse eriowa. (Esyonyimbo 115:17) Aliwe abamalaika abandi ni babi, kandi banganakania n’abandu n’eriyisosekania ng’abaholi. (2 Petero 2:4) Yehova akatughanaya erikania n’abaholi.—Usome Eryibuka Ebihano 18:10, 11.
4. Ni bahi abakendisyalubuka?
Abandu bangi ababirihola bakendisyalubuka oko kihugho. Nibya n’abandi ababya isibasi oMungu kandi imubakola ebituwene, nabo bakendisyalubuka.—Usome Luka 23:43; Emibiri 24:15.
Abakasyalubuka bakendisy’igha ekwenene eyilebirye oMungu n’erikangania erikirirya lyabo oko Yesu omwikola erisonda liwe. (Eribisulirwa 20:11-13) Abakendisyalubuka neryo ibakola ebibuya bakendisyikala oko kihugho kera na kera.—Usome Yoane 5:28, 29.
5. Erilubuka ly’abaholi likatwighisayaki oko Yehova?
OMungu erituma Mughala wiwe erisyatuholera mukyaleka ihabya eriyiketera oko baholi. Busana n’ekyo, erilubuka likaleka itwaminya Yehova kw’awite olwanzo n’obubuya bunene. Abaholi bakendisyabya balubuka, iwe wanzire iwasyalola okundi?—Usome Yoane 3:16; Abanya Roma 6:23.
