1, 2. Twangakolaki tutoke eriyitsinga eribya omo lwanzo lw’oMungu?

ITWE bosi twanzire itwabya itunakalire n’eribya n’akaghala. Ekyo kikaleka, itwayikasa erirya akalyo akuwene, erikalya-kalya omubiri, n’eribetekereragho. N’omo ebyosi ebyo bisondire omundu eriyikasa, situliluha busana n’endundi eyo bikatuletera. Aliwe hane eyindi nzira eyikatusaba eribya itunakalire n’eribya n’akaghala.

² N’omo twangabya itwabiritsuka eriminya Yehova, litolere itwalola embere eriwatya obwira bwetu naye. Omughulu Yuda abwira aBakristo ati, “Muyitsinge eribya omo lwanzo lw’oMungu,” mwakangania nga bangakola batya bati. Mwababwira ati: “Muyihimbe okw’ikirirya lyenyu eribuyirire kutsibu.” (Yuda 20, 21) Nikwa twangahimba tuti erikirirya eriwatire?

3-5. (a) Sitani anzire iwalangira esyokanuni sya Yehova syo wuti? (b) Ukalangira ebyalayiro bya Yehova n’esyokanuni siwe syo wuti?

³ Erikirirya iwuwene-wene ngoko esyonzira sya Yehova syo syuwene kutsibu ni ry’omughaso. Sitani anzire iwalengekania uti erisikya esyokanuni sy’oMungu likalire, kandi wamabya ukayisombolera ekibi n’ekibuya iwukenditsema. Eritsuka omw’irima lye Edeni, Sitani akayikasa  erikuna abandu b’ikiriraye omwatsi oyo. (Enzuko 3:1-6) Na munabwire kw’akinakola atya.

⁴ Sitani anasingene kwehi? Esyokanuni sya Yehova sikatuhira omo wali nga muliki? Iyehe. Eky’erileberyako, tubughe tuti unemuyilenderya omo parke kutse akasitu akuwene. Katambi kake iwalangira oluba luli olukakakiraya abandu erihika omo kiharo kilebe. Wanganayibulya uti, ‘busana naki bakanyikakiraya eringira omo kiharo eki?’ Neryo iw’owa endale kutse esimba iyinemururumira enyuma sy’oluba olo. Wangabya n’amalengekania wahi oko luba olo? Iwukendisima kundi oluba olo lukakuteghaya siulibawe n’endale! Esyokanuni sya Yehova nasyo siri ng’oluba olo, na Sitani ali ng’endale eyo. Ekinywa ky’oMungu kiti: “Mulebaye, muyitegaye! Kusangwa enzighu yenyu Sitani, yikaghenda-ghenda ng’endale, eyikaruruma n’erisonda-sonda oyo yangalya.”​—1 Petero 5:8.

⁵ Yehova anzire itwabya n’engebe eyuwene. Syanzire Sitani akatutebya. Kyo kikaleka iniatuha ebyalayiro n’esyokanuni esikatuteghaya n’erituletera obutseme. (Abanya Efeso 6:11) Yakobo mwahandika ati: “Omundu oyukalangira ndeke omughambo owahikene, ow’obwiranda, iniakakwamagho ndeke, asyabana obutseme . . . omo mubírí wiwe.”​—Yakobo 1:25.

6. Ekyangatuwatikya erikirirya kwenene ngoko esyonzira sya Yehova syo syuwene niki?

⁶ Twamakwama obusondoli bwa Yehova, engebe yetu yik’uwana n’obwira bwetu naye bukawata. Eky’erileberyako, akatubwira ati tusabe butsirileka; kwenene omughulu tukakola tutya tukabana endundi. (Matayo 6:5-8; 1 Abanya Tesalonika 5:17) Tukatsema omughulu tukasikaya erihano liwe ly’erihika oko mihindano y’eriya muramya haghuma n’abalikyetu n’erisikania mutima, n’omughulu tukakola omubírí w’eritulira abandi  b’engulu mbuya n’eribakangirirya. (Matayo 28:19, 20; Abanya Galatia 6:2; Abaebrania 10:24, 25) Omughulu tukalengekania ngoko ebyo Yehova akatusaba byabirituwatikya eribya n’erikirirya eriwatire, likaleka itwikirirya itwibene-bene ngoko esyonzira sya Yehova syo syuwene kutsibu.

7, 8. Ekikendituwatikya eritendisagha amaligho awangatuhikira niki?

⁷ Twangan’ubaha tuti omo biro ebikasa amaligho awakalire kutsibu anganasyatuhikira awakasyaleka erikirirya lyetu ilyalengwako. Wamabya iwukanayowa utya, w’ibuke ebinywa bya Yehova bino: ‘Ingye indi [Yehova Mungu] wawu, oyukakukangiriraya ubane endundi, oyukakusondola omo nzira eyo wangalenderamo. Kumbe wahulikirira ebihano byaghe! Neryo obuholo bwawe nga bwabiribya ng’olusi, n’eritunganene lyawe ng’ebisunda by’omo ngetse.’​—Isaya 48:17, 18.

 ⁸ Twamasikya ebyalayiro bya Yehova, obuholo bwetu bukabya ng’olusi oluty’uma, n’eritunganene lyetu (emibere yetu mibuya) likabya ng’ebisunda (amawimbi) by’engetse ebikabya ibinemuyighusa oko musike mughulu wosi. N’omo twangalola oko amaligho awali ati, syangatsandya emibere yetu y’eribya bataleghula. EBiblia yikalagha yiti: ‘Ugusire Yehova y’amalige wawe, naye akendikuhanganira. Siendisyaleka omundu mubuya akakindwa na kera.’​—Esyonyimbo 55:22.

9, 10. Eribya mundu oyukulire bunya-kirimu ni bughambuki?

⁹ Wamayitsinga eriwatya obwira bwaghu na Yehova, ‘ukalola embere erikula.’ (Abaebrania 6:1, NWT) Erikula bunya-kirimu ni bughambuki?

¹⁰ Eribya Mukristo oyukulire si ry’erikekeluha kutse erilasya esyombwi. Erikula bunya-kirimu ly’eriyira Yehova mo mwira wetu kundu, n’eriyikasa erilangira emyatsi ngoko akalangirayo. (Yoane 4:23) Paulo mwahandika ati: ‘Abakakwama omubiri bakaghaniraya emyatsi y’omubiri. Nikwa abakakwama ekirimu bakaghaniraya emyatsi y’ekirimu.’ (Abanya Roma 8:5) Omundu oyukulire bunya-kirimu syalihira eriyitsemesya kutse ebindu by’ekinya-mubiri by’embere omo ngebe yiwe. Aliwe erikolera Yehova n’erisombola eby’erikola byo ndeke by’eby’omughaso munene okwiye. (Emisyo 27:11; soma Yakobo 1:2, 3.) Syaliligha akunawe erikola ekituwene. Omundu oyukulire bunya-kirimu anasi ekyuwene kandi akayikasa kutsibu erikolakyo.

11, 12. (a) Ekyo Paulo abugha oko “maka w’obulengekania” ni kyahi? (b) Eribya Mukristo oyukulire rilingene liti n’eribya musati w’ebitsange bilebe?

¹¹ Litolere eriyikasa eribya mundu oyukulire bunyakirimu. Omukwenda Paulo mwahandika ati: “Ebyalya  ebikala-kalire ni by’abandu abakulire, ababirikangirirya amaka wabo w’obulengekania omw’ibegheryagho eritoka erisombola ekibuya n’ekibi.” (Abaebrania 5:14, NWT) Ekinywa ‘eribegheryagho’ kyanganaleka itwalengekania okw’iyibegherya ly’abandu abakakola ebitsange bilebe.

¹² Omughulu tukalangira omundu oyo w’asi na kandi oyukakola ebitsange bilebe byo ndeke, tukaminya ngoko mwabugha biro bingyi akayibegherya. Mwatabutwa inianasi erikola ebitsange ebyo. Omughulu omwana akabutawa, akabya isyasi erikolesya amaboko n’amaghulu wiwe. Aliwe akabya akakula, akigha erihamba ebindu n’eribasula. Amayibegherya, inianganasyabya musati mukulu w’ebitsange. Netu kutya, eribya Bakristo abakulire likatusaba biro bingyi n’eriyibegherya.

13. Ekyangatuwatikya erigha erilengekania nga Yehova niki?

¹³ Omo kitabu kino, twamabilangira ngoko twangabya n’amalengekania wa Yehova n’erilangira emyatsi ngoko akalangirayo. Kandi twamab’igha eritsemera n’erianza esyokanuni sya Yehova. Omughulu tukasombola eky’erikola omo mwatsi mulebe, tukayibulaya tuti: ‘Ni byalayiro byahi kutse esyokanuni syahi sy’eBiblia esyo nangakolesya omo mwatsi oyu? Nangakolesya ebyalayiro ebyo kutse esyokanuni esyo syo nyiti? Yehova anzire inakolaki?’​—Soma Emisyo 3:5, 6; Yakobo 1:5.

14. Twamanza tuti erikirirya lyetu liwate litolere itwayira tuti?

¹⁴ Isitwaleka n’ahake eribya tukawatya erikirirya lyetu oko Yehova. Ngoko erirya ebyalya ebyuwene rikahimba emibiri yetu n’erikalyakalya yo, erigha eriminya Yehova likatuwatikaya eriwatya erikirirya lyetu. Omughulu twatsuka erigha eBiblia, motw’igha amakangirirya makulu-makulu awalebirye Yehova n’esyonzira siwe. Aliwe, ngoko ebiro binemughenda bikalaba, litolere eriyiteghererya kutse eriminya emyatsi ya Yehova yo bûli. Ekyo kyo Paulo akangiriraya akabugha ati: “Ebyalya ebikala-kalire  ni by’abandu abakulire, NWT.” Omughulu tukakolesaya ebyo tuk’igha, bikatuletera amenge. EBiblia yikatubwira yiti: “Amenge ni mwatsi w’embere.”​—Emisyo 4:5-7; 1 Petero 2:2.

15. Busana naki erianza Yehova n’abalikyetu omo kwenene ni ry’omughaso?

¹⁵ Omundu anganabya inianakalire kandi iniane n’akaghala, aliwe akabya inianasi ngoko amasonda eribya atya mughulu wosi, litolere iniayitsinga eribetekerera engebe yiwe. Kutya, n’omundu oyukulire bunya-kirimu naye akabya inianasi ngoko litolere iniayikasa kutsibu amasonda ati obwira bwiwe na Yehova bubye ibunawatire. Paulo akatw’ibukaya ati: ‘Muyilengeko nga mukine omw’ikirirya; mubye mukayiteghererya nga muli muti!’ (2 Abanya Korinto 13:5, NWT) Nibya, eribya n’erikirirya eriwatire lyo tutalayireko lisa. Olwanzo lwetu oko Yehova n’abalikyetu litolere ilwalola embere omw’ikula. Paulo mwabugha ati: “N’omo nangabya . . . n’eriminya lyosi, kandi n’omo nangabya n’erikirirya lyosi erikatoka erilusya ebitwa, nikwa isingwite olwanzo, inyiri busa.”​—1 Abanya Korinto 13:1-3.

16. Sitani anzire itwayowa tuti?

¹⁶ Sitani anzire itwalengekania tuti sitwangatoka n’ahake eritsemesya Yehova. Anzire itwaluha omo mutima n’erilengekania tuti sihali ekyangatoka eritulusya omo maligho wetu. Syanzire tukayiketera aBakristo balikyetu, kandi syanzire tukatsema. (Abanya Efeso 2:2) Sitani anasi ndeke ngoko twamabya n’amalengekania awatuwene awali ngayo inianganatutsandya n’eritsandya obwira bwetu n’oMungu. Aliwe Yehova abirituha ekyangatuwatikya erikinda amalengekania awatuwene. Abirituha amaha.

17. Eribya n’amaha ni ry’omughaso busana naki?

 ¹⁷ Omo 1 Abanya Tesalonika 5:8, eBiblia yikasosekanaya amaha wetu n’esapwe y’ekyuma eyikateghaya omutwe w’omusuda omo malwa; yik’ahula esapwe eyo mo “maha w’omulamo.” Eribya n’eriyiketera omo milaghe ya Yehova lyanganateya amalengekania wetu n’erituwatikya erikinda amalengekania awatuwene.

18, 19. Eriyiketera eryo Yesu abya nalyo mulyamuha akaghala ko liti?

¹⁸ Amaha kutse eriyiketera eryo Yesu abya nalyo molyamuha akaghala. Omo kiro kiwe ky’omwiso oko kihugho, ebitsibu bingyi mobyamuhikira. Omughuma w’oko bira biwe b’oko ndungu mwamwitisya. Nibya n’oghundi mwabugha ati syamwasi. Abandi mobamusighania n’eritibita. Abandu b’omo muyi wiwe mobamuhanganirako, n’eribugha bati ahanikawe oko muti. Ekyamuwatikaya erihandira ebitsibu ebyo by’omutima ni kyahi? ‘Busana n’obutseme obwabya embere siwe, mwayiyinia oko  muti w’amaghali, n’esisoni mwatalangirasyo nga kindu, kandi abir’ikala oko luhande lw’amali lw’ekitumbi ky’[oMungu] eky’obwami.’​—Abaebrania 12:2, NWT.

¹⁹ Yesu abya inianasi ngoko eribya mundu oyutaleghula, likendiletera Thatha wiwe y’olukengerwa n’erikangania ngoko Sitani ni mubehi. Eriyiketera eryo mulyamuletera obutseme bunene. Kandi abya inianasi ngoko habya hakisiya hake iniatasyayikala haghuma na Thatha wiwe omo lubula. Eriyiketera eryo molyamuwatikya eriyiyinia. Netu kutya litolere itwahira amalengekania wetu w’okw’iyiketera lyetu. Eriyiketera eryo likendituwatikya eriyiyinia n’omo hangabyaki.

20. Ekyangakuwatikya eribya n’amalengekania awuwene niki?

²⁰ Yehova akalangira erikirirya n’eriyiyinia lyaghu. (Isaya 30:18; soma Malaki 3:10.) Akalagha erikuha “ebyo mutima wawe anzire.” (Esyonyimbo 37:4) Neryo uyikase erihira amalengekania waghu wokw’iyiketera  lyaghu. Sitani anzire iwaherya amaha kutse eriyiketera lyaghu n’erilengekania uti ebyo Yehova abirilagha sibyendisyabererera n’ahake. Aliwe isiwanataligha eribya n’amalengekania awatuwene ayo! Wamalangira eriyiketera lyaghu iririmukeha, usabe Yehova y’obuwatikya. W’ibuke ebinywa ebiri omo Abanya Filipi 4:6, 7: “Simuhanga-hangaye emitima yenyu, nikwa omo buli mwatsi mubwire [oMungu] Obwagha bwenyu, imukamusaba n’erimuhatikana, imunemuha ewasingya. N’obuholo [bw’oMungu], obulabire amenge wosi, bwasyateya emitima yenyu n’amaghaniryo wenyu omwisi wa Kristo Yesu.”

21, 22. (a) Erisonda lya Yehova oko kihugho niki? (b) Wamasombola erikolaki?

²¹ Mughulu wosi, ubye iwunemulengekania bûli oko biro bibuya ebikasa. Omo biro ebikasa, obuli mundu akendisyaramya Yehova. (Eribisulirwa 7:9, 14) Terilengekania oko ngebe omo kihugho kihya-kihya. Engebe eyo yikasyuwana kulenga ngoko tukalengekanaya! Sitani n’esyombinga siwe, n’obubi, ebyosi bikendisyabya isibikiriho. Siwendisyasyalwala, kandi siwendisyahola. Obuli kiro ukendisyabya ukabuka n’akaghala kanene n’eritsemera eribyaho. Abandu bosi bakasyakola omubírí w’eriyira ekihugho mo paradiso wo haghuma. Abosi bakendisyabya n’ebyalya ebyuwene, n’aherikala ahatekene. Abandu sibendisyabya batsibu kutse abanzire amalwa, aliwe bakendisyabya n’olukogho lw’ekwenene oghundi oko ghundi. Oko nduli, abandu bosi oko kihugho bakendisyingira “omo bwiranda n’olukengerwa lw’abana [b’oMungu].”​—Abanya Roma 8:21.

²² Yehova anzire iwamuyira mo Mwira waghu kundu. Neryo ukole ekyosi-kyosi ekyo wangatoka erisikya esyokanuni sya Yehova n’eriyitunda hakuhi naye obuli kiro. Leka itwe bosi tuyitsinge eribya omo lwanzo lw’oMungu kera na kera!​—Yuda 21.