Embere abutawe oko kihugho, Yesu aby’ikere elubula. Abya ini kihangikwa ky’ekirimu. (Yoane 8:23) Iye abya kihangikwa ky’erimbere ky’oMungu na kandi oMungu mwakolesya Yesu erihangika ebindi bindu byosi. Yesu niye musa oyo Yehova ahangika iyuwene-wene; kyokikaleka iniahulwamo Mughala w’oMungu “ekyusa.” (Yoane 1:14) Yesu akahulawamo “Kinywa” kundi abya Mubuyi w’oMungu.​—Usome Emisyo 8:22, 23, 30; Abanya Kolosai 1:15, 16.

OMungu mwatuma Mughala wiwe omwihumya engebe yiwe erilwa elubula n’erihira y’omo nda y’omumbesa oyo wabya isyalyataminya omulume, oyukahulawa mo Maria. Busana n’ekyo, tata wa Yesu syabya mundu w’omubiri. (Luka 1:30-35) Yesu mwasa oko kihugho (1) erikangirirya ekwenene oko Mungu, (2) eritukangania ngoko twangakola erisonda ly’oMungu n’omo twangabya n’amagumu awakalire, (3) n’eriherera engebe yiwe eyihikene mo “mbanulo.”​—Usome Matayo 20:28.

Embanulo ni kindu ekikalihawa eribalya omundu y’oko luholo. (Eriluayo 21:29, 30) Silyabya erisonda ly’oMungu abandu erikekeluha n’erihola. Tukaminya eki kyo tuti? OMungu mwabwira omundu w’erimbere, yo Adamu, ati amakola eky’eBiblia yikahula mo “erilolo,” inyakendihola. Kwesi, Adamu kwatakola  erilolo, syangaholire na hake. (Enzuko 2:16, 17; 5:5) Erikwamana n’eBiblia, oluholo ‘mulwingira’ omo bandu busana na Adamu. Omo nzira eyi, Adamu mwasiyira abitsikulu biwe erilolo n’oluholo. Tukayitagha embanulo eritulamya oko luholo olo Adamu atusiyira.​—Usome Abanya Roma 5:12; 6:23.

Nindi yo wangatulihira embanulo eritulamya oko luholo? Omundu amahola akabya iniamaliha omusango w’ebibi biwe. Omundu oyutahikene syangalihira ebibi by’abandi abatahikene.​—Usome Esyonyimbo 49:7-9.

Itwe situhikene. Yesu iyo abya ahikene. Ni bughambu, syabya awite ekibi ekyangaleka iniahola. Si hali n’erilolo ery’akola. Aliwe, Yesu mwahola busana n’amalolo w’abandi. OMungu mwakangania ngoko anzire abandu bo kutsibu akatuma Mughala wiwe erisyatuholera. Yesu naye mwakangania ngoko atwanzire akakenga Tata wiwe n’eriherera engebe yiwe busana n’amalolo wetu.​—Usome Yoane 3:16; Abanya Roma 5:18, 19.

Lebaya evideo Busanaki Yesu mwahola?

Yesu abere ane oko kihugho, mwalamya abalwere, mwalubukya abaholi, n’erihumulikania abakaghalawa. Akola ebi erikangania ebyo akendisyakolera abandu bosi abak’owa omo biro ebikasa. (Matayo 15:30, 31; Yoane 5:28) Yesu abere abihola, oMungu mwamulubukya n’engebe y’ekirimu. (1 Petero 3:18) Neryo Yesu mwalindirira oko luhande l’oMungu olw’amalyo erihika aho Yehova amuha obutoki obw’eritabala ng’Omwami oko kihugho kyosi. (Abaebrania 10:12, 13) Lino, Yesu anemutabala elubula, n’abigha biwe banemutula engulu mbuya eyi omo kihugho kyosi.​—Usome Danieli 7:13, 14; Matayo 24:14.

Yesu akisiya iniakolesya obutoki bwiwe b’Omwami eribughaho eriaghalwa lyosi n’abakaletalyo. Abosi abakakanganaya ngoko bikirirye Yesu omw’ikola erisonda liwe bakendisyabana engebe oko kihugho paradiso.​—Usome Esyonyimbo 37:9-11.