Yesu mwabwira abakwenda biwe ati: ‘Muleke ekyakakala kyenyu kikoleraye kitya embere sy’abandu balangire emibiri yenyu mibuya, bapipe Tata wenyu oyuli elubula.’ (Matayo 5:16) Kyo kikaleka itwakolesya e teknolojia ya munabwire, erihirako ne Enternete. E adrese yetu eye Enternete jw.org ikakanganaya emyatsi eyilebirye Abimiri ba Yehova. Nikwa, kukabya myatsi ki?

Ebyo eBiblia yikasubaya oko mabulyo awo bandu babeghere eribulya. Wanganabana ebyerisubya oko mabulyo makulu-makulu awo bandu bakabulaya. Ekyerileberyako, wanganabana oko Enternete esyo trakte Eryaghalwa linemwendisyahwa? ne Kwenen Abaholi banemwendisyalubuka? omo mibughe kulenga 600. Kandi wanganasunga eBiblia Tafsiri ya Ulimwengu Mpya (Embidula ye Kihugho Kihya) omo mibughe kulenga 130 haghuma n’ebitabu bingyi ebikawatikaya erigha eBiblia, ng’ekitabu Biblia Inafundisha Kabisa Nini? (Kwenene eBiblia Ikakangiriraya Ki?) n’esyogazeti sya lino-lino esyo Munara wa Mulinzi ne Amuka! Emyatsi mingyi yanganasomerwa kutse erihulikirirwa oko Enternete, kutse wanganalusya oko Enternete esyo format esiminyikere kutsibu MP3, PDF, kutse EPUB. Nibya wanganatsapisya ehiratasi hilebe ehyo wangaha omundu oyukanzisibawa omo mubughe wiwe! N’emyatsi y’abatsiha yikabanika omo syovideo. Wanganalusyako obusomi bw’eBiblia, ebitsange ebiseghemere eBiblia, n’esyonyimbo esyuwene esyo wangahulikilira iwunatekene.

Emyatsi y’ekwenene eyilebirye Abimiri ba Yehova. Kandi wanganabana eyi emyatsi mihya-mihya n’esyovideo esikakanganaya omubiri wetu ngoko akakolawa omo kihugho kyosi, emyatsi eyilebirye Abimiri ba Yehova, kandi ngoko tukawatikaya abakawa kw’ebitsibu. Wanganabanako eshongulu esilebirye emihindano minene-minene eyikendibya kandi ukendibana ngoko wangakania n’abali oko syobiro nge syetu.

Omw’ilabira omo syonzira esi, tukahikaya ekyakakala ky’ekwenene omo biharo bye hali bye kihugho. Abandu omo kihugho kyosi, erihiraho n’abe Antarktika bane muhabuka. Tukasaba tuti ‘eKinywa ky’oMungu kighende-ghende luba’ omo kihugho kyosi, oMungu atoke eripipwa.​—2 Abanya Tesalonika 3:1.

• E adrese yetu jw.org yinemuwatikya yiti abandu bangyi eriminya ekwenene y’eBiblia?

• Ni byahi ebyo wanzire iwalebya oko adrese yetu ye Enternete?