Oko bosi abanzire Yehova Mungu n’eKinywa kiwe, eBiblia:

Yesu mwabugha ati: “Mwasyaminya ekwenene, n’omwatsi w’ekwenene asabaha obwiranda.” (Yoane 8:32) Terilengekania ngoko wayowa omughulu w’igha ekwenene y’eBiblia engendo y’erimbere! Mukyatsemesya eriminya ngoko omo kihugho ekyuswiremo amabehi, twangan’igha ekwenene.​—2 Timoteo 3:1.

Yehova Mungu anzire itwaminya ekwenene. Kandi kusangwa twanzire abandu, twanzire eribabwira oko kwenene eyo. Aliwe erikolera oMungu lisabire bingyi. Litolere itwayikasa eribya n’engebe y’eKikristo kundi tusikirye kutsibu esyokanuni sya Yehova. Yesu mwakangania enzira y’omughaso eyo twangakanganiryamo ngoko twanzire oMungu. Mwabugha ati: “Mwamakenga ebihano byage, mwasikala omo lwanzo lwage, ngoko nage nabirikenga ebihano bya Tata wage, neryo nyikere omo lwanzo luwe.”​—Yoane 15:10.

Kwenene Yesu anzire Thatha wiwe, kandi akakola ebyosi ebyo Thatha wiwe akamusaba ati akole. Twamab’igha Yesu omo ngebe yetu, Yehova inyakenditwanza, neryo kwenene itukendibana obutseme. Ngoko Yesu abugha, “mwamaminya emyatsi eyi, muli n’obutseme mwamakolayo.”​—Yoane 13:17.

Tukayiketera ngoko ekitabu kino kikandikuwatikya erigha eribya n’engebe eyihulikirirene n’ekwenene y’eBiblia n’eribya mwira w’oMungu. Tukasaba tuti ukule omo lwanzo lwaghu oko Mungu n’eriyitsinga eribya “omo lwanzo lw’oMungu . . . ukalindirira engebe y’erikota.”​—Yuda 21, NWT.