Erilwa kera, Yehova anzire obuli bunyumba bubane endambi yeribya haghuma busana n’erihimba obunwani bwabo n’oMungu, n’erihimba obunyumba bwabo. (Eryibuka Ebihano 6:6, 7) Busana nekyo, obuli yenga Abimiri ba Yehova bakarondaya endambi y’erikola eriramya ly’obunyumba. Omwiramya eryo bakakanaya ibanatekene oko myatsi y’oMungu eyangawatikya obuli mughuma wabo. Wamabya iwikere iwuwene, wanganalabya endambi eyo n’oMungu uk’igha omwatsi owo wanzire.

Ni ndambi y’eriseghera hakuhi na Yehova. ‘Muyilete [museghere] hakuhi n’oMungu naye akandiseghera hakuhi nenyu.’ (Yakobo 4:8) Tukatoka eriminya Yehova yo ndekendeke omughulu tuk’igha omo Biblia emyatsi eyihambene n’emibere yiwe n’ebyo akola kera. Enzira nyolo y’eritsuka eriramya ly’obunyumba nisoma eBiblia haghuma omo milenge eyikowika, kutse erikwama e programe y’obuli yenga y’omuhindano Omubírí n’Amaisa w’oMukristu. Obuli mundu anganahabwa emilondo y’erisoma, neryo abosi ibakania ebyo bamigha omo milondo eyo.

Ni ndambi y’erihimba haghuma ekihanda. Abalume n’abakali, ababuti n’abana bakahimba obughuma omo katikati kabo omughulu bak’igha eBiblia yo haghuma. Litolere iniabya mughulu owukatsemesaya, owatekene, owo obuli mundu akalindirira kutsibu. Erikwamana n’emyaka y’abana babo, ababuti banganasombola emyatsi eyitolere erikanibwako, banganalusyayo omo Munara wa Mulinzi (Akalebereryo k’Omuteya) ne Amuka! (Ubuke!) kutse erilwa oko jw.org. Mwanganakania oko myatsi eyikakenderaya abana oko kalasi kandi ngoko bangakinda yo. Mwanganalebya e programe JW Télédiffusion (tv.pr418.com) n’erikania kuyo haghuma mwabilebyayo. Mwangan’imba esyonyimbo esikend’imbwa oko mihindano ye yenga eyo n’eriyitsemesya haghuma mukabugha eriramya ly’obunyumba.

Endambi eyo mukalabaya obuli yenga mukaramya Yehova haghuma yikendiwatikya abosi banze eKinywa ky’oMungu, Yehova naye akanditsumula akaghala kenyu.​—Esyonyimbo 1:1-3.

• Busanaki tukasondaya endambi y’erikola eriramya ly’obunyumba?

• Ababuti bangakola ki obuli mundu atoke eritsemera endambi eyi?