EBiblia yikakanaya oko bikundi bibiri eby’Abakristo balume abakakola omo ndeko​—‘abateya [abalebererya] n’abawatikya.’ (Abanya Filipi 1:1) Omo buli ndeko mukabya imune abasyakulu n’abaghombe abawatikya balebe. Abaghombe abawatikya bakatukolera ki?

Bakawatikaya abasyakulu. Abaghombe abawatikya ni balwana kutse balume bakulu abali n’obwira obuwene na Yehova, abangayiketerwa, kandi abakakola ndeke emibiri yabo. Oko Kisenge ky’Obwami bakakola emibiri y’endeko ey’omughaso, n’eyikayitagha akaghala. Eki kikaleka abasyakulu ibakwamirira omubiri wabo w’erikangirirya n’eriteya esyombuli.

Bakakola emibiri y’omughaso. Abaghombe abawatikya balebe bakawatikaya okwikokya abakasa oko mihindano. Abandi bakakola oko byuma ebikaleka omulenge iniowika ndeke, bakaghabira abandu b’ebitabu, bakabika esyofranka sy’endeko, n’erighabira obuli mughambuli obulambo bw’erihubirya. Kandi bakawatikaya okwisugha kutse erikokotya Ekisenge ky’Obwami. Abasyakulu banganababwira bati bawatikaye abandu ababirikekeluha. Omuhwa wabo n’eriligha erikola omubiri wosi-wosi owo bakahebawa kikaleka endeko iyabasikya.​—1 Timoteo 3:13.

Bakahira ho eky’erileberyako kibuya. Bakasombolawa busana n’emibere yabo y’eKikristo. Bakahimba erikirirya lyetu omughulu bakakangiriraya oko mihindano. Eky’erileberyako kyabo omo bughambuli kikaleka netu itwabya n’omuhwa. Kundi bakakola haghuma n’abasyakulu kikaleka ihabya etseme n’obughuma. (Abanya Efeso 4:16) Omo biro bikasa, nabo banganatolera eribya basyakulu.

• Abaghombe abawatikya ni balume bali bati?

• Abaghombe abawatikya bakawatikaya endeko bati?