1-3. (a) Omo Emisyo 13:20 tukigha mo ki? (b) Busana naki litolere itwasombola abira bo ndeke?

UNEWATALANGIRA ngoko omwana akasamalira ababuti biwe? N’omw’angabya isyalyatsuka eribugha, akabya inianemuhamba ebyosi eby’akalangira n’eby’akowa. Akabya akakula, akatsuka erigha emibere y’ababuti biwe nibya butsira eriyikasa lyosi lyosi. Sikiriswekaya, n’abakulu nabo banganatsuka erilengekania n’erikola ng’abandu abo bakalabaya nabo endambi nene.

² Emisyo 13:20 yikabugha yiti: “Ulendere haguma n’abandu b’amenge nawe wasyabya w’amenge.” Hano, ebinywa ‘erilendera haguma’ n’omundu ni bughambu erisombola erilabya endambi nene haghuma naye. Erilendera haguma n’omundu si bughambu eribya n’omundu oyo buyira. Omusomi mughuma w’eBiblia mwabugha ati erilendera haghuma n’omundu lirimo erianza omundu oyo n’eryanza eribya naye omo bughuma. Abandu abo tukalabaya nabo endambi nene bakaleka itwabya n’emibere milebe, bikabya bitya kutsibu-tsibu bamabya ini bira betu.

³ Abira betu banganatusondola ndeke kutse muhanda. Emisyo 13:20 yikabugha kandi yiti: “Omwira  w’abakiru asyakwa.” Omo mubughe w’eKiebrania, “erilendera” n’omundu ni bughambu “eribya mwira” w’omundu oyo. (Emisyo 22:24; Abatsweri 14:20, NWT) Abira abanzire oMungu bakendituhira m’omuhwa w’eribya abataleghula okw’iye. Erituwatikya erisombola abira bo ndeke, tulebaye nga ni bandu abali bati abo Yehova akasombola mo bira biwe.

4. Busana naki ni lukengerwa lunene kutsibu eribya bira b’oMungu? Busana naki Yehova mwahula Abrahamu mo mwira wiwe?

⁴ Yehova, Omutabali w’ekihugho n’olubula losi, akatuha akanya k’eribya bira biwe. Olo ni lukengerwa lunene. Yehova akasombola ndeke abatolere eribya bira biwe. Akasombola abamwanzire n’abamwikirirye. Terilengekania oko Abrahamu. Abya inianayiteghekire erikola ekyosi-kyosi ekyo oMungu akamubwira. Omughulu wosi, Abrahamu mwakangania ngoko ni mundu oyuteleghula kandi oyukowa. Nibya abya iniabiriligha eriherera mughala wiwe yo Isaka. Abrahamu aby’ikirirye ngoko “[oMungu] angatoka erilubukya Isaka oko baholi.” (Abaebrania 11:17-19; Enzuko 22:1, 2, 9-13) Abrahamu abya mundu oyuteleghula kandi oyukowa, neryo Yehova mwamwahula mo “mwira wiwe.”​—Isaya 41:8; Yakobo 2:21-23.

5. Yehova akayowa ati busana n’abandu abataleghula okw’iye?

⁵ Yehova akalangira abira biwe mo b’obughuli. Abira biwe batsomene kutsibu obutaleghula bwabo okwiye kulaba ekindi kindu kyosi-kyosi. (Soma 2 Samweli 22:26.) Ni bandu abataleghula kandi abakowa kundi bamwanzire. EBiblia yikabugha yiti “obwira bwiwe buli haghuma n’abatunganene,” abakamwowa. (Emisyo 3:32) Yehova akakokaya abira biwe eribya bagheni  b’olukengerwa omo “hema” yiwe. Akabakokaya erimuramya n’erimusaba oko ndambi yosi-yosi.​—Esyonyimbo 15:1-5.

6. Twangakangania tuti ngoko twanzire Yesu?

⁶ Yesu mwabugha ati: “Omundu amanianza asyakenga ekinywa kyaghe. Kandi Tata wage asyamwanza.” (Yoane 14:23) Neryo eribya bira ba Yehova, kandi litolere itwanza Yesu n’erikola eby’abugha ati tukole. Eky’erileberyako, tukakenga erihano lya Yesu ery’eritula engulu mbuya n’eriyira abigha. (Matayo 28:19, 20; Yoane 14:15, 21) Kundi twanzire Yesu, ‘tukakwama olughobe lwiwe lwo ndeke.’ (1 Petero 2:21) Yehova akatsema omughulu tukayikasa erikwama olughobe lwa Mughala wiwe omo byosi ebyo tukabugha n’ebyo tukakola.

7. Busana naki litolere abira betu ibabya ini bira ba Yehova?

⁷ Abira ba Yehova ni bandu abataleghula kandi abakamwowa, kandi banzire Mughala wiwe. Tukanasombola abira abali ng’abo Yehova akasombola kwehi? Abira baghu bamakwama olughobe lwa Yesu n’erikola n’omuhwa omubírí w’erikangirirya abandi b’oko Bwami bw’oMungu, banganakuwatikya eribya mundu mubuya n’eriyikasa eribya mutaleghula oko Yehova.

8. Ekyo wamatsemera oko bwira bwa Ruta na Naomi ni kyahi?

⁸ EBiblia yikakanaya oko bandu bangyi ababya bira, ng’obwira bwa Ruta haghuma na mabyala wiwe, yo Naomi. Abakali aba balua omo bihugho bisighene n’emibere eyitasosene, kandi Naomi abya mukulu kutsibu oko Ruta. Aliwe mobabya bira kutsibu kundi abosi babya banzire Yehova. Omughulu Naomi asonda erilua  omo kihugho kye Moabu erisuba e Israeli, “Ruta mwamumakirira.” Mwabwira Naomi ati: “Abandu bawu basyabya bandu bage, n’[oMungu] wawe abye [Mungu] wage.” (Ruta 1:14, 16) Ruta abya akakolera Naomi yo ndeke. Babere babihika e Israeli, Ruta mwakola emibírí n’omuhwa eriwatikya nyoko-byala wiwe yo Naomi. Naomi mwanza Ruta yo kutsibu kandi mwamuha n’amahano awuwene. Ruta abya akakwama amahano ayo, neryo abosi mobabana emiyisa mingyi.​—Ruta 3:6.

9. Ekyo wamatsemera oko bwira bwa Dawidi na Yonatana ni kyahi?

⁹ Dawidi na Yonatana ni kindi ky’erileberyako ekyuwene eky’abira ababya bataleghula oko Yehova. Yonatana abya inyalengirye Dawidi y’emyaka hakuhi 30 kandi yo wangabere mwami we Israeli enyuma sya tata wiwe. (1 Samweli 17:33; 31:2; 2 Samweli 5:4) Aliwe abere abiminya ngoko Yehova abirisombola Dawidi eribya mwami, mwatamutsura kutse erisonda erimulengako. Nikwa, Yonatana mwayikasa erihamba Dawidi y’obuke bwa kuboko. Eky’erileberyako, omughulu Dawidi abya omo bwiko kutse omo hatari, Yonatana mwasikya Dawidi y’omutima ayiketere Yehova.’ Nibya mwahira n’engebe yiwe y’omo bwiko busana na Dawidi. (1 Samweli 23:16, 17) Dawidi naye abya mwira oyuteleghula. Mwakola endaghane y’erisyatsomana ekihanda kya Yonatana, kandi mwaberererya omulaghe oyo, nibya n’enyuma sy’oluholo lwa Yonatana.​—1 Samweli 18:1; 20:15-17, 30-34; 2 Samweli 9:1-7.

10. Eky’erileberyako eky’Abaebrania basatu kyamakwighisya mwatsi wahi oko bwira?

¹⁰ Sadiraki, Mesaki, na Abedenego babya balwana basatu Abaebrania kandi abira, abatwalawa hali oko bihanda byabo ibakine bana. N’omo banabya hali  n’ebihanda byabo, mobawatikania eribya bandu abateleghula oko Yehova. Mobabya babikula, erikirirya lyabo molyalengwako omughulu omwami Nebukadneza abugha ati baramaye esanamu eyikokotibwe omo horo. Sadiraki, Mesaki, na Abedenego mubaghana eriramya esanamu n’eribwira omwami bati: “Uminye ko tutendiligha erikolera emiungu yawe, kutse eriramya esanamu y’omulinga wasingika.” Omughulu erikirirya lyabo lyalengawako, abira basatu aba mobakangania ngoko ni bandu abateleghula oko Mungu wabo.​—Danieli 1:1-17; 3:12, 16-28.

11. Tukaminya tuti ngoko Paulo na Timoteo babya bira kundu?

¹¹ Omughulu omukwenda Paulo ahindana omulwana mulere, yo Timoteo, mwalangira ngoko abya anzire Yehova kandi ngoko kwenene atsomene endeko. Neryo Paulo mwakangirirya Timoteo y’eriwatikya balikyabo omo miyi mingyi. (Emibiri 16:1-8; 17:10-14) Timoteo mwakola emibírí mingyi n’omuhwa, kyo kyaleka Paulo iniabugha busana naye ati: “Abirikola haghuma naghe omo mubírí w’erigenda-gendya [eritulughania] Engulu Yuwene.” Paulo mwaminya ngoko Timoteo ‘akenditeya’ abandi Bakristo bo ndeke. Erikola omubírí wa Yehova wo haghuma, Paulo na Timoteo mobabya bira kundu.​—Abanya Filipi 2:20-22; 1 Abanya Korinto 4:17.

12, 13. (a) Busana naki tutolere itwasombola ndeke abira betu, nibya n’omo ndeko? (b) Ekyaleka omukwenda Paulo iniatuha erihano eriri omo 1 Abanya Korinto 15:33 niki?

¹² Omo ndeko, twanganighamyatsimingyierilwa oko balikyetun’eriwatikania eribyabandu abataleghula. (Soma Abanya Roma 1:11, 12.) Aliwe n’omo ndeko,  litolere itwayiteya omughulu tukasombola nga nindi yukendibya mwira wetu kutsibu. Tuwite balikyetu bangyi abuwene abakalua omo bihugho bisighene n’ab’emibere eyitasosene. Abakristo balebe ni bahya-bahya omo ndeko, n’abandi babirikolera Yehova omo myaka mingyi. Ngoko ekighuma kikasala kyera habilaba ebiro bingyi, obwira bw’omundu na Yehova nabo erinoka bukasaba biro bingyi. Busana n’ekyo, litolere itwakangania omutima w’erilindirira n’olwanzo oghundi oko ghundi, n’eribya n’amenge omughulu tukasombola  abira betu.​—Abanya Roma 14:1; 15:1; Abaebrania 5:12–6:3.

¹³ Oko sindi ndambi, omo ndeko mwanganahuluka emibere eyitatsemesirye, neryo ikikenditolera itwayiteya kutsibu. Mughala wetu kutse mwali wetu anganakola ekyo Biblia yikabugha yiti ni kibi. Kutse omundu anganabya n’omubere w’eritsweba-tsweba kutse eriyilungumula owangatsandya endeko. Ekyo sikyangatuswekya, kundi n’omo ndeko y’oko kame k’erimbere, ihakanayira imwabya emyatsi mibi. Omukwenda Paulo mwanakunga Abakristo b’oko biro ebyo ati: “Simutebibawe, kundi abira babi bakatsandaya omutima mubuya.” (1 Abanya Korinto 15:12, 33) Paulo kandi mwabwira Timoteo ati ayiteghaye omughulu akasombola abira biwe. Netu ko tunatolere erikola tutya munabwire.​—Soma 2 Timoteo 2:20-22.

14. Hali erihulikirirana lyahi omo kati k’abira abo tukasombola n’obwira bwetu haghuma na Yehova?

¹⁴ Tutolere itwateya obwira bwetu na Yehova busana ky’ekindu ky’obughuli bunene ekyo tuwite. Neryo siritolere tukabya n’obwira n’omundu wosi-wosi oyo wangakehya erikirirya lyetu n’eritsandya obwira obo. Ngoko tutetwangahira akakimba ak’omusohe k’omo maghetse awakinire n’erilindirira tuti kakendilwamo ikan’erire, kutya sitwangabya n’abira abakakola ebituwene neryo itwalengekania tuti kikendibya kyolo okwitwe erikola ebyuwene. Tutolere itwasombola ndeke abira betu.​—1 Abanya Korinto 5:6; 2 Abanya Tesalonika 3:6, 7, 14.

15. Wangakolaki utoke eribana abira abuwene b’omo ndeko?

¹⁵ Omo ndeko, wanganabana mw’abandu abanzire Yehova yo ndeke-ndeke. Banganabya bira baghu  kutsibu. (Esyonyimbo 133:1) Siwusondaye abira ab’omo lulengo lwaghu kutse ab’emibere ng’eyaghu basa. W’ibuke ngoko Yonatana abya mukulu kutsibu kulenga Dawidi, na Ruta abya mulere kutsibu oko Naomi. Twanzire erikwama erihano lye Biblia eribughire liti: “Mukingule emitima yenyu, NWT.” (2 Abanya Korinto 6:13; soma 1 Petero 2:17.) Kandi omughulu ukalola embere erikwama emibere ya Yehova, n’abandi nabo bakanza eribya bira baghu.

16, 17. Sikitolere tukakolaki omundu w’omo ndeko yetu amatuhitania?

¹⁶ Omo buli kihanda, mukabya abandu b’emibere, amalengekania, n’emikolere eyitasosene. Ko bine bitya n’omo ndeko. Eritendisosana eri likatsemesaya, kandi twangan’igha myatsi mingyi erilua oko bandi. Aliwe oko sindi ndambi, eritendisosana eri lyanganaleka itwabya n’eritendihulikirirana n’abalikyetu n’eribahitanako. Kutse banganatuhitania kutse ibaleka itwayowa muhanda. (Emisyo 12:18) Ebyo byanganaleka itwaluha omo mutima kutse eribya n’obulengekania bw’erilua omo ndeko kwehi?

¹⁷ Iyehe. Omundu n’omwangatuhitania ati, isitwaleka erihindana. Yehova yutalyatuhitanaya. Mwatuha engebe n’ebindi bindu byosi. Tutolere itwakangania olwanzo n’eribya abataleghula okwiye. (Eribisulirwa 4:11) Endeko ni kihembo kya Yehova ekikatuwatikaya eribya n’erikirirya eriwatire. (Abaebrania 13:17) Isitwaghana ekihembo kiwe n’ahake kusangwa omundu mulebe mwakatuhitanaya.​—Soma Esyonyimbo 119:165.

18. (a) Ekyangatuwatikya eribya omo bughuma n’abalikyetu niki? (b) Busana naki litolere itwaghanyira abandi?

 ¹⁸ Twanzire abalikyetu kandi twanzire eribya nabo omo bughuma. Yehova syalisaba abandu babye abahikahikene, netu ko tutolere itwabya tutya. (Emisyo 17:9; 1 Petero 4:8) Itwe bosi tukakola amalolo, aliwe olwanzo lukaleka itwabya ‘tukaghanyirana.’ (Abanya Kolosai 3:13) Olwanzo lukaleka itutayira eritendihulikirirana like mo lubanza lunene. Kwenene, omundu amatuhitania, erileka erilengekania kukyo lyanganakala. Erihitana n’eribika ekinigha lyolobire. Aliwe likabugha obutseme bwetu n’obuholo. Naho, omughulu tukaghanyira oyulyatuhitanaya, tukatulera omo mutima kandi n’omo ndeko imwabya obughuma, n’ekindi eky’omughaso munene, itwabya n’obwira obuwene haghuma na Yehova.​—Matayo 6:14, 15; Luka 17:3, 4; Abanya Roma 14:19.

19. Twangaleka eritamba n’omundu omo ndeko mughulu wahi kwehi?

¹⁹ Omo bunyumba obuli mw’olwanzo, obuli mundu akakola ekyo angatoka eritsemesya abandi. Aliwe terilengekania, omughuma wa kubo iniaghana erikwama esyokanuni sy’omo bunyumba. Obuli mundu w’omo bunyumba iniayikasa kutsibu erimuwatikya ngendo-ngendo, aliwe inyaghana obuwatikya obo. Anganasombola erilua omo nyumba, kutse omutwe w’obunyumba anganamubwira ati aghende. Ekiri ng’ekyo kyanganakoleka omo ndeko. Omundu anganasombola erikola ebindu ebitetsemesaya Yehova n’ebyangatsandya endeko. Kandi iniaghana obuwatikya n’erikangania omo mikolere yiwe ngoko syaky’anzire  eribya omo ndeko. Anganasombola iyuwene-wene erilua omo ndeko, kutse inyanganahiwa muyo. Ekyo kyamabya, eBiblia yikabugha ndeke-ndeke yiti situtolere ‘eritamba’ n’omundu oyuli ng’oyo. (Soma 1 Abanya Korinto 5:11-13; 2 Yoane 9-11) Ekyo kyanganakala kutsibu omundu oyo amabya ini mwira wetu kutse ini w’okwitwe. Aliwe omo mughulu oyo, litolere obutaleghula bwetu oko Yehova ibwabya n’akaghala kanene kutsibu kulaba obo tuli nabo oko mundu wosi-wosi.​—Lebaya Endomeko 8.

20, 21. (a) Emiteghekere y’erihigha omundu y’omo ndeko yikakanganaya olwanzo lo yiti? (b) Busana naki erisombola abira betu bo ndeke ni ly’omughaso?

²⁰ Erihigha omundu y’omo ndeko ni miteghekere y’olwanzo ya Yehova. Yikateghaya endeko oko bandu abatetsomana ebihano bya Yehova. (1 Abanya Korinto 5:7; Abaebrania 12:15, 16) Kandi yikaleka itwakangania ngoko twanzire erina libuyirire lya Yehova, ebihano biwe, na Yehova iyuwene-wene. (1 Petero 1:15, 16) Kandi emiteghekere y’erihigha omundu y’omo ndeko yikakanganaya olwanzo oko mundu oyulyahighawa omo ndeko. Erisuyirwa erisikire eryo lyanganamuwatikya eriminya ngoko eky’akakola sikyuwene n’erimuhira m’omuhwa w’eriyisubako. Hali abandu bangyi abahighawa omo ndeko ababirisubira Yehova n’erikokibwa ndeke omo ndeko.​—Abaebrania 12:11.

²¹ Omo nzira sisighene, ebyo abira betu bakakola bikatulendaya, ni bughambu, emibere yetu yikasosa eyikuwabo. Busana n’ekyo ni ky’omughaso erisombola abira betu bo ndeke. Twamanza abo Yehova anzire, itukendibya n’abandu abangatuwatikya eriyitsinga omw’ibya abataleghula oko Yehova kera na kera.